ياما بنقول لولادنا على حاجات بيعملوها غلط ونعلّق على سلوكهم ونعيد ونزيد وبرضه مفيش نتيجة ومش بنلاقي غير إن كتر النقد والتعليق على تصرفاتهم بيبعدنا عن بعض، وممكن يوتر علاقتنا ويأثر عليها بالسلب.
في الطب النفسي، بينصحوا بطريقة إيجابية لما حد يحب يوصل رأيه أو يقول نقد يكون بناء لغيره وسمّوها “تكنيك الساندوتش” واستخدموها علماء التربية في التعامل مع الأطفال عشان تساعدنا في المواقف مع ولادنا إننا نكون حازمين وطيبين في نفس الوقت، يعني نرفض التصرفات الغلط أو تكسير القواعد، بس في نفس الوقت، الطفل ما يحسش إن هو اللي مرفوض، ونقدر ننتقد نقد بناء من غير ما ناثر على ثقتهم في نفسهم ولا علاقتنا بيهم تتوتر.
إيه هو تكنيك الساندوتش؟
تكنيك الساندوتش عبارة عن تغليف النقد أو التعليق على سلوك أو تصرف معين بكلام إيجابي وتشجيعي.
نستخدم تكنيك الساندوتش ازاي مع ولادنا؟
- أول خطوة: لما نيجي نعلق على تصرف، نبدأ أول كلامنا بتشجيع أو بالكلام عن صفة مميزة في الطفل أو نفكره ازاي أتصرف في موقف زي ده قبل كده بطريقة مختلفة، ولازم الكلام يكون محدد وواضح يعني مش نشكر فيه في المجمل كده زي “انت ولد شاطر”، “أنا عارفة إنك أحسن بنت في الدنيا” لكن ممكن تقولي مثلًا: “أنا عارفة إنك مسؤول فاكر لما حافظت على اللعبة بتاعتك وما كسرتهاش” أو “أنا مبسوطة إنك بقيتي منظمة وبتعلقي لبسك مكانه”، يعني يكون شكر أو تشجيع أو كلام بالإيجاب على حاجة محددة.
- الخطوة التانية: بعد ما تكوني بدأتي بطريقة إيجابية، هيكون عقل الطفل في استعداد إنه يسمع ويتقبل الكلام وهي الجزء اللي بنعلق علي سلوك معين أو بنتكلم في تصرف ضايقنا أو كسر للقواعد اللي متفقين عليها، لكننا نستبدل التأنيب والتهديد بجمل زي “إياك تعمل كده تاني” بإننا نساعدهم يدوروا علي حل للموقف اللي حصل وبدايل عشان ما يتكررش، عن طريق إنك تسألي الطفل “كنت بتفكر في إيه وانت بتقول كده وانت عارف إن ده مش مسموح؟” أو “انت عارف إن التصرف ده مش مقبول، كنت حاسس بإيه وانت بتعمل كده؟” أو “طيب ممكن تعمل إيه عشان ما يحصلش كده تاني؟” وكمان توضحي إحساسك اللي سببه لك تصرفه وكنتي تتمني يتكلم معاكي ازاي أو يتصرف ازاي، المهم إن الكلام يكون بطريقة حازمة وواضحة.
- آخر خطوة بعد ما تتكلموا وتتناقشوا وتسمعي رأيه وتتفقوا، تخلصي الكلام مع الطفل بطريقة إيجابية وانتي بتعبري له عن حبك عشان ما يكونش حاسس إنه أحبطك أو إن حبك له هيقل أو يتغير عشان اللي حصل، لإن الطفل طول ما هو حاسس إنه مقبول ومحبوب زي ما هو مهما حصل، ده بيخليه يتصرف أحسن ويزوّد استعداده لتصحيح أخطاؤه بدل الهروب منها.
الموضوع ممكن يبان صعب أو مش مستاهل إننا نفضل نتمرن أو نتعب نفسنا عشان نكلمهم في أخطاؤهم أو نعلق على تصرف منهم، لكن في الحقيقة إن تكنيك الساندوتش ده أثبت فعاليته لسنين مع الأطفال والكبار كمان في تقبل النقد وتقبل أخطاؤهم وزيادة ثقتهم في نفسهم وفي اللي حواليهم.
التعليق باستخدام حساب فيس بوك