محتويات المقال
الأبراج من الحاجات المفهومة غلط في مجتمعاتنا العربية بشكل كبير. أنا مش باتعامل مع الأبراج كحاجة تقدر تقول لك إيه اللي هيحصل في المستقبل. لكن ممكن من خلالها نعرف الخطوط العريضة لصفات الناس اللي قدامنا. تعالوا نستعرض صفات الأبراج عند الآباء.
صفات الأبراج عند الآباء
صفات أب برج الحمل
الأب من برج الحمل مليان طموح وأمل في المستقبل. وعنده جرأة شخصية وحماس تخليه يقاتل علشان ينفذ أهدافه في الحياة. بالتالي بيبقى متوقع نفس التصرفات دي من أولاده. وبيكون واقف في ضهرهم علشان يساعدهم لو وقعوا أثناء رحلة الحياة.
ممكن ده يتفسر أحيانًا أنه نوع من التسلط أو الرغبة في الكمال. وده بيزود شعوره صفة النرجسية اللي بتكون موجودة ولو بنسبة قليلة في مواليد برج الحمل. لكن في الأصل، الأب من برج الحمل بيكون عاوز الأفضل لأولاده من وجهة نظره. وعنده القدرة أنه ينفذ اللي شايفه صح من وجهة نظره كمان.
صفات أب برج الثور
لو أب برج الثور عنده بنت. هيكون أحسن صديق لها. لأنه بطبعه مستمع جيد وحلال مشاكل من الدرجة الأولى. مش بس كده، أب برج الثور بيلتمس الأعذار بشكل كبير، ومش بيزعل بسرعة. لكن في المقابل، هو مصمم على تحقيق أهدافه – أو أهداف ولاده – وممكن يكون عنيد لو الظروف الصعبة واجهتهم.
ولاد الأب برج الثور ممكن يحسوا إنه متسلط شوية، لكن التسلط ده منبعه الحب والرغبة في الإنجاز، مش تسلط بداعي الأنانية أو التكبر.
صفات أب برج الجوزاء
زي ما قلنا إن البنت هتحب أبوها يكون ثور. الولد هايحب أبوه يكون جوزاء. لأن أب الجوزاء بطبعه هيشجع ولاده على البحث والاستكشاف والمغامرة. كل ده وسط جو من الطيبة والحنية وحب الفرفشة وعدم الرغبة في الوقوع في مشاكل لفترة طويلة.
يعني الابن لو زعل أبوه الجوزاء، هيكون سهل عليه يصالحه، لكن لازم يتعامل مع شوية عصبية وقلق وتقلبات مزاجية تعتبر من السمات الأساسية لكل مواليد برج الجوزاء.
صفات أب برج السرطان
أب برج السرطان ممكن يبان من بعيد إنه مزاجي أو كل ساعة بحال. لكن في الحقيقة، هو بيربي أولاده على عدم التدخل في شئون الآخرين، ومش هيرفض أبدًا الخروج معهم في نزهة أسرية، لأنه بطبعه مقدس للأسرة وعنده تحمل مسؤولية.
ولما يبني رجل السرطان علاقة مع أولاده أساسها الثقة والحب، بيكون أفضل أب في الدنيا، لأنه بطبعه مش بيقدر يدخل في علاقات بدون مستويات عالية من الشعور بالأمان والثقة.
صفات أب برج الأسد
الأب في برج الأسد قريب من اسمه. ملك الغابة اللي عاوز يبقى عارف كل كبيرة وصغيرة في البيت. وعاوز طول الوقت يشعر إن أولاده قدام عينه. ده ممكن يضايق الأولاد شوية، خاصةً في سن الشباب والمراهقة. لكن في نفس الوقت، الأب برج الأسد عنده روح تحدي جميلة تخليه ياخد أعقد مشاكل الدنيا بروح من التحدي اللي هتخليه يخرج منها – هو وأولاده – بسلام وبدون ما يحسسهم بالمشكلة، لأن عنده إحساس عالي بالمسؤولية.
صفات أب برج العذراء
لو أبوك برج العذراء، يبقى أنت في طريقك إنك تكون بيزنس مان كبير! لإن الرجل برج العذراء بيكره صفات التواكل والاعتماد على الآخرين. وبيربي أولاده إنهم يكونوا عصاميين لأنه بيكره الواسطة والتسول.
وعلى الرغم من إنه من الخارج يبان عليه الهدوء والبساطة، لكن الأب برج العذراء عنده بُعد نظر كبير وتحليل وافي لشخصية كل واحد حواليه. لكنه بيفضل يحتفظ بيه لنفسه لأنه بطبعه مش شخص صدامي. ومش بيلجأ للعقاب مع الأبناء إلا لما تتقفل باقي السُبل العادية علشان يصلح حال أولاده.
صفات أب برج الميزان
الأب برج الميزان معروف من اسمه، هادي ومتزن. ولو هيربي ابنه زي ما هو عاوز بالظبط الولد هيكون دبلوماسي أصيل. بس من ناحية تانية، مش عاوزين ننسى إن أب الميزان بيكره الالتزام والمسؤولية، وبيغير رأيه بسرعة. ودي عيوب ممكن تأثر على علاقته بأولاده لو ما أخدش باله منها.
اعرفوا توقعات الأبراج 2021 من ماغي فرح
صفات أب برج العقرب
الأب العقرب هيعلم أولاده الاعتماد على نفسهم. وهيحذرهم طول الوقت من أي محاولة للتدخل في حياتهم الشخصية. حتى لو مش هيتدخل في حياتهم وهيعطيهم مساحة للحركة وأخذ قرارات في سن صغيرة. وبقدر ما ده مهم وجميل، لكن الأب برج العقرب ممكن يعامل أولاده بندية مش بعطف. وده طبعًا مش موجود في كل مواليد العقرب.
صفات أب برج القوس
من الأبراج المقربة لقلبي – يمكن لأني برج القوس؟ – الأب برج القوس هيكون مثال للتضحية في سبيل راحة أولاده. حماسي جدًا إنه يعمل كل حاجة بدالهم. لكن الحماس ده بيتحول لجدال طويل في المناقشات لإثبات وجهة نظره، وعصبية لو كل تصرف من أولاده ما كانش مثالي. لكن كل ده بيكون تعبير عن الحب والاهتمام مش رغبة في تعقيد الأمور.
صفات أب برج الجدي
لو نفسك ابنك يلتحق بكلية عسكرية ويتفوق فيها. لازم تتجوزي راجل من برج الجدي. الأب برج الجدي مثال في الالتزام والمسؤولية وتعليم الأولاد أهمية العمل الجاد علشان ينجحوا في حياتهم. لكن الانضباط الزايد ده بيتحول لغضب لو الأولاد ما نجحوش في المطلوب منهم. وكأن لسان حال الأب الجدي بيقول لهم: أنا علمتكم وعملت لكم كل حاجه. ليه حياتكم مش مظبوطة؟!
صفات أب برج الدلو
اللي أبوه برج الدلو فعلًا محظوظ. لأن واحدة من أهم صفات برج الدلو هي تفانيه غير الطبيعي في مصلحة أولاده. مش بس كده، الأب الدلو مستمع جيد جدًا. وبيتفهم الفشل اللي ممكن يقع فيه الأبناء. كمان أب الدلو مش بيهتم بالفلوس وممكن نعتبره مسرف. لكن من ناحية تانيه، مش بيتهاون فيما يتعلق بنضافة الأطفال خاصةً صغار السن. وده ممكن يعمل شوية مشاكل.
صفات الأبراج عند الآباء – برج الحوت
الأب الحوت متفهم جدًا لأولاده. وبيحطهم دايما رقم ١ في حياته. لكن لازم الأولاد يكونوا على قدر من المسؤولية لأن سهل قوي ينعزل عنهم ويغرق في عالمه وأفكاره الخاصة.
أب برج الحوت هيعوز طول الوقت يبني علاقات صداقه مع أولاده ويتعامل معاهم بندية. وده مفيد جدًا في تعزيز الاعتماد على النفس عندهم وفكرة أنهم أصبحوا كبار السن ومسؤولين عن تصرفاتهم. ده غير إنهم هيشغلوا لأبوهم مقطع “والله بحبك موت، واحب برج الحوت” للهضبة. ودي طبعًا ميزة إضافية مش متاحة لمواليد الأبراج التانية.
التعليق باستخدام حساب فيس بوك