الإنترنت بقى جزء لا يتجزأ من حياة أطفالنا وبقى لازم نتقبّل وجوده ونستفيد من المميزات اللي الإنترنت ممكن يقدمها لولادنا، بس المهم إننا نتأكد إن استخدامهم للإنترنت آمن وتحت إشرافنا. الأبحاث بتقول إن الأطفال اللي بيستخدموا الإنترنت بدون إشراف أو رقابة هم أكتر أطفال معرضين يشوفوا محتوى غير مناسب لسنهم أو معلومات غلط أو محتوي إباحي أو كما يتعرضوا للابتزاز و التنمر الإلكتروني cyber bullying. والموضوع مش بسيط، أصبح فيه اليوم العالمي للاستخدام الآمن للإنترنت وهو يوم 5 فبراير من كل سنة. هنقول لك في المقال ده إزاي تحمي أطفالك من المخاطر اللي ممكن يتعرضوا لها بسبب الإنترنت وإزاي تساعديهم علي الاستخدام الآمن له.
- أول ما الطفل يبدأ يستخدم الإنترنت، أول قانون لازم يمشي عليه هو الوقت المسموح للإنترنت، من سن سنتين لعشر سنين، مجمل الوقت اللي مسموح بيه هو من نص ساعة لساعتين متقطعين على حسب سن الطفل. والوقت ده يكون شامل كل الشاشات سواء تلفزيون أو موبايل أو تابلت.
- مهم جدًا إن استخدام الإنترنت للطفل ما يكونش بيأثر علي نشاطه ومهامه باقي اليوم زي لعب الرياضة أو النوم بشكل كافي أو المناسبات الاجتماعية وتقضية وقت كفاية مع العيلة.
- استخدام الإنترنت للأطفال في السن الصغير لازم يكون في مكان واضح وتحت عين الكبار. حتى لو مش قاعدين تتفرجوا معاهم لازم تكونوا حواليهم وقادرين تشوفوا إيه اللي بيفتحوه وبيتعرضوا له. أنا عن نفسي لما ابني بيفتح YouTube أفضّل يكون عن طريق التلفزيون بدل الموبايل أو التابلت عشان أقدر أتابع معاه بسهولة.
- حطوا قواعد واضحة للمواقع المسموح الدخول عليها والآبلكيشنز اللي مسموح يستخدموها وتقدروا تربطوا موبايل الطفل بجهازكم عن طريق Google Family Account.
- تقدروا كمان تستبدلوا تطبيق YouTube بتطبيق YouTube Kids وGoogle بـKiddle، ولو الطفل هيستخدم جوجل ممكن تستعينوا بخدمة “safe search” أو البحث الآمن في الأجهزة اللي ولادكم بيستخدموها بانتظام.
- أول ما الطفل يدخل في مرحلة عمرية تسمح له يبدأ يستخدم الإنترنت في عدم وجود الأب والأم، لازم نشرح للطفل إيه الخطورة اللي ممكن يقابلها في الإنترنت وأهمية إنه يحكي لنا أي حاجة يشوفها أو يتعرض لها عشان نساعده.
- مع دخول الطفل في مرحلة المراهقة هتزيد تلقائي مساحة الخصوصية اللي بيتمتع بيها وقتها لازم يكون عارف الخطوط الحمرا والقيم اللي متفقين عليها ويكون تحت وقت مقنن برضه مش وقت مفتوح، وممكن نشجعهم باقتراحات مسلية لإستخدام الإنترنت مناسبة لسنهم وندور معاهم على الحاجات اللي بيحبوها واللي ليها علاقة باهتماماتهم، ونساعدهم إن وقتهم يكون مشغول بنشاطات مختلفة بعيد عن الإنترنت.
- مواقع التواصل الاجتماعي مش مسموح بيها للأطفال أقل من 13 سنة، بس للأسف بنشوف أهالي كتير بتسمح بيها قبل السن ده بكتير، بس مش معني ده إن لو طفلي طلب يقلد أصحابه إننا مفروض نوافق: لازم يعرف إن كل بيت له قواعد وقواعدنا مختلفة ونظام بيتنا مختلف عن بيت صاحبه ونتكلم معاه احنا ليه اختارنا النظام ده لعيلتنا، ونتوقع إنه ممكن يحبط أو يغضب وده من حقه ونقول له إننا فاهمين هو حاسس بإيه وإن الموضوع ممكن يكون صعب بس نثبت على موقفنا ونتأكد إننا موفرين له بدايل مسلية وممتعة ومفيدة يشغل بيها وقته.
- ومع بدء استخدام الطفل لمواقع التواصل الاجتماعي نعلّمه كويس الـ privacy settings وخطورة تعامله مع حد ما يعرفوش، وإن كلمة السر الخاصة به ما يقولهاش لأي حد مهما كان باستثناء الوالدين، وإنه ما يحطش أي معلومات عن مكانه أو تليفونه أو تفاصيل عن حياته الشخصية أونلاين، ونفهمه إن اللي بيظهر من حياتنا على السوشيال ميديا ويتعرف للناس صعب يختفي تاني تمامًا ونتكلم معاهم عن خطورة نشر أي صورة لجسمهم ويتصرفوا إزاي لو حد طلب منهم ده.
- لو جه اتكلم معانا في أي حاجة شافها مهما كانت، نسمع منه كويس ونشكره على صراحته وإنه جه يحكي لنا ونتكلم معاه بهدوء عشان يرجع لنا دايمًا بدل ما يخبي أو يروح يتكلم مع حد تاني ويا عالم المعلومات اللي هتوصل له هيكون شكلها إيه.
في النهاية بفكركم وبفكر نفسي إن الاستخدام الآمن للإنترنت ده وظيفتنا احنا إننا نحافظ عليها لولادنا ومسؤوليتنا أولًا وأخيرًا وإن متابعة كل حاجة بيشوفوها على الإنترنت ومتابعة الوقت المحدد لده والالتزام بيه ده حاجة صعبة بالنسبة لنا لكن مش مستحيلة. احنا ساعات بنفضل إننا نسيبهم قصاد الشاشات والإنترنت بدون متابعة عشان نرتاح شوية أو ننجز حاجة ورانا وبنتخيل إن ده مش هيأثر كتير لكن للأسف الأيام دي بقى تأثيره أسرع وأكبر مما بنتخيل بكتير.
التعليق باستخدام حساب فيس بوك