أول يوم في رمضان كل سنة وانتم كلكم بجد طيبين، اليوم عدى وحصل وقت الفطار مفاجأة بجد كانت من وجهة نظري جميلة قوي وعجبتني: إعلان فودافون مع شيريهان .. الجمال، الشياكة، الرشاقة والرقي الرائع بجد.
قصة شيريهان في إعلان فودافون
ناس كتير انبهروا بالإعلان بس حاسين إنه مش مفهوم، بس الحقيقة إنه كل كلمة فيه من شكر وعزيمة وقوة وقدرة حقيقة على التحدي كانت بتحكي قصة حياة شريهان، اللي فودافون السنة دي وبقرار عبقري قررت إنها تربط قوتها وتاريخها بقوة وتاريخ أيقونة زي شريهان، فعلى الرغم إن شريهان أيقونتنا من قبل عصر الموبايلات وبكل اللي مرت بيه وهي بحق وحقيقي مافيش مرة طلعت في لقاء تستجدي عاطفة من أي حد، سواء لما مرت بفترة مرض السرطان وبكل بطولة قدرت تقاومه وتظهر لنا بشكلها الجميل زي القمر وزي ما اتعودنا، زي ما يكون الزمن بيجي يقف عندها يلقي عليها التحية من غير ما يقرب منها، ولما مرت بحادث سيارة بشع هي مثلته فعليًا في الإعلان وإن إزاي مرت بتكسير في العمود الفقري وإنها قاومت ورجعت تسحر الارض بخطوات رقصها من تاني.
اقري هنا 5 أسباب لخطورة برنامج رامز جلال على الأطفال
كلمات أغنية الإعلان كلها بتقول إنه مافيش تحدي بنواجهه إلا لو هنعدي منه، زي ما دايمًا كانت فودافون بتقول على مر السنين في إعلانتها.
حقيقي أنا بحب الرمزية الذكية اللي بتتحط في الإعلانات واللي أوقات مش بتكون الشركات موفقة في عمله، بس شابو السنة دي للكريزة الجميلة شريهان اللي نورت لنا رمضان من أول يوم.
شكر شيريهان
شريهان كتبت في صفحتها شكر لكل الناس وحكت عن الرسائل اللي وصلتها، والنهارده يا شريهان بجد بنقول لك شكرك وصل لينا كلنا، وكلنا احنا كمان عايزين نوصل لك شكرنا إن قد إيه فرحتينا لما طليتي علينا بجمالك ورشاقتك وشيكاتك، انتي هتفضلي في نظرنا البهجة في شكل إنسان.
شريهان مع فودافون السنة دي وصلوا لنا إن من حقنا كلنا نحلم ونسعى للوصول لحلمنا وإن حتى لما نتعرض لأي أزمة أو تحدي لازم نقف له وما نخليش للاستسلام معنى في حياتنا، صحيح ممكن نعيش ألم، نعيش إحباط، نعيش حتى دموع من جوه قلبنا، لكن في كل مرة هنرجع تاني أقوى من الأول، زي شريهان اللي قالت لنا كلنا نقدر نكون أسطورة العنقاء ونقوم من رمادنا تاني.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك