الأنيميا أثناء الحمل .. المخاطر والتحاليل اللازمة والعلاج

بعد ما تعرفنا في المقال السابق على أنواع الأنيميا وأسبابها وأعراضها، هنكمّل عن مخاطر الأنيميا أثناء الحمل والتحاليل اللازمة اللي الأم بتحتاجها وطرق علاج الأنيميا.

مخاطر أنيميا نقص الحديد خلال الحمل

أنيميا نقص الحديد لو كانت شديدة أو ما تعالجتش بتزيد من خطر إصابة الأم بـ:

• ولادة مبكرة أو طفل بيعاني من نقص الوزن عند الولادة.
• نقل الدم (لو الأم فقدت كمية كبيرة من الدم أثناء الولادة).
• اكتئاب ما بعد الولادة.
• طفل مصاب بالأنيميا.
• طفل مصاب بتأخر نمو.

اعرفي مراحل تطور الجنين شهر بشهر

مخاطر أنيميا نقص الفوليك

أنيميا نقص حمض الفوليك بتزيد من خطر إصابة الأم بـ:

• ولادة مبكرة أو طفل بيعانى من نقص الوزن عند الولادة.
• طفل مصاب بعيوب خلقية خطيرة في العمود الفقرى أو المخ (العيوب الخلقية للقناة العصبية).

اختبارات الأنيميا أثناء الحمل

لما تزوري الدكتور للمرة الأولى علشان تتابعي الحمل، هيطلب منك تعملي تحليل دم عشان يتأكد إذا كان عندك أنيميا أو لا، والاختبارات دي بتتضمن:

1. تحليل الهيموجلوبين، وده بيقيس كمية الهيموجلوبين (بروتين غني بالحديد داخل خلايا الدم الحمراء واللي بينقل الأكسجين من  الرئتين إلى جميع أنسجة الجسم).
2. تحليل الهيماتوكريت. وهو بيقيس نسبة كرات الدم الحمراء في كمية من الدم.
3. لو كان عندك مستويات قليلة من الهيموجلوبين أو الهيماتوكريت، ممكن تكوني مصابة بأنيميا نقص الحديد. في الحالة دي، الدكتور هيطلب اختبارات دم تانية عشان يتأكد إذا كان سبب الأنيميا هو نقص الحديد أو إن فيه سبب تاني.
4. حتى لو ما كانش عندك أنيميا في بداية الحمل، الدكتور ممكن يطلب اختبار دم تاني عشان يتأكد من عدم وجود أنيميا في التلت التاني والتالت من الحمل.

علاج الأنيميا أثناء الحمل

• لو كان عندك أنيميا أثناء الحمل، هتحتاجي تاخدي حمض الفوليك مع مكملات الحديد وفيتامينات الحمل، والدكتور هيطلب منك تاكلي أكل فيه حديد وفوليك أسيد أكتر.
• بعد كده، هيطلب منك إنك تعملي اختبار تاني للدم عشان يتأكد إن مستويات الهيموجلوبين والهيماتوكرييت عندك بتتحسن.
• عشان تعالجي أنيميا فيتامين ب12، الدكتور هيطلب منك تاخدي مكملات فيتامين ب 12.
• وهيطلب منك تاكلي كميات أكبر من المنتجات الحيوانية زي اللحوم والبيض ومنتجات الألبان.

كيفية تجنب حدوث الأنيميا أثناء الحمل

عشان تتجنبي حدوث الأنيميا أثناء الحمل، اتأكدي انك بتاخدي كميات كافية من الحديد. كلي على الأقل 3 وجبات غنية بالحديد فى اليوم. علشان كده جمعنا لك الأكلات دي.

أشهر الأكلات الغنية بالحديد

1. اللحوم الحمراء، الطيور والأسماك.
2. الخضروات الورقية الخضراء (زي السبانخ، البروكلي والكرنب)
3. الحبوب المدعمة بالحديد.
4. البقوليات.
5. المكسرات والبذور.
6. البيض.

أطعمة غنية بفيتامين سي وتساعد على امتصاص الحديد

1. الفواكه الحمضية والعصائر.
2. الفراولة.
3. الكيوى.
4. الطماطم.
5. الفلفل الرومي.

المصادر
1
2

راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.