الكيماويات المتاحة دلوقتي للتنظيف أصبح فيها تنوع رهيب. وفي نفس الوقت، فيه خوف شديد منها، بسبب أثرها السلبي المحتمل على صحة أفراد الأسرة. علشان كده، أمهات كتير بتدور على بدائل تدّي نفس النتيجة المرضية في النظافة، وفي نفس الوقت، تكون خالية من الخطر المرعب اللي ممكن ينتج عن استخدام الكيماويات في التنظيف.
ومن هنا، ظهر الخل كبديل مقبول جدًا، وفي نفس الوقت، نتيجته حلوة جدًا في التنظيف. في المقال ده، جمعت لك شوية استخدامات للخل في التنظيف المنزلي هتخليكي ما تستغنيش عنه أبدًا.
استخدامات الخل في تنظيف المنزل
إزالة الروائح
هاتي بولة واسعة فيها خل فى الغرفة اللي عندك اللي حاسة إن ريحتها مش لطيفة، سيبي الخل يمتص الراوائح دي من الغرفة، وتقدري تغيري البولة دي يوميًا ومش هتلاقي أي رائحة غير مستحبة أبدًا.
تنظيف البلاعات وصناديق القمامة
دي واحدة من استخدامات الخل المفضلة بالنسبة لي، كل اللي باعمله إني أصب كوباية من الخل فى البلاعة أو صندوق القمامة واسيبه لمدة ساعة علشان أقدر أتخلص من كل الروائح والأوساخ. وبعد كده، باغسله عادي جدًا وبيرجع نضيف ومن غير أي ريحة كريهة.
إزالة رائحة الحلل والبرطمانات
مين فينا ما عندهاش حلة أو صينية أو برطمان مش لازق فيه ريحة زي توم أو سمك أو حتى أكلة مليانة بصل والريحة مش راضية تروح؟ الخل في إيده الحل للموضوع ده. كل اللي هتحتاجيه إنك تجيبي كوباية مياه مع كوباية خل أبيض وتسيبيها ساعة، وبعد كده تغسليها عادي هتلاقي الريحة راحت خالص.
إزالة بقع السجاد
لو حاجة وقعت على السجادة، وخايفة لما تغسليها تبوظ، هاتي اسفنجة أو قطعة قماش لامتصاص أي سائل واقع على السجادة، رشي ميكس من المياه ومن الخل بنسب متساوية على المنطقة اللي اتوسخت من السجاد. سيبي السجادة لمدة دقيقتين على الأقل علشان مش عايزين خليط المياه والخل ينشف من عليها. وبعد كده، استخدمي اسفنجة لإزالة الميكس والبقعة من على السجادة هتلاقيها نضفت جدًا.
إزالة البقع من على حوض المطبخ
رش الخل على حوض المطبخ، وبعد كده، استخدمي فرشة أو السفنجة لإزالة البقع هتلاقيه بقى يلمع ونضيف جدًا.
إزالة البقع من الملابس
لو لاقيتي هدومك فيها بقع صعبة زي الكاتشب، والشوكولاتة، والمواد الدهنية تقدري بكل سهولة تشيليها بالخل، حطي شوية من الخل مباشرة على البقعة. وبعد كده، افركها بقطعة من القماش الناعم، وبعد كده، اغسلي الهدوم في الغسالة كالمعتاد، هتلاقيه نضفت جدًا.
تنظيف النوافذ
حطي الخل والمياه بالتساوي في رشاش/بخاخ مياه. وبعد كده، رشيه على الشبابيك وامسحيها بقطعة قماش ناعمة أو مناديل ورق أو حتى ورق جرايد هتلاقيه نضف بسهولة وبيلمع جدًا.
تنظيف الأرضيات
ضيفي كوباية من الخل لكل تلاتة لتر من مياه التنضيف. وبعد كده، استخدميهم لتنظيف الأرضيات، واستمتعي بسيراميك نضيف جدًا وبيلمع بشكل رائع.
تنظيف أسطح المطبخ
رشي الخل المخفف على سطح الأجهزة المختلفة اللي في المطبخ زي البوتجاز والثلاجة وغيرها. وبعد كده، امسحي باستخدام المناديل الورقية أو قماشة نظيفة.
إزالة رواسب الصابون من أحواض الحمام والحنفيات
اخلطي الملح بالخل بنسبة مثلًا معلقة واحدة ملح لكل 4 معالق خل. وحطيها اسفنجة التنظيف. وافركي بها ترسبات الصابون على الأحواض والحنفيات واتفرجي على النضافة واللمعان اللي هتلاقيه.
لتنظيف الغسالة
روتين مهم جدًا للحفاظ على غسالتك إنك تعملي دورة تنضيف بالخل مرة كل شهر. ودي طريقتها إنك تضيفي كوباية من الخل لدورة غسيل فاضية من غير هدوم. الدورة دي أهميتها إنه بتنظف الغسالة من بقايا المساحيق، وبيعدي لها نضافتها وكفائتها وبيخلصها من أي روائح غير مستحبة ممكن تكون فيها.
تقدري تقولي إن دي الاستخدامات العامة والمهم للخل في التنضيف بس فيه مجموعة أفكار تانية زي مثلًا:
أفكار مفيدة
- امنعي العفن من النمو في حمامك عن طريق رش ستارة الحمام والحوائط بالخل.
- امنعي النمل من الانتشار في بيتك عن طريق رش الخل فوق رخامة المطبخ وإطارات الشبابيك وأعتاب الأبواب وكل المداخل التانية اللي ممكن للنمل الدخول منها.
- استخدمي الخل في تنضيف الأماكن المخصصة لحيوانك الأليف.
- لو عندك استيكر لازق على الحيطة أو على أي جزء من أثاث بيتك تقدري تشيليه بكل سهولة بمجرد إنك ترشي عليه شوية خل وتسيبيه لمدة 10 دقايق هتلاقي إن إزالته بقت سهلة جدًا ومن غير أي أثر.
أتمنى الأفكار دي تكون مفيدة ليكي وتساعدك على التخلص من الخوف من الكيماويات وفي نفس الوقت حافظت على رغبتك في الحصول على نظافة ممتازة لبيتك، لو عندك أفكار غيرها شاركينا بيها.
التعليق باستخدام حساب فيس بوك