علمونا كتير إن الحياة نظام واحد تمشي عليه وإن طريقة أكلنا أو أي رجيم بنعمله يبقى نظام واحد لكن مع الوقت اكتشفنا إن صحتك هتبقى أحسن لو عملتي دمج النظام النباتي بالحيواني، واستمتعتى بالفوايد الصحية. وده اللي أقرّته منظمة الصحة في الخمس سنين الأخيرة.
نباتية ده شيء سيء
انتشر مؤخرًا النظام النباتي بقوة في العالم كله، وبدأ يتبعه مجموعة كبيرة من الفنانين والبلوجرز. ولكن كان دايمًا رد الناس اللي بتحب اللحوم على النظام ده إنه شيء سيء جدًا وفيه حرمان. وعلى الرغم من ده، أثبتت الأبحاث نجاح النظام النباتي في تقليل الكوليسترول وتحسين صحة الأوعية الدموية أنه غني بالخضروات والفواكه مع الحبوب والبقول واللي بتساعد القلب يشتغل كويس.
بتاكلى لحمة؟ ده إنتي عدوة الأرض
اتعودنا من صغرنا على أكل اللحوم والدواجن ومشتقاتهم، ولكن نظرة الشخص النباتي لآكلي اللحوم إنهم أعداء الأرض ومش بيرحموا الحيوان. لكن خلينا نكون متفقين إن أكل اللحوم الحمراء والدواجن ومشتقاتهم من الكبد والبيض والألبان بيمدوا الجسم بالمعادن المهمة والفيتامينات وعلى رأسهم فيتامين بـ12 ومعدن الحديد والزنك واللي ليهم دور هام في عملية جسمنا الحيوية.
تجربة حقيقية من مريم
مريم حسين بنت جامعية إسكندرانية كانت بتاكل كل الأكل الغلط اللي في الدنيا والفاست فود والسكريات بكثرة. وكان وزنها زايد جدًا ونفسيتها وحشة حتى مع إتباعها كل الرجيمات التقليدية كانت دايمًا تخينة، ومش بتخس، ده غير حبوب الوجه والاكتئاب المستمر، ولكن ده اتغير دلوقتي.
ازاي قدرتي تتغيري؟
سألت مريم بعد لما بقى عندها متابعين كتير جدًا على الإنستاجرام من كل دول العالم ومن كل الأعمار وأنا منهم طبعًا. ازاي قدرتي تتغيري وتخسي وتبقي مبسوطة ونشيطة وواثقة من نفسك؟ إجابتها كانت ببساطة إنها قررت في يوم تاكل خضار وفاكهة وتشرب عصاير الخضار مع الفواكه فى الخلاط وتبطل كافيين وقهوة وأكل الشارع وتكتر أكثر من الحبوب والبقوليات.
وبتاخد كل سكرياتها من الفواكه، وده غيّر فيها حاجات كتير غير الوزن، لا كمان الثقة بالنفس والسعادة الداخلية.
طب بتعملي إيه في مغريات الأكل؟
ولما سألتها طيب لما بتخرجي بتعملي إيه في مغريات الأكل، قالت بتاخد معاها أكلها بره في علبة أو بتشرب عصير فريش وفواكه من محلات العصير اللي بقت كتير في مصر. ده غير السوبرماركت اللي بقى يبيع الفواكه متقطعة جاهزة. وكملت كلامها إن ده فرق معاها في بشرتها وصحتها النفسية وقدرت بالتدريج تنقل تجربتها على السوشيال ميديا للبنات، عشان الكل يستفيد. ده غير تأكيدها على إن النظام المليان خضار وفواكه بيضيع الاكتئاب بدون أدوية ولا أطباء.
هل إنتي ضد النظام الحيواني واللحوم؟
قالت لأ طبعًا كل واحد ياكل بالطريقة اللي يحبها ولكن الأهم ناكل خضار كتير وفواكه وبقوليات عشان صحة جسمنا ومخنا. مريم واحدة ناجحة في حياتها وعندها تجربة سواء اتفقنا أو اختلفنا في طريقة الأكل. المهم إنك تنجحي وتحققي شيء تفتخري بيه وتريحي بالك.
الاثنين حلوين
خلينا نتفق سوا إن النظام النباتي والحيواني مهمين جدًا مع بعض. ولو بتحبي اللحوم بأشكالها، كليها بس دايمًا خلي في يومك خضار وفواكه وعصاير فريش وما تنسيش البقوليات والحبوب باعتدال. وكل حد بيتبع نظام مريحه تمام. لكن هيبقى الأفضل هو نقل التجارب من الستات الناجحين عشان تتعلمى إن النجاح بسيط وإنك مش لوحدك، ودايمًا فيه حد شبهك وبيعمل زيك.
وريحي بالك.
1 comment
احلي مقال في تاريخ الموقع ❤️❤️❤️