محتويات المقال
بشرتنا بتعاني دايمًا مع الجو الحاد سواء في الشتاء أو الصيف. وأوقات إهمالنا في ترطيبها بيساعد على تفاقم مشكلات جلدية شديدة قد تحتاج لتدخل طبي. علشان كده، هنتكلم عن أهمية الترطيب لبشرتك وإزاي بمكونات سهلة جدًا تقدري تعملي سبراي مرطب للجسم تخليه دايمًا جزء أساسي من روتين العناية ببشرتك.
كتير مننا بيوقع في غلط الاهتمام ببشرة الوجه، وبينسوا بشرة الجسم، واللي هي كمان بتحتاج رعاية كبيرة. بس تعالي أقول لك معلومة مهمة: ترطيب الجسم مش بيتم عن طريق إنك تحطي لوشن أو كريم ترطيب، لأن في الحقيقة فيه طريقة صحيحة وطريقة غلط للترطيب. عمرك سألتي نفسك ليه مرطبات الجسم بتيجي في شكل لوشن أو كريم تقيل؟
هنا هتلاقي نصايح أكتر للعناية بالبشرة
الفرق بين اللوشن وكريمات الترطيب
الحقيقة كل واحد فيهم له طبيعة عمل مختلفة. اللوشن دايمًا بييجي في صورة كريم شبه سائل خفيف سريع الامتصاص وبيكون جزء أساسي في تكوينها الجلسرين والعسل وحتى المياه علشان يعزز وجودها في طبقات الجلد. والنوع ده دايمًا أفضل وقت لاستخدامه بيكون بعد الاستحمام الدافئ وجلد الجسم مكتسب ليونة وقدرة امتصاص. لكن مرطبات الجسم اللي بتيجي في شكل كريم تقيل مكونها الأساسي بيكون الزيوت وحتى زبدة الزيوت النباتية.
بتيجي دايمًا في شكل سميك مش بتمتصه البشرة بالكامل، لأن دوره إنه يعمل عزل ما بين بشرتك وما بين العوامل الجوية اللي حواليكي علشان يقدر يحافظ على وجود المياه في جلدك، وده دايمًا بيستخدم لما تكوني معرضة لجو جاف جدًا سواء حر أو برد.
دلوقتي فهمنا إزاي بيشتغل مرطب الجسم. ولأننا بندعم جدًا استخدام المستحضرات الطبيعية الخالية من الكيماويات والمواد الحافظة اللي فعلًا ضررها أكبر بكتير من مميزاتها، جبنا لك طريقة سهلة أوي لعمل سبراي مرطب للجسم تقدري تستخدميه بكل سهولة في أي مكان وهو مرطب ماء الورد.
مكونات مرطب ماء الورد
تقدري تستخدمي المرطب ده على جسمك ووجهك وحتى شعرك. دي مكوناته:
- ماء الورد: ريحته رقيقة ومنعشة، وبمجرد ما تيجي ريحته عليكي، بتحسي بنفس الانتعاش اللي بتحسيه لما تمسكي بوكيه ورد. غير إن أصلًا ماء الورد له فوائد صحية للبشرة كتيرة زي إنه بيحافظ على درجة حموضة صحية للبشرة، بيقلل الالتهاب، ومادة قابضة للمسام ودايمًا بيدي البشرة مظهر صحي متألق.
- الزيوت: الزيوت المعصورة على البارد بمعنى إنه تم استخراج الزيت منها بشكل طبيعي بعيد عن الحرارة والمواد الصناعية بيكون لها قدرة ترطيبية، غير فوائدها اللي بتوصل لدرجة القدرة على إعادة هيكل الجلد واستعادة شكله الصحي من جديد. وممكن تستبدلي الزيوت بالجلسرين اللي معروف بقدرته على جذب الرطوبة من الجو المحيط بيكي والحفاظ عليها جوه بشرتك. بنرشح لك زيت الزيتون واللوز والأرجان لجميع أنواع البشرة، زيت المكاديميا للبشرة الجافة، زيت الجوجوبا للبشرة الدهنية. ولو عمرك فوق الأربعين، فبشرتك بتحتاج نوع معين من الترطيب تقدري تلاقيه مع زيت بذور الورد.
تعالي دلوقتي شوفي هتعملي السبراي بتاعك إزاي.
المكونات
- 1\2 كوباية ماء ورد
- 2-3 من أي زيت من اختيارك أو جلسرين
- إزازة سبراي صغيرة
اخلطيهم ببعض ورجيهم كويس. هتلاقي نفسك معاكي السبراي بتاعك الجاهز للاستخدام في أي وقت تحبيه. أتمنى تجربيه. المكونات سهل تلاقيها عند أي عطار أو حتى صيدلية. ما تبخليش على نفسك بالاهتمام.
التعليق باستخدام حساب فيس بوك