لو عندك طفلة شعرها كيرلي، ممكن تلاقي شوية صعوبة في العناية بيه طول الوقت، فممكن تفكري في فرد شعرها بطريقة بتدوم لوقت طويل وترتاحي وتريحيها، بالإضافة إنك هتخلي شعرها له مظهر مفرود وناعم على طول، ودلوقتي بقى في منتجات كتير تحت اسم “بروتين لفرد شعر الأطفال” وبتتباع على إنها خفيفة وآمنة على الأطفال، بس هل ده فعلا صحيح؟ ده اللي هتعرفيه في المقال ده:
-
إيه هو بروتين فرد الشعر؟
البروتين الكيميائي بيستعمل لتجميل الشعر، وبيندرج تحته كمان “الكيرياتين” والاتنين فيهم مادة الفورمالدهيد (Formaldehyde) الكيميائية، واللي بتسبب السرطان، ومشاكل صحية تانية كتير.
-
إيه هو بروتين الشعر للأطفال؟
هو نفس بروتين الشعر للكبار، بس ممكن تكون النسب الكيميائية فيه أقل شوية، بالإضافة لنكهات الفواكة أو نكهات وألوان تانية محببة للأطفال، لكن مادام بيفرد الشعر يبقى برضه فيه مادة الفورمالدهيد، واللي بيتقال عنها في السوق “فورمالين”.
-
هل بروتين الشعر آمن للأطفال؟
بروتين الشعر مش آمن على الكبار، فمن باب أولى يكون مضر جدًا على الأطفال، بسبب سهولة امتصاص أجسامهم للمواد دي، ومناعتهم بتكون لسا مش كبيرة، بالإضافة إنك بتعرضي الطفل لاستخدام المواد دي لسنين طويلة.
-
الكوافير قاللي ده بروتين علاجي
أكيد الكوافير هيقولك كده، وهو البروتين فعلا بيعالج هيشان وتقصف الشعر وبيفرد التجاعيد، لكن مش معنى كده إنه طبيعي أو مش مضر، وأي منتج محتاجين نتأكد من درجة الأمان بتاعته، يا إما ناخده ونسأل دكتور ثقة، أو نشوف المكونات المكتوبة على العلبة وندور عليها بالتفاصيل على الانترنت.
-
أفرد شعر بنتي ازاي؟
- اسألي نفسك الأول، انتي ليه عاوزه تفرديلها شعرها؟ هل هي متضايقة فعلا منه؟ ولا انتي مقاييس الجمال عندك اللي فيها خلل وحاسه إن الشعر الناعم والمفرود بس هما اللي حلوين؟ هل بتتعرض للتنمر بسبب شعرها؟ ولا انتي عاوزة ترتاحي من فقرة تسريح الشعر؟ لما تجاوبي نفسك على الأسئلة دي هتقدري تحددي فين المشكلة، لو لقيتي المشكلة عندك فلازم تحليها بدل ما تضري شعر بنتك، لو المشكلة عندها يبقى لازم تقوّمي المشكلة من الجذور، فلو هي بتتعرض للتنمر لازم تديها ثقة في نفسها وتفهميها أكتر عن اختلاف أشكالنا، وعن مقاييس الجمال الحقيقية، لإنك لو غيرتي تجاعيد شعرها علشان محدش يتنمر عليها وحسيتي إن ده الحل، طيب لو حد اتنمر عليها بسبب لون بشرتها أو أي حاجة تانية متتغيرش، هتعملي إيه؟! وتقدري تشوفي المقال ده:
- مش معنى إنك هتسيبي شعر بنتك كيرلي، إنك ما تعتنيش بيه وتخلي شكله مش مهندم، بالعكس العناية بالشعر هتزيد، وتقدري تلاقي ملف كامل في موقع راحة بالي عن العناية بالشعر الكيرلي، وتقدري تشوفي المقال ده:
- وكمان اهتمي بتغذيتها غذاء متوازن هيفرق جدًا في صحتها العامة وبالتالي صحة شعرها.
- اعملي لشعرها ماسكات ترطيب طبيعية كل فترة، واستخدمي منتجات طبيعية قدر الإمكان في غسيل وترطيب الشعر.
- قصي لها شعرها عند حد متخصص، قصة تناسب شعرها وسنها ووشها.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر:
التعليق باستخدام حساب فيس بوك