عمري ما بانسى فسحة في وسط البلد مع بابا وماما كنا بنتمشى في شارع قصر النيل وبناكل آيس كريم، وفجأة لقيت قدامي راجل فارش على الأرض وحاطط جرايد ومجلات. كان منهم مجلة شكلها يجنن وكلها ألوان: المجلة دي كانت ميكي. ساعتها شبطت فيها وأنا كان عندي خمس سنين ومش باعرف اقرأ بس بابا جابها لي برضو. المجلة كانت بالنسبة لي سحر وعالم خاص كنت بقعد قدامه بالساعات. كنت أحاول اقرأ وبالفعل بسببها اتعلمت القراية وكنت باستناها كل أسبوع بفارغ الصبر لحد ما بقت عادة. في الموضوع ده، هاعرّفك ازاي عملت إعادة تدوير المجلات القديمة.
كان يوم الجمعة مقدس بالنسبة لي، نفطر الفول والبيض والطعمية السخنة وصوت النقشبندي عالي في الراديو. وأبويا يروح يصلي الجمعة ويرجع جايب معاه المجلة ملفوفة وسط جورنال الأهرام. يشرب هو قهوته وأنا الشاي والبقسماط ومعايا المجلة في عالمي الخاص. فضلت أجمع في المجلة لحد سن ١٦ سنة تقريبًا. وبعد كده، للأسف الدنيا تلاهي، وظهر الواتساب والفيسبوك بس فضلت محتفظة بأعز ذكريات على قلبي. وذكريات المجلات دي حبيت أحتفظ بيها بدل ما هي مركونة فيه جزء شلته لولادي وجزء شلته لما اشتاق ليها وأقعد أقراها وجزء عملت له إعادة تدوير.
أفكار إعادة تدوير المجلات القديمة
استخدام ورق المجلات القديمة في التجديد
أي مجلات قديمة للأطفال عندك زي مجلات ميكي وسمير وماجد هتكون لطيفة في تجديد صناديق اللعب عند ولادك كل اللي هتعمليه إنك تقصي أشكال من المجلة أو حتى صفحات منها وتلزقيها كويس أوي على الصندوق. ولو عندك أي مجلات قديمة زي الموعد ممكن تستخدميها في تجديد منظمات الدواليب والمكياج أو أي صندوق قديم نفسك تغيري من شكله عندك.
صور شنط جينز يدوية .. أفكار إعادة تدوير الجينز القديم
استخدام ورق المجلات القديمة في تغليف الهدايا
كتير بنحتاج ورق تغليف هدايا والفترة اللي فاتت بقى مكلف جدًا ممكن تستخدمي ورق المجلات القديمة اللي عندك في تغليف الهدايا وهيديها شكل كلاسيك جميل وجديد. ممكن كمان تشتري شنطة هدايا سادة وتلزقي عليها ورق المجلة كنوع من أنواع التجديد.
أعمال يدوية: اعملي ساتر الرضاعة بنفسك بأكثر من شكل
استخدام ورق المجلات القديمة في صنع الزينة
لو عندك مناسبة قريبة ممكن تستخدمي الورق في صنع الزينة، زي الزينة اللي بتتعلق على الحائط بالحبال ممكن تشكلي الورق بالشكل اللي تحبيه أو تعملي ركنة على الحائط بورق المجلات أو ممكن تعملي شكل وردات صغيرة باستخدام ورق المجلات.
أعمال يدوية: طريقة عمل مخدات الكوشن في البيت
التعليق باستخدام حساب فيس بوك