محتويات المقال
مع تقلب الجو والبرد الجامد الأيام دي بيبقى صعب إننا نخرج ولادنا كل يوم فبنحاول ندور على أي طريقة تسليهم في البيت.. عشان كده إحنا جبنالك أفكار عشان تحولي الكراتين أو الصناديق الورقية الفاضية وحتى علب الجزم لألعاب مسلية تعمليها مع ولادك وهيتسلوا جدًا وهما بيعملوها بايدهم وكمان هيفرحوا إنهم عملوا لعبة بنفسهم.
ميني جولف
الأدوات اللي هتحتاجيها
- كرتونة فاضية
- سيلوتيب ملون
- قلم ماركر
- كاتر
هتجيبي كرتونة فاضية وهتقطّعي فيها زي الصورة، مكان على قد كورة الجولف الصغيرة وتحدديهم بالسيلوتيب الملون وتكتبي الأرقام فوق كل خانة منهم.. اللعبة قوانينها سهلة أوي وكمان هتساعد الولاد إنهم يتعلموا الحساب عشان كل مرة هيدخلوا الكورة في خانة منهم هيكسبوا نقط والفايز هو اللي هيجمع أكبر عدد من النقط.
مطبخ صغير
الأدوات اللي هتحتاجيها
- مسدس شمع أو لاصق قوي
- كرتونة حجمها كبير
- طبق بلاستيك لعبة
- سيلوتيب ملون
- غطا بلاستيك
- كاتر
هتقصي الكرتونة من النص على شكل الفرن وتقصي الكرتونة من فوق دواير صغيرة عشان تكون شبه عيون البوتجاز، هتجيبي كرتونة فاضية عشان تلزقيها من فوق جمب عيون البوتجاز عشان تبقى شبه غطا البوتجاز وبعدين هتجيبي الغطا البلاستيك المدور وتلزقيه عشان يكون عيون البوتجاز وممكن كمان تعملي الشكل التاني زي الصورة عشان يكون جزء الحوض.. ممكن تستخدمي الفويل أو أطباق لونها فضي من مطبخك عشان يكونوا دول عيون البوتجاز وممكن تدي ابنك أو بنتك حلة صغيرة حقيقية عشان يتبسطوا أكتر وهما بيلعبوا.
برواز صغير
الأدوات اللي هتحتاجيها
- مسدس شمع أو لاصق قوي
- لعب صغيرة للزينة
- ألوان
- ورق
هتقصي للولاد الكرتونة على شكل برواز صغير وتفرغيه بالكاتر من النص وتديهم ورق وألوان وتخليهم يرسموا أي رسمة يحبوها عشان يحطوها بنفسهم في البرواز، وبالنسبة للبرواز نفسه خليهم يلونوه وكمان يزينوه بألعاب صغيرة تتلزق عليه.. اللعبة هتشجعهم إنهم يزينوا أوضتهم وكمان يتعلموا الرسم والألوان.
لعبة إصابة الهدف
الأدوات اللي هتحتاجيها
- كرتون ورق مطبخ
- مسدس شمع أو لاصق قوي
- كور صغيرة
- قلم ماركر
هتلزقي على سطح الكرتونة من كرتون ورق المطبخ وتكتبي عليه الأرقام، هتخلي ولادك يحاولوا ينشنوا على الكورة بكورة كبيرة مثلًا والفايز اللي هيوقع أكبر عدد من الكور ويكسب نقاط.
جراج للعربيات
الأدوات اللي هتحتاجيها
- سبراي ألوان
- قلم ماركر
- كاتر
هتلوني الكرتونة باللون اللي ابنك أو بنتك بيحبوه وتقصي بالكاتر فتحات في الكرتونة عشان تعدي منها العربيات وترسمي بالماركر مكان لكل عربية، لو حابة تعملي دور تاني ومسار للعربيات هتقصي بالكاتر حتة من الكرتونة عشان تكون الدور التاني وتوقفيها على كرتونة بكر مطبخ وتلزقيها وتعملي المسار بكرتونة صغيرة.
طبعًا كل أفكار اللعب دي لازم ولادك يعملوها معاكي وتحت إشرافك ولو سنهم صغير يفضل إن إنتي اللي تستخدمي الأدوات اللي ممكن تشكل خطر عليهم زي الكاتر ومسدس الشمع، بنتمنى ليكم أجازة سعيدة.
التعليق باستخدام حساب فيس بوك