محتويات المقال
“ما تعمليش لابنك/بنتك حاجة هو يقدر يعملها”
ده بيكون أول رد ليا لما أم بتسألني عن إن ابنها مش واثق في نفسه أو مش حاسس إنه يقدر ينجز.
تحميل الطفل المسؤولية من سن صغير هو أكبر هدية ممكن نقدمها له لحياته بعد كده، وهو أول الطريق لثقة أكبر في نفسه وفي قدراته، لإنه بيصدق إنه يعتمد عليه وبيصدق إنه يقدر ينجز وبيشوف ده في تأملنا واعتمادنا عليه وتزويد المسؤوليات دي بالتدريج على حسب العمر بتاعه. مع إن ممكن جدًا الطفل يبان إنه مش مبسوط أو مش عايز يشارك أو يساعد، وده طبيعي جدًا بس مش معنى كده إنه لسه مش مستعد يشارك ويساعدنا ويشيل مسؤولية لكن بطبيعة الأطفال بيتبسطوا شوية في الأول لما يجربوا حاجة جديدة، وبالذات حاجات بيعملوها الكبار في نظرهم بيبقوا متحمسين. وبعد شوية خلاص بيزهقوا ويكسلوا، فهنا دورنا احنا إننا نكمل وما نستسهلش ونشيل عنهم ونفتكر دايمًا إننا بنعلّمهم مهارات أساسية لحياتهم لقدام.
في المقال ده، هاقول لكم أكتر المهام والمسؤوليات اللي ممكن نحمّلها للطفل من أول سن سنتين (طبعًا مع مراعاة الفروق الفردية بين الأطفال):
سن سنتين – ٣ سنين
- يلم اللعب ويحطها في مكانها
- ترتيب الكتب في المكتبة
- يحط اللبس اللي مش نضيف في سبت الغسيل
- يطلّع اللبس النضيف من الغسالة ويجيبه لك وقت النشير
- يبدأ يدخل معاكي في المطبخ ويساعد خفيف (كسر البيض/ تقليب/ ترتيب أطباق) بعيد عن أي حاجة فيها نار طبعًا.
سن ٤ – ٥ سنين
- تعليق اللبس مكانه
- ترتيب السرير
- الاهتمام بالزرع
- ترتيب “تفضية” أكياس السوبر ماركت
سن ٦ – ٨ سنين
- مسح وكنس الارض
- لم أكياس باسكت القمامة
- غسيل الاطباق
- عمل ساندوتش
- تجهيز السلطة بشوك بلاستيك
- غسيل المواعين
سن ٩ – ١٢ سنة
- غسيل اللبس
- نشر الغسيل وتطبيقه
- رمي القمامة
- طبخ بعض الوجبات
- غسيل العربية
وما تنسيش تتأكدي إن طفلك مستعد للمهمة الجديدة وفاهمها وقادر يعملها بطريقته، وخدي وقتك ووقته للتدريب وعلى قد ما تقدري، خليه وقت لطيف بالنسبة له لإن في الآخر الغرض منها إنه يتعلم يشيل المسؤولية ويتعلم مهارات جديدة مش إنه يعملها بشكل perfect.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك