الأنيميا أثناء الحمل .. الأسباب والأعراض بالتفصيل

أثناء الحمل جسم الأم بينتج كمية أكبر من الدم عشان يدعم الجنين، لو ما كنتيش بتاخدي كفايتك من الحديد أو العناصر التانية، جسمك بيبقى مش قادر ينتج كمية كفاية من كريات الدم الحمراء اللي محتاجها عشان ينتج كمية دم أكبر.

الإصابة بالأنيميا معناها إن دمك مافيهوش كمية كفاية من كرات الدم المراء السليمة اللي تقدر تشيل الأكسجين لأنسجة جسمك وجنينك.

أشهر 10 مشاكل شائعة خلال فترة الحمل

النهارده جمعنالك اللي محتاجة تعرفيه عن الأنيميا: أسبابها وأنواعها وأعراضها:

أنواع الأنيميا أثناء الحمل:

1. أنيميا نقص الحديد.
2. أنيميا نقص حمض الفوليك.
3. أنيميا نقص فيتامين ب 12.

أنيميا نقص الحديد:

الأنيميا دي بتحصل لما الجسم ما ياخدش كمية كافية من الحديد عشان ينتج كمية هيموجلوبين، اللي هو بروتين جوه كرات الدم الحمراء بيشيل الأكسجين من الرئتين لباقي أجزاء الجسم، وفي حالة أنيميا نقص الحديد الدم مش بيقدر يشيل كمية أكسجين كفاية لبقية الخلايا ونقص الحديد هو السبب الرئيسي في ده.

أنيميا نقص حمض الفوليك:

• حمض الفوليك هو أحد أنواع فيتامين ب، الجسم بيحتاج حمض الفوليك لإنتاج خلايا جديدة، وده بيتضمن إنتاج خلايا دم حمراء سليمة.
• أثناء الحمل، بتحتاج السيدات لكميات أكبر من حمض الفوليك، لكن أحيانا ما بيكونوش بياخدوا منه كمية كفاية في الأكل ولما ده يحصل، الجسم مش بيقدر ينتج كميات كفاية من خلايا الدم الحمراء السليمة واللازمة لنقل الأكسجين لخلايا الجسم.
• نقص حمض الفوليك ممكن يسبب بشكل مباشر بعض العيوب الخلقية للمواليد، زي العيوب الخلقية للقناة العصبية (الحبل الشوكى المشقوق) ونقص وزن المولود.

أنيميا نقص فيتامين ب12:

الجسم بيحتاج فيتامين ب12 لتكوين خلايا دم حمراء سليمة، لما السيدة الحامل ما تاخدش كمية كفاية من فيتامين ب12 من غذائها اليومي، جسمها ما بيقدرش ينتج كمية كافية من خلايا الدم الحمراء السليمة، السيدات اللي مش بيتناولوا اللحوم، الطيور، منتجات الألبان، والبيض بيكونوا أكثر عرضة للإصابة بأنيميا نقص فيتامين ب12، واللي ممكن تأدي إلى عيوب خلقية للمواليد زي العيوب الخلقية للقناة العصبية، وأحيانا الولادة المبكرة لا قدر الله.

العوامل اللي ممكن تأدي  لاحتمالية الإصابة بالأنيميا أثناء الحمل:

كل السيدات الحوامل بيكونوا عرضة لخطر الأصابة بالأنيميا، ده لأنهم بيحتاجوا كميات أكبر من المعتاد من الحديد وحمض الفوليك. بس خطر الإصابة نسبته بتعلى لو كنتي:

• حامل بأكثر من طفل(التوائم).
• إذا كنتي مريتي بحملين متتاليين بينهم فترة قصيرة.
• بتتقيأي كتير نتيجة لغثيان الصباح.
• إذا كنتي صغيرة في السن(فى سن المراهقة).
• مش بتاكلي كمية كافية من الأطعمة الغنية بالحديد.
• لو كنتي بتعاني من الأنيميا قبل الحمل.

أعراض الإصابة بالأنيميا أثناء الحمل:

• جلد، شفايف وضوافر باهتين.
• الشعور بالتعب والوهن.
• الدوار.
• ضيق النفس.
• ضربات القلب السريعة.
• مشاكل في التركيز.

في المراحل الأولى من الأنيميا ممكن ما يكونش عندك أعراض واضحة، ومعظم الأعراض دي بتحسي بيها بشكل طبيعي أثناء الحمل حتى لو ما كنتيش مصابة بالأنيميا.

عشان كده اتأكدي من عمل اختبار وفحص دوري لعينة من دمك عشان تتحققي من الأنيميا تحت إشراف طبيبك طبعًا.

ممنوعات الحمل: حاجات ياريت متعمليهاش في فترة الحمل

المصادر:

mayoclimic.org

webteb.com