محتويات المقال
ومين فينا مش بياكل ويشرب في الشتا عشان يتدفى؟ سواء شوربة العدس والبطاطس والبصل المتحمرين ولا كوباية كاكاو سخنة مولعة بالمارشميلو وكوباية السحلب اللي مليانة مكسرات أو أبو فروة اللي بنخلص منه كميات وحمص الشام بالشطة وغيرهم كتير من الأكلات اللي نفسنا مبتتفتحش عليها غير في الشتا.. طيب وبالنسبة للبس الصيفي ووزننا اللي بيزيد هنعمل فيه إيه؟ هنا هنديكي شوية نصايح عشان تقدري تثبتي وزنك في الشتا لو مش قادرة تعملي رجيم.
الاكل الصحي
طبعًا عارفين قد ايه ممكن يكون صعب إنك تعملي رجيم في الشتا خصوصًا إننا في الشتا بنعتمد على الأكل عشان يدينا طاقة وبنعتمد على المشروبات اللي سعراتها الحرارية عالية زي الكاكاو والسحلب بس ممكن تغيري من نوعية الأكلات ونخليها صحية أكتر وسعراتها الحرارية أقل زي:
- البروتين
البروتين الصحي زي صدور الدجاج المشوية والسمك المشوي والبيض والمكسرات زي اللوز والبندق.
- الفواكه
ممكن تستبدلي الحلويات بالفواكه الصحية زي التفاح والبرتقال والكيوي والفراولة وممكن لو حسيتي انك محتاجة تاكلي حاجة مسكرة تاكلي تفاح وعليه زبدة فول سوداني وعسل أو تعملي سلطة فواكه مغذية.
- العيش الأسمر
حاولي تتجنبي العيش المخبوز بالدقيق الكامل وتستبدليه بالعيش المصنوع من الحبوب الكاملة.
- الشوكولاتة الداكنة
لو نفسك تاكلي شوكولاتة حاولي تكون نوعها دارك لان قيمتها الغذائية بتكون عالية بس استهلكيها بحذر لأن سعراتها الحرارية بردو بتكون عالية بس مغذية أكتر من الشوكولاتة العادية.
- مشروبات صحية
لو حابة تشربي حاجة سخنة ومتخنكيش ممكن تعملي مشروبات صحية بسعرات حاراية قليلة زي مشروب القرفة والجنزبيل والشاي الاخضر ولو نفسك تشربي مشروب الشوكولاتة ممكن تستبدلي الكاكاو المسكر بالكاكاو الخام (الغامق) مع لبن قليل الدسم وتحليه بالعسل بس مرة واحدة فقط ويفضل ميبقاش كل يوم.
زودي نشاطك البدني
قلة الحركة والأكل في الشتا بيزود الوزن عشان مفيش حرق للدهون عشان كده لازم تزودي حركتك ونشاطك البدني، طبعًا الرياضة بالنسبة لينا كأمهات ممكن تكون صعبة عشان قلة الوقت والمسئوليات بس ممكن نزود حركتنا في البيت بشوية تمارين بسيطة زي تمارين الـstretches وتمارين الـwalk at home أو لو عندك وقت ممكن تمشي لمدة 20 دقيقة يوميًا وممكن تستخدمي السلالم بدل الأسانسير كوسيلة إنك تزودي حركتك.
متنسيش تشربي ميه
دايمًا بننسى نشرب ميه في الشتا لإن العطش بيكون قليل بس الميه مهمة جدًا لو عايزة تثبتي وزنك أو تخسي لانها بتعزز من عملية الحرق عشان كده لازم تشربي مش أقل من 8 كوبيات ميه في اليوم.
طبعًا عارفين قد إيه ممكن يكون الموضوع صعب في الشتا بس متحرميش نفسك من كل حاجة وفي نفس الوقت حاولي يكون عندك اختيارات صحية ومغذية في أكلك، حابين نسمع منك بتحافظي على وزنك إزاي في الشتا؟
المصدر:
التعليق باستخدام حساب فيس بوك