امرأة برج الجدي حكيمة جدًا. بتحب القواعد الصارمة والنظام. بتحب طرق محددة لكل حاجة بتعملها. بتحب تحط حدود لكل الناس وعمرها ما بتتخطى حدودها المرسومة لها من الناس. امرأة برج الجدي مثالية لدرجة إنها ممكن تضغط على نفسها جدًا عشان تعمل كل حاجة بشكل مثالي. كتومة في مشاعرها جدًا ومش سهل تبين إحساسها.
تاريخ ميلاد برج الجدي: 22 ديسمبر – 19 يناير
توافق الأبراج مع برج الجدي
الأبراج التي تتوافق مع برج الجدي: برج السرطان وبرج العذراء
الأبراج التي لا تتوافق مع برج الجدي: برج الثور
توقعات الأبراج 2020 امرأة برج الجدي من ماجي فرح
ماجي فرح خبيرة الأبراج بتقول إن 2020 لامرأة برج الجدي هتكون سنة تحولات متعددة، ولازم تجهزي نفسك لها. لازم تحطي استراتيجيات تفيدك على المدى البعيد. ممكن تلاقي مشاكل في الشغل في النص التاني من السنة فخدي بالك إنك ما تكونيش ناشفة قوي مع زملائك عشان تتفادي المشاكل دي.
امرأة برج الجدي والحب
امرأة برج الجدي لما بتحب، بتتخيل دايمًا النهاية السعيدة مع حبيبها بالجواز والأطفال والحياة بعد الخمسين والستين. مع إنه ممكن يكون أصلًا حب من طرف واحد أو إنها لسه مرتبطة في أول أشهر الارتباط. ده بيمثل صعوبة شوية لإن مش دايمًا الرجل اللي هي بترتبط به بيكون فعلًا ناوي يكمل معاها حياته أو مستعد لده. حاجة تانية بتميز حب امرأة برج الجدي هي إنها ما بتقعش في الحب من أول نظرة. بيكون دايمًا تعرف الشخص بقالها فترة من زمالة في شغل أو دراسة أو صداقة طويلة.
امرأة برج الجدي والعمل
أكتر برج عنده ذمة في الشغل هو برج الجدي. الشغل في الـcorporate والبيزنس لعبة امرأة برج الجدي اللي بتحب تشتغل في وظايف مريحة ماديًا وبتحب تستثمر فلوسها. ليه دي أكتر وظايف بتحبها؟ ببساطة عشان تقدر تظهر فيها وتطلع سلم الطموح لآخر درجة.
امرأة برج الجدي والصحاب
امرأة برج الجدي صديقة وفية ودمها خفيف بمجرد ما تعرفيها. بتحب النكت والحكايات وبتفضل حافظة هي قابلت كل صاحبة من صحابها إزاي وامتى. تحب تعزم أصحابها وتطبخ لهم بنفسها، تروح لهم البيت وتوضبه. امرأة برج الجدي بتحب حياة اصحابها تبقى أحسن.
امرأة برج الجدي والموضة
عشان في أغلب الأوقات امرأة برج الجدي بتبقى ناضجة وجادة، فهي تحب البدل والتايير والجواكت والستايل الفورمال أكتر. كمان في الألوان بتفضل الغوامق زي البني والكحلي والرمادي الغامق والأسود. لكن كمان هتلاقي قطعة في دولابها لونها أحمر أو فستان شيك وستايل. وبتحب تكسر الغوامق بأكسسوارات مطرقعة.
أهم مميزات امرأة برج الجدي
يعتمد عليها، منظمة، عندها تحكم في نفسها، وعندها قدرات إدارية ممتازة.
أبرز عيوب امرأة برج الجدي
عارفة كل حاجة، ما بتسامحش، بتتوقع الأوحش، وساعات بتتمسكن.
كيف تتعامل مع امرأة برج الجدي
عشان الراجل ينجح في جذب قلب امرأة برج الجدي، لازم يبقى عنده خفة دم وصبر لأنها مش بتحب من النظرة الأولى وبتحب بس راجل تعرفه من مدة وعشان كده لازم يكون صبور. كمان هي ما بتحبش الراجل اللي مش واثق من نفسه وبتحب إن اللي هترتبط به يكون جاد جدًا في العلاقة ومش لعبي.
