محتويات المقال
فيه دراسة عملتها بنفسيا النهارده الصبح بتقول إن الأمهات بيشتروا بماكسيمان 500 ألف جنيه لعب ودباديب لولادهم وفي الآخر بيسيبوهم ويلعبوا في الشبشب أو فيش الكهربا أو شراشيب السجادة، حد يقدر ينكر الدراسة دي D: ؟؟ ما هو العالم الموازي بتاع Pinterest ده هو اللي بوظ طموحاتنا وتطلعاتنا والله بنلاقي العيال أم خدود دي ماسكين اللعبة وقاعدين في بيت الكور وبيسمعوا أغاني أطفال وساكتين، إنما عيالنا أحنا مينفعش معاهم الكلام ده خاااااالص وفري على نفسك الفلوس اللي هتدفعيها واشتري الحاجات اللي هقولك عليها دي عشان تعملي بنفسك في البيت الـBusy Board عشان تخلي ولادك يلعبوا بأي حاجة إلا لعبهم وضميرك مرتاح.
الأدوات اللي هتحتاجيها عشان تعملي Busy Board آمنة لطفلك
- لوح خشب أو لوح تخزين (Storage Board).
- لاصق قوي.
- علاقات.
- دهان.
- شنيور.
- أي حاجة تحبي تعلقيها لابنك أو بنتك تكون بتلفت إنتباهه.
الطريقة:
- ممكن تجيبي اللوح الخشب وتدهنيه بلون يجذب الإنتباه زي الأحمر أو الأصفر وتستني لحد ما ينشف وريحته تروح عشان ميسببش حساسية.
- هتستعيني بجوزك عشان يعلقلك على اللوح الخشب الحاجات اللي كل الولاد بيجروا عليها زي الترباس أو مقابض الأبواب وتخليه يركبه بطريقة صحيحة عشان تضمني إن ابنك أو بنتك متفكوش نهائي.
- ممكن بدل ما تجيبي شنيور تلزقي الحاجة بلاصق قوي أو بمسدس شمع بس تضمني إنه مش هيتخلع من مكانه وميكونش خطر.
- ممكن كمان تجيبي الـStorage Board وممكن تلاقيه في المكتبات أو أيكيا وتعلقي عليه الحاجة بعلاقات بلاستيك قوية.
أفكار للـBusy Board لأقل من سن سنة
السن ده بيحب الإكتشاف والحاجات الحسية اللي بتعتمد على اللمس فممكن تحطي فيها مراية صغيرة، قماش خشن، زراير ملونة للفت إنتباهه بس تلزقيها كويس جدًا، سماعة تلفون وغيرهم كتير من الحاجات اللي ممكن تجذب إنتباه الطفل في السن ده.
مصدر الصورة: The Home Depot Blog
مصدر الصورة: Pinterest
مصدر الصورة: Pinterest
أفكار للـBusy Board لفوق سن سنة
وده السن اللي بيكون الطفل فيه ابتدى يعتمد على نفسه ويمشي، فممكن تعلقيهاله في مكان واضح عشان تشد إنتباهه. ومن ضمن الأفكار اللي ممكن تحطيها عليها سوستة عشان يتعلم يقفلها ويفتحها لوحده، مفتاح كهربا، عجلة، آلة حاسبة قديمة.
مصدر الصورة: Pinterest
مصدر الصورة: etsy
مصدر الصورة: Pnterest
ودي كانت أفكار بسيطة عشان تعملي بيها الBusy Board بأقل التكاليف في البيت، بس بنفكرك تاني إن اللعبة دي ممكن تبقى خطر لو ابنك عرف يفك أي جزء منها فراعي دايمًا إن الحاجة تكون ملزوقة كويس.
التعليق باستخدام حساب فيس بوك