محتويات المقال
المتعارف عليه من قديم الأزل إننا بنعرف الأطفال أسامي أعضائهم التناسلية بأسامي دلع أو أسامي تضحّك وغالبًا بتبقى لا تمت للواقع بأي صلة، وبيكبروا وهم متعودين كل واحد علي الاسم اللي عرفوه من صغرهم إلى أن يشاء الله.
لكن الكام سنة الأخيرة بدؤوا أخصائيين الصحة الجنسية والمتخصصين التربويين يتكلموا في خطورة الموضوع ده، وضرورة إن الطفل يعرف كل عضو في جسمه باسمه الحقيقي، ولكن طبعًا بما إننا في مجتمعنا مش متعودين على كده، وأهالي كتير بيحسوا إنه مالوش لازمة، فتعالوا نشوف كده ليه إن الطفل يعرف أسامي أعضاؤه التناسلية مهم جدًا وممكن نعلمها له ازاي.
أهمية معرفة الطفل أعضاؤه التناسلية بالاسم الحقيقي
حماية من التحرش:
لما الطفل يعرف اسم العضو التناسلي بتاعه من أول ما يبدأ يتكلم، فهو هيعرف يعبر عن نفسه بسهولة ويطلب المساعدة من الكبار بشكل واضح أي حد يفهمه، ده غير إن اللي بيتحرش بالطفل بيكون بني آدم جبان معتمد علي قلة حيلة الطفل، فلو عرف إنه قادر يشاور علي عضوه و يسميه باسم معروف للكل وواثق ده هيخليه يخاف ويعرف إنه قدام طفل واعي سهل يفضحه.
بناء علاقة صحية مع أجسامهم:
إننا نعلم الطفل اسم عضوه التناسلي زي بالظبط ما بنعلمه أسامي باقي جسمه (إيدك\ رجلك\ قضيبك) من غير ما نبقي محتاجين نقول اسم دارج أو نخبي إننا بنتكلم عن جزء معين في جسمنا. ده بيخلق عند الطفل من صغره تصالح وعلاقة سوية مع جسمه، لإن مفيش في جسمنا جزء عيب أو غلط، فيه بس جزء خاص مش بنتكلم عليه مع الناس أو بنشوفه لإنه خاص مش لإنه عار.
بناء علاقة مريحة بين الأهل والمراهق:
لما الطفل بيتعود من وهو صغير إنه عادي بيتكلم عن كل جزء في جسمه بأريحية من غير (عيب وما تقولش اللفظ ده وإيه القرف اللي بتقوله ده)، بيكبر وهو محترم جسمه ومتقبل التغيرات اللي بتحصل فيه وقت البلوغ ومش خايف أو قلقان يسأل أهله عن حاجة غريبة بيحسها في جسمه، لإنه اتعود من بدري إن كل أجزاء جسمي عزيزة ما فيهاش حاجة نتكسف منها.
تسمية الأعضاء التناسلية
– طيب ممكن نسمي الأعضاء التناسلية بإيه بقي لو مش هندلعها؟
– قضيب (للولد)\ فرج (للبنت)\ جزء خاص\ private part\ عضو تناسلي.
ولو من ناحية القلق من إن الولاد لما يعرفوا أسامي أعضائهم التناسلية هيفضلوا يقولوها ويتكلموا عليها قدام الناس ويحرجونا أو اللي حوالينا يحسوه غريب، فاحنا لو تعاملنا مع تعليمهم أعضائهم التناسلية زيها زي أي عضو تاني في جسمهم وفهمناهم فرق الخصوصية بس وما ضحكناش قوي أو زعقنا لما ييجوا يقولوها من سن صغير، فده اللي هيخليهم يتعاملوا معاها عادي من غير تركيز زايد، عشان كده رد فعلنا احنا هو اللي بيتحكم.
التعليق باستخدام حساب فيس بوك