محتويات المقال
تمر، سوبيا، كركديه، عرقسوس، خروب، قمر الدين يا سلااام والله ليكم وحشة! ما اعرفش ليه دايمًا ارتبطت المشروبات دي برمضان والفطور مع إنها طول السنة موجودة في أي محل عصير. لكن أول ما بيهل علينا رمضان، أكيد هتلاقي نوع واحد على الأقل من العصاير الرمضانية دي في تلاجة أي بيت مصري. بحب جدًا السوبيا ونكهة جوز الهند مع الحليب الغنية، وبحب كمان المزازة في التمر هندي والكركديه، أما الخروب فنكهته اللي شبه نكهة الكراميل وجمال لونه وحلاوة طعمه، والعرقسوس مليان فوايد وبيروي العطش، وأخيرًا قمر الدين وخلاصة طعم المشمش في كوباية عصير. ستات كتير بتشوف إن أسهل ليها إنها تشتري المشروبات دي جاهزة عشان تهرب من مجهود عمايلها، بس الحقيقة المشروبات الرمضانية البيتي طعمها أحلى وأضمن وتقدري تتحكمي في تركيزها وفي نسبة السكر فيها، وما بتاخدش وقت زي ما كتير فاكرين. عشان كده، النهارده هنخليكي محترفة في عصاير رمضان وتقدري تعمليها أحلى وأضمن من المحلات.
الكركديه (أو زي ما بيسموه في محلات العصير العناب)
مشروبات رمضانية – المصدر mexicanplease
المقادير
- 1 كوب بتلات الكركديه
- 1 كوب سكر (السكر حسب الرغبة ممكن أكتر أو أقل)
- 1 لتر مياه
الطريقة الأولى
- دوبي السكر مع المياه في حرارة الغرفة وضيفي بتلات الكركديه وسيبي المزيج يتنقع على الأقل 3 ساعات.
- صفيه وبرديه في التلاجة وقدميه مع مكعبات التلج.
الطريقة التانية
- اغلي المياه مع بتلات الكركديه على تار هادية وبعدين ضيفي كمية السكر المناسبة لذوقك وسيبيه يبرد تمامًا قبل ما تصفيه وتبرديه في التلاجة.
- تقدري تضيفي له كمية بسيطة من ماء الورد اللي بيليق جدًا مع نكهة الكركديه.
التمر هندي
مشروبات رمضانية – المصدر thepioneerwoman
التمر هندي من المشروبات الصحية جدًا وله كميه فوايد خرافية، ودي بعض فوايد التمر هندي:
- مليان بمضادات الأكسدة والبوتاسيوم اللي بدوره بيساعد على الحماية من أمراض القلب وتصلب الشرايين.
- غني جدًا بالماغنيسيوم اللي بيساعد بشكل كبير في تحسين اضطرابات النوم والأرق وبيحسّن عملية التمثيل الغذائي.
- بيساعد على إنقاص الوزن.
- مفيد جدًا لتنظيم ضغط الدم لإن نسبة الصوديوم فيه قليلة جدًا.
- يعتبر ملين طبيعي.
- مفيد جدًا لصحة الإبصار والعيون.
- مفيد لمرضى السكر (طبعًا هيشربوه من غير إضافة سكر أبيض).
مقادير عمل مشروب التمر هندي
- 300 جم تمر هندي مجفف
- 2 لتر ماء
- سكر حسب الرغبة (1-2 كوب سكر)
طريقة عمل التمر هندي
- ارفعي على النار التمر هندي مع المياه وأهم حاجة المياه تغطي التمر هندي تمامًا.
- اغليهم على نار متوسطة لحد ما يدوب التمر هندي تمامًا ويتجانس مع المياه.
- ارفعيهم من على النار وصفّي المزيج بمصفاة ضيقة عشان يكون المشروب صافي تمامًا.
- دوّبي السكر حسب رغبتك في المزيج وهو لسه سخن.
- برديه في التلاجة وقدميه مع مكعبات التلج.
السوبيا
مشروبات رمضانية – المصدر pinterest
من أحب المشروبات الرمضانية المصرية لقلبي، وأكيد كل عشاق نكهة جوز الهند بيموتوا فيها. السوبيا لها طرق كتير جدًا ودي واحدة من أبسط الطرق لعمايلها وطعمها خرافي. بودرة السوبيا الجاهزة سهلت علينا كتير، وكمان بتكون محلاة، فالمشروب كله بيتعمل على البارد وإضافة جوز الهند ولبن جوز الهند لمكونات السوبيا هتعزز الطعم وتزود القيمة الغذائية. بس خلوا بالكم ما تشربوش من مشروب السوبيا كتير لإن سعراته الحرارية عالية.
المقادير
- 5 معالق كبيرة من بودرة السوبيا
- 1/2 لتر من اللبن
- 1/2 لتر من لبن جوز الهند
- 1/2 كوب ماء بارد جدًا
- 1/4 كوب جوز هند مبشور
- معلقة صغيرة بودرة الفانيليا
طريقة عمل السوبيا
- في الخلاط، اخلطي كل المكونات مع بعض واضربيها كويس.
- برديها في التلاجة وقدميها مع مكعبات التلج.
- تقدري تتحكمي في قوام السوبيا براحتك وتخففيها بقليل من المياه المتلجة لمشروب أخف.
الخروب
مشروبات رمضانية – المصدر tasteofbeirut
مشروب رمضاني صحي جدًا. لو انتم من هواة أكل قرون الخروب اللي بنشتريها من المقلة زي حالاتي، هتعرفوا قد إيه إنه مليان سكر طبيعي، ربنا خلقه مسكر. تصدقوا كمان إن بودرة الخروب المطحونة ناعم جدًا بتستخدم كبديل للكاكاو الخام في الكيكات والحلويات ومصدر طبيعي للسكر في تحلية أكلات ومشروبات كتير. احنا هنا في مصر بنشربه كعصير رمضاني ساقع ومنعش ولا أحلى من كده ياللا نشوف طريقته اللي بتخليه زي المحلات وأحلى.
مقادير مشروب الخروب
- 4 معالق كبيرة سكر لعمل الكراميل
- 2 لتر ماء
- 2 كوب خروب مجروش مغسول تحت ماء جاري ومصفى
- سكر حسب الرغبة
طريقة عمل مشروب الخروب
- في حلة على نار متوسطة، ضيفي السكر لعمل الكراميل وسيبيه يذوب تمامًا من غير ما تقلبيه.
- أول ما السكر يدوب ويبدأ لونه يكون زي الكراميل الغامق، ضيفي المياه وقلبي كويس والخطوة دي هي اللي هتدي نكهة ولون الكراميل للخروب.
- ضيفي الخروب المجروش وسيبي المزيج يغلي على نار متوسطة لمدة نص ساعة على الأقل.
- ضيفي السكر للتحلية حسب الرغبة ودوبي كويس في المزيج وهو لسه سخن.
- صفي العصير وبرديه في التلاجة.
- قدميه مع مكعبات التلج.
عصير قمر الدين
مشروبات رمضانية – المصدر pinterest
لفائف قمر الدين اللي ما بتظهرش في الأسواق غير قبل رمضان مصنوعة من خلاصة المشمش، وده تقريبًا العصير الرمضاني الوحيد اللي معمول من خلاصة نوع من أنواع الفواكه، وبيقال إن سبب تسميته بيرجع لاسم حاكم في بلاد الشام كان بيحب المشمش اسمة قمر الدين. فوايده كتير جدًا بس خلي بالك إنه من المشروبات العالية في سعراتها الحرارية. من فوايد القمر الدين:
- يعتبر قمر الدين مصدر رائع لمضادات الأكسدة والكاروتينات اللي بتعزز مناعة الجسم.
- مصدر للحديد عشان كده بيقي من الأنيميا.
- مصدر عالي للبوتاسيوم عشان كده مهم لصحة القلب وتنظيم ضغط الدم.
- غني بفيتامين A المعروف بأهميته لصحة البشرة والوقاية من علامات تقدم السن.
- الوقاية من هشاشة العظام.
مقادير عصير قمر الدين
- لفة قمر الدين
- واحد و1/2 لتر ماء
- 1 معلقة صغيرة بودرة فانيليا
- سكر حسب الرغبة
طريقة عمل مشروب قمر الدين
- قطعي لفائف قمر الدين مكعبات صغيرة عشان تسهلي تذويبه في المياه.
- ارفعي قمر الدين على النار مع المياه وحركي بشكل مستمر لحد ما يذوب كل قمر الدين.
- ضيفي السكر والفانيليا وذوبيهم كويس.
- لضمان نعومة العصير، اضربيه في الخلاط بعد ما يبرد شوية ويكون فاتر.
- تقدري تضيفي ماء الورد أو ماء الزهر حسب الرغبة.
وبكده نقدري تعملي مشروباتك الرمضانية في البيت بتكلفة أقل وطعم أحلى وتقدري تتحكمي في تركيز العصاير براحتك وكمان كمية السكر اللي هتحلي بيها، جربيهم ويسعدنا دايمًا تشاركينا النتايج.
التعليق باستخدام حساب فيس بوك