محتويات المقال
“أدي الربيع عاد من تاني”. كل بيت، بيكون فيه سبراي معطر جو بنشتريه كل فترة. لكن في الفترة الأخيرة، انتشر إتجاه عام للبعد عن الكيماويات والاتجاه ناحية المنتجات الطبيعية والمصنعة منزليًا للحفاظ على البيئة وعلى الصحة العامة. وخصوصًا إن بطيبعة الحال في بلدنا انتشار الأتربة سريع وبيدخل البيوت. فبتكون كل ست عايزة تستمتع برائحة بيت حلوة ومنعشة، وفي نفس الوقت، من غير أي أضرار جانبية. علشان كده، جبت لك مجموعة طرق لعمل سبراي معطر للجو من البيت. جربتها وكانت ناجحة، جربيها وقولى لنا أنهي طريقة عجبتك.
مكونات سبراي معطر جو
أما تحبي تعملي سبراي، هتحتاجي شوية أدوات أساسية في كل مرة هتعملي سبراي خاص بيكي، وهي:
- إزازة بخاخة
- قمع صغير
- مياه
- معلقتين كحول
- زيت عطري
العناصر دي لازم تكوني مجهزاها وتكون متوفرة معاكي أول ما تقرري تعملي السبراي بتاعك. ولو جه في بالك إيه لازمة استخدام الكحول في المكونات؟ فالكحول له قدرة على مزج المياه بالزيت العطري علشان بطبيعة الحال الزيت والمياه مفيش أي اختلاط بينهم، ومن غير كحول، كفاءة السبراي بتاعك هتقل كتير. تعالي أقول لك على أفضل معطرات الجو المنزلية اللي سهل تعمليها.
معطر بالبرتقال والورد
الخليط ده من الروائح: البرتقال والورد ليها ميزة حلوة جدًا. بتدي دايمًا إحساس بالنعومة والأنوثة. وفي نفس الوقت، الرومانسية من الورد والنشاط من البرتقال. ولو في أي وقت حسيتي إنك محتاجة دفعة نشاط، السبراي ده هيساعدك جدًا.
هتحتاجي:
- 1 كوب من المياه
- معلقتين كبار من الكحول
- 7 نقاط من زيت البرتقال
- 7 نقاط من زيت الورد
معطر خشب الصندل
رائحة خشب الصندل مع شجرة الشاي والليمون المنعش دايمًا بيدي انطباع رجولي للمكان اللي بتظهر فيه الرائحة. علشان كدة الخليط ده من الروائح مع بعض هيعتبر اختيار موفق جدًا لغرفة مكتب زوجك أو حتى دولاب ملابسه.
هتحتاجي:
- 1 كوب من الميا
- معلقتين كبار من الكحول
- 5 نقاط من زيت خشب الصندل
- 5 نقاط من زيت شجرة الشاي
- 5 نقاط من زيت الليمون
هتلاقي هنا 6 منتجات لتنظيف وتطهير البيت
معطر اللافندر والبابونج/كاموميل
بتتميز رائحة اللافندر مع الكاموميل إنهم من الروائح المهدئة جدًا. علشان كده، لما تعملي سبراي مكون منهم هما الاتنين، هتكوني جهزتي لنفسك واحدة من أفضل طرق الاسترخاء خصوصًا بعد يوم مرهق ومتعب ليكي. مجرد ما الرائحة دي تنتشر في أوضتك هتساعدك على التخلص من التوتر وتفصلي تمامًا.
هتحتاجي
- 1 كوب من المياه.
- معلقتين كبار من الكحول
- 10 نقاط من زيت اللافندر
- 5 نقاط من زيت الكاموميل
معطر الجريب فروت مع اليوسفي والليمون
روائح الحمضيات دايمًا مرتبطة بالنشاط. فما بالك لو عندك سبراي مكون من الجريب فروت مع اليوسفي والليمون؟ السبراي ده معمول في الأساس للصبح. لو في يوم لاقيتي نفسك صاحية من النوم وإحساسك بالنشاط قليل، استخدميه وهتلاقي نفسك استعدتي نشاطك تمامًا.
هتحتاجي
- 1 كوب من المياه
- معلقتين كبار من الكحول
- 3 نقاط من زيت الجريب فروت
- 3 نقاط من زيت اليوسفي
- 3 نقاط من زيت الليمون
التعليق باستخدام حساب فيس بوك