محتويات المقال
لازم نعترف إن زمن مشاهدة قنوات التليفزيون التقليدية خلاص قرب ينتهي. والزمن دلوقتي أصبح زمن تطبيقات المشاهدة المتخصصة زي نتفليكس، وشاهد، وغيرها. ولأن التطبيقات دي بعض محتوياتها مش بتكون مناسبة للأطفال. حبّينا نعلّمكم ازاي تضمنوا مشاهدة أطفالكم للمحتوى المناسب لعمرهم سواءً على التليفزيون الذكي Smart TV أو على تطبيقات المشاهدة نفسها.
ازاي تفعلي الرقابة الأبوية على التليفزيون الذكي؟
طبعًا الطريقة بتختلف من جهاز للتاني حسب سنة الإصدار ونسخة نظام التشغيل والشركة اللي اشتريتي التليفزيون منها. لكننا هنقول لك على الخطوات الأساسية وانتي دوّري عليها في تليفزيونك وهتلاقي الدنيا سهلة.
- في البداية، ننصحك بتغيير اللغة في التليفزيون للغة الأسهل عليكي فهمها سواءً العربية أو الإنجليزية. وكل التليفزيونات في المنطقة العربية داعمة للغتين دول.
- بعد كده، هتروحي لقائمة الإعدادات Settings، ومنها هتدوري على الرقابة الأبوية Parental control وتدخلي عليها.
- في الغالب، هيطلب منك النظام تدخلي كود سري من ٤ خانات. اختيار الكود ده لازم يكون أساسه إنه كود صعب التخمين علشان الأولاد ما يعرفوش هو إيه (أكواد زي ١١١١ و٢٢٢٢ و1234 الولاد بيعرفوها في ثواني).
- بعد كده، التليفزيون هيطلب منك تحددي إيه المسموح وإيه غير المسموح في المحتوى بناءً على سن الأولاد، وكمان تقدري تتحكمي في أوبشنز لها علاقة بالتليفزيون نفسه زي منع التحكم في الصوت (لو عاوزة تخلي الأولاد ما يعلّوش الصوت عن درجة معينة) أو قفل إعدادات تانية بتختلف من تليفزيون للتاني.
- بعد إدخال الكود مرتين متتاليتين علشان النظام يتأكد إنك فاكرة الرقم كويس. تقدري تفعلي الرقابة الأبوية إما من زرار في الريموت كنترول أو من زرار في القائمة الخاصة بتشغيل التليفزيون.
تفعيل الرقابة الأبوية على نتفليكس
حسب صفحة المساعدة في إعداد الرقابة الأبوية في نتفليكس، تقدري تعملي حساب لأطفالك علشان يتفرجوا على البرامج المناسبة لهم بأمان.
- في البداية، بتدخلي من الواجهة الأساسية لنتفليكس على الملفات الشخصية أو Profiles.
- بعد كده، بتعملي ملف جديد للأبناء كلهم أو لكل طفل على حده. وتختاري من ضمن الاختيارات إن الحساب مخصص لطفل وتحددي عمره علشان يتم اختيار البرامج حسب الفئة العمرية الخاصة به.
- وبعد عمل ملفات للأطفال، يستحسن نقفل ملفات الكبار بكلمة سر علشان نضمن إنهم ما يدخلوش عليها. في الحالة دي، لازم نتصفح نتفليكس من متصفح الكمبيوتر.
- بعد كده، بنختار “الرقابة الأبوية” ثم “قفل الملف الشخصي” ودخلي كلمة السر ثم اختاري “قفل الملف الشخصي” ودخلي كود تكوني فاكراه كويس.
تفعيل خيارات مشاهدة الأطفال على تطبيق شاهد
يعتبر تطبيق شاهد من التطبيقات اللي بتسهل التحكم في حسابات الأطفال بشكل كبير جدًا. من خلال الخطوات دي:
- في البداية، ندخل على خيار التحكم الأبوي من جوه حساب شاهد بعد تسجيل الدخول على متصفح الكمبيوتر.
- بعدها النظام بيطلب منا ندخل كود للتحكم في حسابات الأطفال.
- بعد كده، هنلاحظ أن فيه تصنيف Kids موجود في قائمة الحسابات ممكن نستعمله لدخول الأطفال على طول. أو نعمل حساب جديد ونأكد على اختيار إنه للأطفال. في الحالة دي، الأطفال مش هتشوف غير المحتوى المناسب لها.
ملاحظات عن الرقابة الأبوية
- مهما كان نظام الرقابة الأبوية في الجهاز الذكي صارم، لكن ممكن بعض المواد تكون لسه مش مناسبة للأطفال أو للعادات والتقاليد. علشان كده، لا غنى عن الرقابة من الأهل ومتابعة الحاجات اللي بيشوفها الأطفال باستمرار.
- التعليمات اللي عرفناها لكم بتختلف باختلاف الجهاز واللغة وإصدار نظام التشغيل. علشان كده، لو لقيتوا بعض اختلافات في شرح القوائم، خليكم مرنين في البحث عن بدائل.
- بننصحكم بعمل الاعدادات دي من خلال المتصفح وبلاش نستخدم تطبيقات التليفونات الذكية لأنها أحيانًا مش بيكون فيها كل الإمكانيات.
المصادر
التعليق باستخدام حساب فيس بوك