مفيش شك إن إدمان الزوج للمخدرات من الحاجات اللي بتدمر الحياة الزوجية، وخصوصًا لو فيه أولاد، وإدمان الزوج مش بيأثر عليه هو لوحده، لكن على الأسرة كلها في كل النواحي الاجتماعية والنفسية والمادية والدينية. والتعامل مع المشكلة دي محتاج حكمة كبيرة جدًا من الزوجة، وما ينفعش التعامل مع الزوج بالصويت والصراخ والتأنيب، لإن ده هيفاقم الحالة مش هيصلحها. وفي المقال ده، هنقول لك لكل زوجة بعته تقولنا ” جوزي مدمن” -لا قدر الله- اكتشفتي إن جوزك مدمن، تحلي المشكلة دي ازاي.
-
أعرف ازاي إن جوزي مدمن مخدرات؟
مهم جدًا تتأكدي إن جوزك مدمن بالفعل، مش مجرد شكوك عندك، أو علشان فيه أي تغييرات في حياته يبقى كده مدمن. لكن فيه علامات لو اجتمعت مع بعضها هتعرفي منها إن جوزك مدمن:
- قضاء وقت كتير خارج البيت بدون الزوجة.
- التصرفات اللاعقلانية، زي السواقة المتهورة.
- كترة المشكلات المادية وتراكم الديون بصورة كبيرة.
- القيام ببعض السلوكيات العدوانية أحيانًا تجاه الزوجة أو الأبناء.
- الانفصال عن مشاكل الأسرة وعدم الاهتمام بيها.
- عدم القدرة على الاستمرار في العمل وحدوث كتير من المشكلات المهنية، واللي ممكن توصل إنه يسيب الشغل.
- ظهور العديد من الأعراض الجسدية.
- اضطراب الحالة النفسية وتقلبات المزاج.
- وجود علامات التعاطي زي علامات الحقن الوريدي على الدراع والايد في بعض الأحيان، أو علامات تورم حول الأنف واحمرار العينين وغيرها.
مهم جداً تعرفي للأباء: 10 عادات مع ابنك لازم تغيرهم
-
أعمل إيه لما أتأكد إن جوزي مدمن؟
هتسمعي أول نصيحة من المقربين ليكي: اتطلقي وسيبيه. لكن الحقيقة إن ده مش حل، وخصوصًا مع وجود أولاد، لإنه هيفضل أبوهم. فهو محتاج يتعالج برضه علشان يمارس دور الأب، مش بس الزوج. علشان كده، هنقول لك على خطوات واقعية تعمليها في مواجهة الموقف ده:
- استوعبي المشكلة وما تنكريهاش، علشان تقدري تلاقي حل حقيقي.
- مش لازم تتكلمي مع الناس اللي مش هيساعدوكي، لإنهم هيكونوا عامل ضغط عليكي وعلى أولادك.
- اقبلي حالتك النفسية والضغوط اللي بتمري بيها.
- اعرفي نوع المخدرات اللي جوزك بيتعاطاها، هل هو حشيش ولا أنواع تانية.
- تجنبي تمامًا الصويت والصراخ في جوزك، لإن ده هيفاقم حالته أكتر. وفي نفس الوقت، ممكن يعمل ردة فعل تجاهك ما تكونش محسوبة العواقب، فحاولي تهدي على قد ما تقدري.
- دوري على مصحات علاج إدمان المخدرات اللي هو مدمن عليها.
- اتكلمي مع دكتور مختص قبل ما تواجهي جوزك.
- اقنعي جوزك بالعلاج، ودي أكيد مش حاجة سهلة، لكن هتنفع بالهدوء والكلام العاطفي والتودد له.
-
هل جوزي هيرجع طبيعي بعد التعافي من الإدمان؟
- أكيد فيه تغيرات سلوكية هتحصل بعد التعافي، ودي لازم تكوني فاهماها ومتقبلاها.
- مهم جدًا متابعة الطبيب باستمرار وبصفة دورية بعد الشفاء.
- فيه مشاكل اجتماعية ومادية حصلت في الأسرة بسبب الإدمان، هتاخد وقت على ما ترجع تاني. لكن المهم إن الزوج تعافى، وباقي المشاكل هتتحل مع الوقت.
- ساعدي جوزك على تخطي المرحلة دي، وما تفكريهوش طول الوقت بإدمانه.
-
هل أطلب الطلاق من جوزي المدمن؟
القرار ده بتاعك انتي لوحدك، بس علشان تاخديه على أسس صحيحة، لازم تتكلمي مع طبيب الإدمان، ومع الخبير النفسي، ومع مستشار علاقات زوجية. وعلى أساس اللي هيقولوه ليكي، فكّري كويس وبعدين خدي القرار المناسب.
وإذا -لا قدر الله- اتعرضتي للمشكلة دي، مهم جدًا تعرفي إنها ابتلاء من ربنا، زي أي مصيبة بتحصل لنا في حياتنا، فلازم تستعيني بربنا وتدعي طول الوقت بالفرج، وربنا هيساعدك ومش هيسيبك أبدًا.
التعليق باستخدام حساب فيس بوك