مع نهاية رحلة الحمل ودخول مرحلة الولادة، بتبدأ الحامل تدخل في توتر جديد، لإنها بعد ما اتعودت على الحمل 9 شهور، هتبدأ حاجة جديدة هي مش عارفة هي إيه. ده لو حامل أول مرة. ولو دي ولادة متكررة بالنسبة لها، فهي أكيد خايفة من حاجات مرت بيها في الولادات السابقة. ففي كل الأحوال، هتكون محتاجة جوزها جنيها. وفي المقال ده، هنقول لك على 5 حاجات من استعدادات الولادة كل أب لازم يعملها مع مراته قبل الولادة، تقدري تطلبيها من جوزك بدون ما تستني إنه يعملها من نفسه.
-
الدعم النفسي
وده من أهم استعدادات الولادة اللي بتكون الحامل عاوزاها وقت الولادة، بتكون محتاجة حد يقول لها إن كل ده هيعدي وإن في حد تاني مقدر آلامها وخوفها ده، وخصوصًا قبل دخول غرفة الولادة. محتاجة ماحدش يقلل من مخاوفها ويسفه منها، بالعكس محتاجة تطمن وتهدى. ومفيش حد هيكون له تأثير إيجابي نفسيًا أكتر من الزوج، علشان كده وجود الأب قبل الولادة ضرورة مش رفاهية.
وهتحتاج الحامل الدعم النفسي ده أكتر، لو مامتها مسافرة أو متوفية. اقروا هنا عن وفاة الأم أثناء الحمل .. مامتي ماتت قبل ما أولد
-
أخد القرارات
في لحظات كده قبل الولادة بتكون كلها توتر وعصبية، زي نتصل بالدكتور ولا نروح المستشفى ولا نكلم ماما الأول. كل ده محتاج الزوج هو اللي يرتبه ويعمله بهدوء وبدون توتر، لإن الحامل مش هتقدر تفكر وأعصابها هادية في الوقت ده.
-
المساعدة الجسدية
لو الولادة طبيعية، فهتكون فيه مرحلة الطلق اللي في البيت، أو نزول مياه الولادة وكل العلامات دي، وهنا محتاج الزوج يساعد الحامل على الراحة، وتقديم السوايل لها، وتمارين تنظيم النفس، ويساعدها على دخول الحمام أكتر من مرة، وتغيير ملابسها لملابس نضيفة ومريحة.
أما لو الولادة قيصرية، فممكن يهديها بالكلام عن انتظاره لها ولطفلها بالسلامة، وتسليتها في الطريق للمستشفى، ووجوده معاها في وقت التحضير لغرفة العمليات.
-
حضور الولادة
قرار حضور الولادة ده مشترك بين الزوج والحامل والطبيب، فلازم يكون مترتب له من قبل الولادة. ولو الزوج مش هيستحمل يحضر الولادة، لازم يكون معاها في المستشفى ومستنيها عند باب غرفة الولادة، بحيث تكون آخر حد شايفاه قبل ما تدخل، وأول حد تشوفه لما تطلع بالسلامة. وده مهم جدًا لنفسية الأم ولتخطيها وتعافيها من اللحظات الصعبة، لإنها هتحس إن جوزها واقف جنبها ومقدر ألمها.
ولو دخل معاها غرفة الولادة، يقدر يدعمها بمسك إيدها طول الوقت، ويقول لها كلام يطمن ويهديها. اعرفي دور الأب في الولادة .. أكتر من مجرد حضور
-
تحضير شنطة الولادة
ودي من المهام المرهقة على الحامل، لإن فيها تفاصيل كتير، والزوج يقدر يساعد الحامل في تحضيرها بإنهم يعملوها مع بعض، أو هي تطلب منه يجيب حاجات معينة ويزبطها في الشنطة، أو هي تجمع له كل حاجة وتسيب عليه مهمة تستيف الشنطة بعناية، وده على حسب إمكانيات الزوج، ويفضل إن الحامل تكون كاتبة كل اللي محتاجاه في ورقة، علشان جوزها ما ينساش حاجة وترجع تعاتبه. ساعدناكي في تحضير لستة شنطة الولادة في فصل الشتاء وتجهيز شنطة الولادة للأمهات اللي هيولدوا في الصيف.
وكمان البيت تجهيزات الولادة: إزاي ارتب بيتي قبل الولادة؟
التعليق باستخدام حساب فيس بوك