ظاهرة منتشرة بشكل مخيف بين الأطفال دلوقتي هي وجودهم على السوشيال ميديا قبل السن اللي ينفع يتعاملوا فيه مع حاجة زي كده بقى العادي! أنا ضد تمامًا تعامل الأطفال مع السوشيال ميديا في السن الصغير ده. ضد تمامًا إن بنت أو ولد عندهم 8 أو 9 سنين يبقوا بيتعاملوا مع الفيسبوك والإنستاجرام.
أنا دايمًا باتكلم واقول إننا لازم نجاري الزمن حوالينا ولازم نربي ولادنا بطريقة متماشية مع المجتمع اللي عايشين فيه لإن التحكم مش بإيدينا، بس فيه حاجات نقدر سوا نسيطر عليها شوية، فيه حاجات ما فيهاش زمن ومجتمع لإن فيها خطر عليهم.
آثار السوشيال ميديا على الأطفال
طيب أنتم عارفين السوشيال ميديا ممكن تعمل إيه في ولادنا وفي صحتهم النفسية؟ عشان نسمح لهم من السن الصغير ده يستخدموها؟
- بتعرضه لخطر التحرش والمواد الإباحية والتتبع كمان عن طريق معلوماته الشخصية اللي موجودة على البروفايل.
- بتعرضه لمغريات كتير عن طريق إعلانات مخصوصة عشانه وبتكبر أحلامه الافتراضية اللي ما لهاش علاقة بالواقع وبالتالي هتعرضه بعد كده للإحباط.
- بتخلّي الطفل بعد وقت يستغنى عن الحياة الحقيقية والاستمتاع مع أصحابه بحياته وأصحابه في حياته الافتراضية.
- بالأبحاث والدراسات، السوشيال ميديا سبب في تقليل سعادة الإنسان بوجه عام، وسبب في الضغط العصبي على الطفل بوجه خاص. إذا كان السوشيال ميديا بتضغط علينا احنا الكبار نفسيًا وعصبيًا إذا ما عرفناش نتحكم في اللي بنستقبله منها، ممكن تعمل إيه في طفل أكيد مش هيقدر يتحكم؟
- بنعرضهم لإدمان الشاشات وإدمان السوشيال ميديا بالأخص.
- بنعرض الطفل بعد فترة إنه يقيس مدي حب وتقبل الناس له ورضاه عن نفسه عن طريق اللايكس والكومنتس عنده. فيه دراسة اتعملت على تأثير السوشيال ميديا علي المخ ولقوا إن كل notification بتجي لنا بتعلي هرمون الدوبامين اللي بيحسن المزاج. فبالتالي لو الإشعارات دي وقفت لأي سبب أو قلت، فده بيكون له تأثير نفسي سلبي سريع على الحالة النفسية وعلى المزاج بشكل عام وعلى الثقة في النفس للطفل كمان.
أهم سبب لبعد الأطفال عن السوشيال ميديا
وأخيرًا وأكتر سبب باستخدمه وأنا بتكلم مع ابني في الموضوع ده هو “إننا مش هينفع نكدب في سننا”. السوشيال ميديا متحدد لها سن معين مسموح للطفل باستخدامه، يا ترى عمرك فكرتي إيه الرسالة اللي بتوصّليها لطفلك لما بتساعديه يغش ويغيّر في سنه؟ فكرتي هتقدري تتكلمي معاه ازاي في أهمية الصدق بعد كده؟ هتعرفي تقولي له ازاي إن مفيش حاجة اسمها كدبة بيضا مثلًا؟
السوشيال ميديا من أخطر التحديات اللي موجودة في حياتنا وحياة ولادنا الأيام ده، ساعدوهم يعيشوا طفولتهم الحقيقية بعيد عن العالم المزيف الافتراضي. مش هيحصل لهم حاجة لو رفضتوا وحطيتوا قواعد للسن المسموح فيه بالسوشيال ميديا وقواعد تانية لما يستخدموها، انتم بكده بتنقذوهم من دوامة حياة وتجارب مش حقيقية وسعادة مزيفة وإدمان صعب نخلص منه.
مصادر:
التعليق باستخدام حساب فيس بوك