بعض الدراسات بتقول إن من 50% لـ75% من الأمهات الجداد بتصيبهم درجة من درجات اكتئاب ما بعد الولادة أو Postpartum depression. اكتئاب ما بعد الولادة هو اضطراب مزاجي حاد بيؤثر على بعض الأمهات بعد الولادة. الاضطراب دا بيسبب إحساس بالحزن والتوتر والاكتئاب والإرهاق الشديد وغالبًا بيعوق قدرة الأم إنها تراعي الرضيع.
في المقالة دي هنكلمك عن أشهر أعراض اكتئاب ما بعد الولادة.
قبل ما نتكلم عن أعراض اكتئاب ما بعد الولادة، خلينا نتكلم عن الأسباب اللي بتخلي بعض الأمهات يصابوا باكتئاب ما بعد الولادة. السبب الرئيسي وراء اكتئاب ما بعد الولادة هو تغير الهرمونات الشديد. زي ما الدورة وتغييرها الهرمونات بتؤثر على حالة الست المزاجية، الحمل بيؤثر بشكل أكبر بكتير. كمان تغير شكل الجسم في الحمل وبعد الولادة ممكن يسبب اكتئاب ما بعد الولادة.
أعراض اكتئاب ما بعد الولادة:
الأعراض بتختلف في شدتها وقوتها من أم لأم ومن حمل لحمل. لكن عامةَ بتكون:
- حالة مزاجية (موود) وحش وميل شديد للبكا والانفعالات الحادة.
- الأرق لمدة طويلة.
- إحساس بانعدام القيمة أو الكسوف أو الذنب أو العجز.
- التفكير بشكل سلبي طول الوقت.
- اضطراب في الذاكرة وصعوبة في التركيز وفي اتخاذ القرار.
- فقدان الشهية أو الأكل زيادة.
- إنك ما تبقيش عايزة تعملي أي حاجة. أو تبقي عايزة تفضلي مشغولة بحاجات كتير طول الوقت.
- نوبات قلق أو نوبات هلع panic attacks.
- القلق على الطفل بشكل مبالغ فيه وإنك تجري به على المستشفى كتير.
- في بعض الحالات، لما بيبقى الاكتئاب شديد، ممكن تيجي أفكار انتحارية.
الأعراض دي ممكن تظهر في أول أسابيع من الولادة، وممكن في خلال الحمل، وممكن برضه في أول سنة عمومًا حتى لو ما بدأتش بدري. مهما كانت درجة شدة الأعراض أو الوقت اللي بتظهر فيه، لازم تكوني عارفاها ومحضرة نفسك للتعامل معاها. ومفيش أي حرج أو عيب إنك تروحي لدكتور متخصص وإنك تاخدي مضاد اكتئاب، لكن اطلبي من الدكتور يوصف لك علاج ينفع لو انتِ قررتي ترضعي طبيعي.
التعليق باستخدام حساب فيس بوك