بقت فيه كلمة دايمًا تتقال على الستات، لما يتعصبوا أو يزعلوا أو يعملوا أي تصرفات استثنائية، إن دي “هرمونات” وبتتقال على سبيل الهزار أو السخرية. لكن الحقيقة إن الهرمونات فعلًا بتلعب دور مهم جدًا في حياة الست، لدرجة إن أي خلل فيها، ممكن يؤدي لاضطراب الدورة الشهرية والحمل، مش بس المزاج العام. وفي المقال ده، هنقول لك كل ما يخص اضطرابات الهرمونات وعلاقته بالدورة الشهرية والحمل.
-
إيه هي الهرمونات؟
مواد كيميائية بيتم إنتاجها بواسطة الغدد الصماء، تنتقل خلال الدم إلى الأنسجة وأجزاء الجسم المختلفة، لتوصيل الرسائل لأعضاء دي. وبتتمثل أهمية الهرمونات في:
- تنظيم عملية التمثيل الغذائي والشهية.
- تنظيم معدل ضربات القلب.
- تنظيم النوم.
- الحفاظ على الوظائف الجنسية.
- تعزيز النمو وتطور الجسم.
- تنظيم المزاج ومستويات التوتر.
- تنظيم درجات حرارة الجسم.
-
إيه هو اضطراب الهرمونات؟
بيحصل في حالة وجود كمية كبيرة أو قليلة من الهرمونات في مجرى الدم. وبسبب دورهم الهام للجسم، فممكن يتسبب أي اضطراب في الهرمونات في حدوث آثار جانبية ومشاكل في الجسم كله.
-
إيه هي الهرمونات اللي ممكن يحصل لها اضطراب؟
- الأنسولين.
- هرمونات النمو.
- الأدرينالين.
- الإستروجين.
- البروجسترون.
- التستوستيرون.
5 تغيرات هرمونية تحدث لجسم المرأة بعد الزواج
-
إيه هي أعراض اضطرابات الهرمونات؟
بتختلف أعراض اضطراب الهرمونات على حسب الهرمون اللي في خلل، لكن عادة في أعراض مشتركة زي:
- حدوث تغيرات في الدورة الشهرية.
- خسارة الوزن.
- جفاف المهبل.
- وجود ألم أثناء العلاقة الحميمية.
- ظهور حب الشباب.
- زيادة في الوزن.
- الهبات الساخنة.
- التعرق الليلي.
- نمو شعر على الوجه.
- ظهور بقع وعلامات على الجلد.
-
علاقة اضطرابات الهرمونات والدورة الشهرية
بيحصل اضطراب الهرمونات عادة بسبب انقطاع الطمث المبكر أو الوصول لسن اليأس، لكن ممكن يحصل برضه بسبب أسباب طبية تانية، لكن علاقة الهرمونات بالدورة الشهرية بتمشي بالطريقة دي:
- في حالة التعرض لانقطاع الطمث المبكر، بيحصل اضطراب في مستويات الهرمونات نتيجة قلة التبويض، فبيتم إنتاج البروجسترون بصورة أقل، وخاصة خلال النص الثاني من دورة الطمث، وبيترتب على ده عدم انتظام الدورة الشهرية أو غيابها أو غزارتها.
- في حالة سن اليأس، بيتوقف إنتاج الإستروجين من المبيضين، وبيتم صنعه بكميات أقل بواسطة الغدد الكظرية وداخل الأنسجة الدهنية. وبيستمر إنتاج الإستروجين في الجسم، ولكن بكميات أقل، وبيتوقف إنتاج البروجسترون، وبيترتب على ده توقف الدورة الشهرية بشكل كلي.
أعراض اضطراب الهرمونات وتأخر الدورة عادة ما بتيجي الدورة الشهرية كل 21 يوم أو كل 35 يوم. وفي حالة عدم نزول الدورة في الفترة دي أو غيابها في بعض المرات، بيتم وصفها بالدورة الشهرية المتأخرة. وعادة ما يحدث ده نتيجة اضطراب الهرمونات، خاصة الإستروجين والبروجسترون، لإنهم ممكن يتواجدوا في الجسم بكمية قليلة أو كمية مرتفعة جدًا.
-
علاقة اضطراب الهرمونات بالحمل
دور الهرمونات مهم جدًا في الخصوبة والقدرة على الحمل، وده يعني أنه في حالة وجود أي خلل في الهرمونات، ممكن يأثر على نسبة الخصوبة عند السيدة، لإن الهرمونات بتساعد في تنظيم وظائف الجسم، زي الحفاظ على دورة الطمث وإعداد الجسم للحمل وحماية البويضات المخصبة وعملية التبويض. وفي حالة حدوث خلل في عملية واحدة من العمليات الضرورية لحدوث الحمل، هتلاقي صعوبة في الحمل، بالإضافة إن استمرار اضطراب الهرمونات ممكن يؤدي -لا قدر الله- للعقم.
وبنفكرك في حالة إحساسك بأي عرض من أعراض اضطراب الهرمونات، إنك تروحي لطبيب موثوق علشان هو بس اللي هيقدر يشخص، إذا الدورة الشهرية والحمل عندك متأثرين بالهرمونات، وبالتالي يعالج الاضطراب ده، ولا في أسباب طبية تانية يدلك عليها.
مع تمنياتنا ليكي بتمام الصحة والعافية.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك