محتويات المقال
“عندي فرشة اروبة لها شعر صغنون، ومعاها انبوبة بتطلع معجون”
مين فينا مش فاكر أغنية صفاء أبو السعود القديمة، وممكن يغنيها في سره وهو بيغسل سنانه؟ عمرك تخيلتي إن معجون الأسنان القابع في الأنبوبة الصغيرة بكل براءة في حمامك، ممكن يكون له استخدامات رائعة، سواء لبشرتك أو صحتك، أو حتى استخدامات منزلية مبتكرة؟ هتكتشفي إن فيه حلول سهلة جدًا لمشاكل يمكن كانت مستعصية عليكي وحلها على بُعد أنبوبة. كل الاستخدمات دي أنا جربتها علشان أكون متأكدة إنها فعالة، وبتجيب نتيجة بحق وحقيقي. تعالي اعرفي عنها أكتر.
استخدامات معجون الأسنان بطريقة طبية وعلاجية
- موقف إننا نتعرض للحرق البسيط خلال الطبخ، يعتبر بالنسبة لنا موقف اعتيادي. بس في نفس الوقت، بيحتاج منك تصرف سريع علشان تقلّلي ضرر درجة الحرارة على بشرتك. فلو اتعرضتي للموقف ده، تقدري تدهني معجون أسنان على مكان الإصابة. وهتلاقيها هديت ودرجة حرارتها بردت.
- من استخدامات معجون الأسنان المختلفة الحلوة هي تنظيف أظافر اليد ونظافتها. بس مهم تاخدي بالك إن الطريقة دي مناسبة لأصحاب الأظافر القوية. لو إنتي عندك تشقق أو جفاف في الأظافر، بلاش تستخدمي المعجون في نظافتها. هتحتاجي فرشة أسنان ناعمة مخصصة للأظافر. هتحطي شوية على الفرشة وتغسلي ضوافرك وإيدك فيها، وهتحسي بفرق حقيقي.
- من الاستخدمات الحلوة للمعجون إن لو عندك فجأة ميتينج أو أي مناسبة، هتلاقي الحباية الجميلة طالعة في وشك بدون سابق إنذار. أسهل طريقة للتعامل مع الضيفة الجديدة دي إنك تحطي عليها شوية معجون أسنان وتسيبيها طول الليل. هتضحي الصبح وهتكون الحبة دي اختفت بسبب المعجون.
- لو واقفة في المطبخ، وتعاملتي مع البصل أو التوم أو حتي أسماك، هتواجهي مشكلة الصعوبة في التخلص من رائحتهم من إيديكي. لكن لو استخدمتي المعجون في غسيل إيدك، وغسلتي كويس به، هتلاقي الريحة راحت بكل سهولة.
استخدامات منزلية للمعجون
- من البقع الصعبة جدًا هي بقع السجاد خصوصًا لو بقعة حبر أو مكياج عليه. إزالتها بتكون مش سهلة أبدًا، وممكن تخليكي تتكلفي ماديًا علشان تقدري تتخلصي منها. بس بكل بساطة لو حصل معاكي كده، غطّي البقعة بمعجون الأسنان وسيبيها تنشف. وبفرشة خشنة، افركي البقعة دي، وهتلاقيها طلعت واحتفظتي بسجادتك.
- شخبطة ولادنا على الحوائط بأقلام التلوين الشمع، وظهور الفنان فيهم بشكل ما لوش سيطرة، هتلاقي إن التخلص منها صعب حقيقي. بس لو استخدمتي معجون الأسنان في تغطية الحيطة المصابة وسيبتيها على الأقل تلات ساعات أو لتاني يوم، وباستخدام أسفنجة ناعمة ومياه باردة، شيلتيها، هتلاقي الشخبطة دي طلعت من غير أي ضرر لدهان الحيطة أو ورق الحائط.
- من الاستخدامات الحلوة للمعجون هو قدرته على تلميع كل أدواتك المعدنية الثمينة. كل اللي هتعمليه، إنك هتدهنيها معجون وبقماشة ناعمة تفضلي تدعكي فيها لحد ما توصلي لدرجة اللمعان اللي انتي عايزاها. وده يعتبر بديل طبيعي وأقل ضررًا من منتجات تلميع المعادن اللي كلها أضرار.
استخدامات مختلفة لمعجون الأسنان
- لو عندك بوستر أو إعلان صغير، ومش لاقية مادة لاصقة، تقدري تستخدمي معجون الأسنان كوسيلة لاصقة، وفي نفس الوقت سهل إزالتها والتخلص من أثرها
- لو عندك أحذية بيضاء، وفقدتي الأمل فيها إن نعلها يرجع أبيض تاني، لو حطيتي عليها معجون أسنان واستخدمتي فرشاة أسنان قديمة وفركتي بشكل قوي، هتلاقيها رجعت تاني والاصفرار اللي فيها راح.
كل الطرق اللي فاتت أنا جربتها بنفسي، وفي كل مرة المعجون أثبت نجاجه وفاعليته في مواجهة مشاكل كانت حقيقي بتخلق لي أزمة. جربي الحلول دي وقولي لي أنهي طريقة كانت مفيدة لك أكتر.
المصادر
Carefree Dental
Morning Chores
Healthy Women
What’s your Reaction?
التعليق باستخدام حساب فيس بوك