كتير بنحس إننا محتاجين نغير في ألوان حوائط البيت، سواء لمجرد تغيير الألوان، أو علشان تناسب أثاث جديد، أو علشان أحباب الله رسموا عليها ولونوها بما فيه الكفاية، بس في نفس الوقت مش عاوزين نقلب البيت، وندخل عُمال، وميزانيتنا محدودة، وفي ناس بتكون عاوزه تجرب بنفسها، علشان كده في المقال ده هنقولك إزاي تدهني حيطة بيتك زي المحترفين:
-
حددي النتيجة اللي انتي عاوزها
يعني قرري هل انتي عاوزه الحيطان كلها لون واحد، ولا عاوزة تنوعي في الألوان؟ وهل هتعملي حاجة معينة في السقف ولا لا.
-
اختاري الألوان
حددي الألوان المناسبة لبيتك، وفي بعض ماركات الدهانات مواقعها بتسمح ليكي انك تشوفي شكل الدهان على الحوائط، وحاولي تتخيلي شكل الشمس والظل على جدران بيتك.
وده دليلك لاختيار ألوان الحوائط
-
هتحتاجي الأدوات دي:
- رسم
- رولة دهانات
- عمود بكرة الدهان
- هدوم مناسبة للدهان
- فرش صغيرة للدهان
- صينية دهان
- مشمع
- شريط لزق
- سكين المعجون
-
حددي كمية الدهان اللي هتحتاجيها
في طرق قياسات كتير لكمية الدهان ودرجاتها اللي انتي هتحتاجيها، بس برأيي أفضل حاجة تعمليها، لو بتتعاملي مع محل بويات موثوق، إنك تقيسي المساحة اللي عندك كويس، وبعد تحديد الألوان اللي هتحتاجيها، تقوليله وهو هيحسب لك انتي محتاجة أد إيه، وخليه هو يخلط لك الدرجات اللي انتي اختارتيها، لإن هو أدرى وعنده جهاز خلط بيطلع نتايج أفضل كتير من اليدوي.
-
جهزي المكان
- شيلي كل الأثاث اللي في الأوضة، أو أي حاجة خايفة عليها، ولو مش عارفة تشيليهم، يبقى على الأقل تغطيهم كويس جدًا بمشمع وبلاستيك مش بقماش.
- غلفي مفاتيح الكهربا، ومقابض الأبواب والشبابيك، وأي حاجة ثابنة في الأوضة.
اتجاهات الدهان
ابدأي من فوق لتحت، من قرب السقف الأول وبعدين انزلي لاتجاه الأرض، وابدأي بالمناطق الواسعة الأول، وبعدين اوصلي للمناطق الضيقة واللي حوالين الشباك والأبواب.
-
مرحلة التهوية
سيبي المكان يجف تمامًا، وافتحي له مجال تهوية كويس، وما تشيليش شرايط اللزق ولا المشمع من على الأثاث في المرحلة دي، وعلشان تساعدي أكتر في عملية التهوية، تقدري تشغلي مروحة أو أكتر موجهة ناحية الحوائط.
-
التنظيف
شيلي شرايط اللزق بهدوء وحرص، وشيلي كل المخلفات اللي على الأرض واكنسيها بمكنسة كهربائية، علشان التراب والشوائب اللي على الأرض ما توسخش الحوائط، وبعدين شيلي أغلفة الأثاث بالراحة، وارجعي اكنسي وامسحي الأرض تاني، ولو في أي بواقي دهان على الأرض حاولي تشيليها بدون ما تجرحي الأرضيات.
رجعي الأثاث والديكورات مكانها، واستمتعي بمهمتك اللي نجحتي فيها على أكمل وجه.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك