الأم العاملة: مش عارفة اشتغل من البيت وولادي جنبي

بعد قعدة الولاد في البيت 3 شهور وبعد ما بقى الشغل من البيت هو الطبيعي بتاع أمهات كتير فينا، بقى مطلوب نطلّع نفس جودة الشغل ونفس التركيز وولادنا بيتنططوا جنبنا. المقال ده لأي أم مكملة في الشغل من البيت الفترة الجاية وحاسة إنها مش قادرة تبقى منتجة ومش عارفة تنظّم وقتها ما بين الشغل والبيت والولاد، هاشارك معاكم شوية نقط جربت أعملها الفترة اللي فاتت عشان أقدر أشتغل من البيت بكفاءة رغم وجود ولادي جنبي طول الوقت.

• التخطيط لروتين اليوم:

من أكتر المهارات اللي بينصحوا بيها في الـ Time Management أو إدارة الوقت هي إنك تكتبي روتينك اليومي أو الـ to do list بتاعك بشكل أسبوعي وبشكل يومي. ويفضّل تكون جاهزة عندك من قبلها بيوم عشان تصحي الصبح حاسة إن يومك منظم ومتقسم وعارفة امتى الوقت اللي هتقضيه مع الولاد، وامتى وازاي هتقدري تشغلي وقتهم بعيد عنك عشان تشتغلي بتركيز، وامتى هيكون الوقت اللي بتشتغلي فيه وهم مع باباهم أو نايمين مثلًا فتأجلي له الشغل التقيل.

• جهزي مكان ثابت في البيت تشتغلي فيه كل يوم:

ببساطة عشان تقدري تدخلي بسهولة في موود الشغل بتركيز كل يوم الصبح، يقضّل تكوني محضرة مكان ثابت في البيت محضرة فيه كل اللي بتستخدميه في شغلك لو ملفات أو لاب توب أو أي أدوات تانية وطبعًا المكان ده يكون بعيد عن إيد الأطفال، فتقدري بعد كده تستغلي أي فرصة الولاد مشغولين فيها أو نايمين بإنك تبدأي تشتغلي على طول من غير ما تضيعي وقت في التحضير أو الترتيب كل مرة.

• جهزي وسائل تسلية الولاد قبل الشغل:

خلّي دايمًا وقت التلفزيون أو فيلمهم المفضل هو وقت الشغل بتاعك، مع طبعًا تجهيز السناكس اللي تسليهم أو لو سنهم صغير ولسه مش بيتفرجوا على التلفزيون، ممكن تكوني مجهزة كل يوم كام لعبة بقى له كتير ما شافهاش عشان تلفت نظره مع لعبة جديدة تشغلهم. المهم إن يبقى جاهز معظم الوقت جنبك دايمًا بدايل يتثسلوا بيها وانتي مركزة في شغلك.

• قسمي ساعات يومك بمرونة تسمح لك تشتغلي بسهولة:

طول ما الولاد في البيت، فاحنا لازم نعيد ترتيب أولوياتنا وساعات شغلنا حسب الظروف الجديدة، زي إنك تظبطي وقتك إنك تصحي قبلهم بكام ساعة تنجزي فيها الشغل التقيل أو تسهري بعدهم بكام ساعة، توزعي المهام المطلوبة منك في الشغل على مدار اليوم وتقسميها لمهمات صغيرة، حاجات مش مطلوب منك فيها تركيز كامل تقدري تنجزيها وانتي قاعدة وسط دوشة الولاد.

• اقبلي فكرة المقاطعات الكتيرة خلال وقت الشغل:

من أكتر الحاجات اللي كانت ضاغطة على أعصابي وموتراني أول ما بدأت اشتغل من البيت هي إني كنت متخيلة إني هاعرف أشتغل بنفس الكفاءة والتركيز وولادي معايا. وده طبعًا ما حصلش وأحبطني جدًا في الأول. لكن لما وقفت مع نفسي وفكرت إن ده مش واقعي وبدأت أقبل فكرة إن تركيزي في الشغل أقل شوية وإنهم هيقاطعوني كل شوية وده طبيعي ومتوقع، وإن غالبًا هم بيعملوا كده عشان محتاجينني معاهم ومحتاجين يشوفوا اهتمامي، لقيت إني لما أسيب شغلي عشر دقايق وأقوم ألعب معاهم وأهدّيهم وأهدى معاهم أحسن ما أفضل باشتغل طول الوقت وأنا متوترة.

• اعملي شيفتات مع جوزك:

لو جوزك بيشتغل من البيت أو بيشتغل بره، في جميع الأحوال انتي محتاجة مساعدته ومشاركته عشان تقدري تشتغلي وتنجزي وانتي في البيت ومع الولاد، اقعدي معاه وصارحيه بأهمية دوره بالنسبة لشغلك واطلبي منه يوضوح وقت هيقدر ياخد الولاد منك، وقسموا الوقت ما بين الشغل و الولاد، وما تنسوش ساعة ليكم تاخدوا فيها بريك من كل حاجة وتقعدوا مع بعض في هدوء (صعب شوية أنا عارفة بس مش مستحيل)

طبعا أنا عارفة إن كتير مننا اكتشف إن الشغل من البيت وفي وجود الولاد أصعب بمراحل من الشغل بره البيت بس بما إنه حاليًا بقى أمر واقع، فحاولي ترتبي أولوياتك وتعملي skip للمهام اللي مش لازم تتعمل أو ممكن تتأجل عشان تقللي الضغط عليكي وتسيبي وقت أكتر للشغل والولاد.