العيد الكبير خلاص على الأبواب، وكلنا بنحب ننضف البيت مخصوص علشان العيد احتفالًا بيه. بس حقيقي مع كل المجهود النفسي والعصبي والجسدي اللي الأمهات بتعمله يوميًا، بتكون مهمة تنضيف البيت اللي هي أصلًا شبه روتين يومي مهمة صعبة وسخيفة. علشان كده، هنقول لك النهارده شوية نصائح خفيفة كده هتخلّي الموضوع سهل ولطيف عليكي ويتعمل بسرعة جدًا، تعالي نشوف إيه هي النصايح دي.
جهزي أدواتك
مهم جدًا إن بيتك يكون فيه بالضبط الأدوات اللي محتاجة لها علشان تخلص معاكي. كل ما كانت الأدوات عملية وفعالة، كل ما كانت أسهل في الاستخدام، وأسرع عليكي.
ابتدي من تحت لفوق
في التنضيف العادي بتاعنا، كنا زمان أمهاتنا يعلمونا إننا ننضف من أول مثلًا الشبابيك أو النجف، وبعد كده، نبدأ ننزل وصولًا للأرض، بس في التنضيف السريع، وعلشان النتيجة تكون سريعة هتكون من تحت لفوق، يعني نضفي الأرض الأول علشان تعرفي تتحركي بسهولة، تنضيفها ده بيشمل إزالة الأتربة وأي حاجة واقعة على الأرض، ده كبداية يعني.
اعرفي هنا روتين تنظيف البيت الأسهل والأسرع
15 دقيقة لكل غرفة
من الحاجات اللي باستخدمها بشكل شخصي وباعتبرها محفز ليا، هي سياسة الـ15 دقيقة. أنا مش هاقف على الحوض غير 15 دقيقة، مش هانشر غير في 15 دقيقة، مش هاطبق الهدوم غير في 15 دقيقة. باضبط المنبه وابدأ شغل، وبمجرد ما يرن، باسيب المهمة اللي في إيدي وابدأ غيرها، اللي بيحصل معايا حاجتين: تحفيز للحركة السريعة، وتجنب للملل والزهق، وزي ما عنوان المقال إنك تنضفي الشقة في 3 ساعات، فانتي فعلًا عندك 12 ربع ساعة. صدقيني هتقدري تنجزي في أقل من كده بالطريقة دي.
اشتري مكنسة
طبعا أنا قصدي المكنسة الكهربائية مش اليدوية، حقيقي الجهاز ده ممتاز، وحاليًا في الأسواق فيه تصميمات مختلفة بإمكانيات عالية هتخلي جهاز واحد بس – اللي هو المكنسة – يخلص لك مشاكل كتير، زي مثلًا تراب الشبابيك، أيوة انتي مش محتاجة تقعدي تنفضي وتطلع عينك في تراب الشبابيك مع الفرشاة المخصوصة للتراب في المكنسة.
هتقدري تكنسي بيها السجاد في دقايق، فيه في المكانس الجديدة فرشاة مخصوصة لكنس السراميك، دي برضه هتغنيكي كتير جدًا عن بهدلة التراب وبواقي الأكل الجافة اللي بتكون على الأرض، وهتخلي المساحة اللي بتنضفيها جاهزة للمسح.
ومن الحاجات العظيمة اللي بتعملها المكنسة هي كنس الستاير من التراب اللي ممكن يكون عالق فيها. وده شيء عظيم برضه في حد ذاته. هتلاقي نفسك شلتي كل التراب الصعب من غير أي إحساس بخنقة التراب، وحقيقي الموضوع ممكن ياخد منك 15 دقيقة اللي كان قبل كده بياخد منك ساعة مثلًا، وطبعًا كنس مراتب السراير لو بتعملي أوضة نوم، وكنس كراسي الليفنج والصالون.
عشان الحمام من أكتر الخطوات اللي بتاخد وقت، اعرفي هنا روتين تنظيف الحمام خطوة بخطوة
كدة أزمة التراب اعتبريها مع المكنسة الكهربائية منتهية. بس عندي ليكي كأم نصيحة في استخدامها: أول حاجة، ما تخليش المكنسة الكهربائية شغالة بشكل متواصل أكتر من خمس دقايق، دي واحدة من طرق الحفاظ على عمرها الطويل. (اعرفي من هنا ازاي تحافظي على عمر الأجهزة الكهربائية).
حاجة كمان: لو المكنسة اللي هتشتريها من النوع اللي في كيس مش box، هتحتاجي تعرفي إن الكيس ده لازم يتغسل بشكل دوري كل شهر مرة لو انتي منتظمة في استخدامها. طبعًا، هتفضي التراب كويس وتنفضيه. وبعد كده، تنقعيه في مياه ينزّل كل الأتربة الزيادة. وبعد كده، اغسليه في الغسالة، هيطلع نضيف وممتاز جدًا.
آخر حاجة في موضوع المكنسة الكهربائية، وأنا نفسي باعملها، هو استخدام الفانيليا او القهوة في المكنسة. هاقول لك إزاي. لما باستخدمها لأول مرة، بعد ما أغسلها بحط على الأرض كيسين فانيليا أو معلقة بن. اللي بيحصل بعد كده إن كل مرة هتستخدميها هتلاقي إن ريحة الفانيليا أو البن هي اللي انتشرت في الشقة مش ريحة التراب اللي في قلبها، وده شيء أنا باعتبره لطيف جدًا.
فوطة فيبر
حاليًا الأسواق مليانة أنواع مختلفة من فوط الفيبر اللي مهمتها إزالة التراب من على الأسطح، الحلو فيها إنها فعالة على مستوى الأسطح المستوية، بتشيل التراب بسهولة وبتجنبك استخدام الكيماويات، ودي شيء أنا باعتبره إيجابي. بس هتحتاجي تمسحي المرايات بملمع إزاز، مع إن على فكرة فيه في الأسواق دلوقتي أنواع من الفوط بتنضف الإزاز والمرايات من غير ملمع مخصوص ليها.
افرشي قبل ما تمسحي
سواء في الليفنج أو أوض النوم، دلوقتي إنتي كنستي الشبابيك، والستاير، والمراتب، وشيلتي التراب من الأسطح المختلفة. الأرض عندك نضيفة من التراب، فاضل لها التلميعة الأخيرة. وعلشان تحسي بالإنجاز الحقيقي، افرشي السراير وجهزي المكان للخطوة الأخيرة اللي هي تلميع الأرض.
أدوات مسح الأرض
احنا حاليًا بنتكلم على مستوى تنضيف سطحي سريع، يعني مش عايزين عمق وفرهدة. عايزين نضافة طبعًا بس بسرعة. علشان كده، مهم تستخدمي أدوات مسح للأرض تكون فعالة وسهلة. حاليًا في الأسواق، فيه أشكال وألوان، والموضوع بيحكمه حسب راحة كل واحدة في الاستخدام. عمومًا مهما كانت طريقة استخدامك، لازم تعرفي كذا حاجة:
أول حاجة: مسّاحة الأرض أو في قول آخر الشرشوبة مش بتتغسل بالكلور. مهما عملتي، مش هتنزل الحاجات العالقة فيها، ده غير إن الكلور هيبوظها أصلًا، ويخليها تتقطع بسهولة. علشان كده، بعد ما تخلصي استخدامها، اشطفيها بمياه فاترة واغسليها في الغسالة، هتطلع نضيفة جدًا وجاهزة للاستخدام من غير أي أثر على الأرض.
منظف الأرض ودواء النمل:
آخر حاجة هاقول لك عليها إنك حقيقي لازم تستخدمي منظف مخصص للأرض، لأن أي منتج تاني للأسف بيسيب أثر على الأرض ومش هتحسي بالنتيجة اللي تبسطك، بس ليه باقول لك دواء النمل، لأن أفضل وقت تقاومي في النمل هو الوقت ده، المياه اللي بتستخدميها في تنضيف الأرض هتكون فعالة في نشر الدواء ومقاومة النمل.
اعرفي طريقة التخلص من النمل نهائيًا في المنزل
حاجة كمان: هاتي بخاخة مياه وحطي نصها مياه وشوية من دوا النمل، واستخدمي البخاخة دي على كل إطارات الشبابيك والأبواب عندك، كلها بلا استثناء. الميزة في كده إن مش هيبقى فيه نمل، ونفس البخاخة استخدميها على السجاد علشان بس النمل ما يشاورش عقله ويتمشى على السجاد، وآخر وأهم مكان حوالين السرير، لأن مشاركة النمل لينا على السرير بتكون غير سعيدة على الإطلاق.
اتحداكي بعد 3 ساعات من الأسلوب اللي فوق ده إن بيتك ما يكونش اتنضف وبقى فلة شمعة منورة. وتقدري بعد كده تاخدي الشاور الجميل وتلبسي البيجامة الحلوة، وكل سنة وإنتي طيبة يا جميلة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك