محتويات المقال
أوقات كتير بيكون الأم نفسها تولد طبيعي لكن الدكتور المتابع لحالتها بيرفض ده لإنه شايف الحالة تستدعي الولادة القيصرية، وأوقات بتكون الأم نفسها هي اللي مقررة قرار الولادة القيصرية غشان الألم وسهولة الولادة وأحيانًا عشان تحدد عيد ميلاد الطفل أو الطفلة. الحقيقة فيه حالات بتستدعي الولادة القيصرية دون غيرها وتقدري تعرفيها من هنا. ولو خلاص قررتي أو طبيبك قرر الولادة القيصرية، تقدري تعرفي في المقال ده معلومات عن الولادة القيصرية وازاي تتحضري لها.
تجربة الولادة القيصرية
من تجربة أمهات للولادة القيصرية، بيقولوا كنا نحب حد يقول لنا شوية حاجات قبل ما ندخل العمليات عشان نكون مستعدين نفسيًا.
- الولادة القيصرية في الأول والآخر عملية جراحية. آه هي سهلة وتقريبًا تلت الولادات دلوقتي حول العالم بتكون قيصرية لكن في الآخر لازم تكوني فاهمة إنك هتعملي عملية.
- القيام هيكون صعب في الأول. قيامك من السرير هيكون مؤلم جدًا بعد تأثير البنج ما يختفي. وممكن تحسي إنك مش قادرة تقيمي ضهرك بشكل مفرود وسليم. وده طبيعي.
- لكن ما تخليش ده يقلل همتك في إنك تقومي وتتمشي. أول ما تحسي إنك قادرة تعملي ده، اعمليه من غير ما تتقلي على نفسك. كل ما تتحركي، كل ما هتحسي أحسن جسديًا ونفسيًا.
- خدي مسكنات. الدكتور ممكن يعرض عليكي مسكنات تنفع مع الرضاعة الطبيعية. خديها لإنك كل ما تتحكمي في الألم، كل ما هتقدري تتحركي بشكل أحسن وتحسي أحسن.
- الوجع لما تكحي أو تعطسي هيكون شديد شوية. ممكن تمسكي مخدة وتحطيها على الخياطة ولما تحسي إنك هتكحي أو تعطسي تضغطي برفق عليها، وده هيقلل شوية من الألم.
- خدي بالك من عضلات البطن. مش لازم تعملي في أول شهر أو اتنين أي تمارين أو حركات تشد عضلات البطن أبدًا.
- لما تبدأي تتحسني، ما تعمليش كل حاجة تقدري تعمليها مرة واحدة. ده هيتعبك جدًا لأيام قدام.
- خدي بالك من الجرح كويس. في بعض الأوقات ممكن يظهر علامات على التهابات وساعتها لازم تراجعي الدكتور.
- حاولي في الأسابيع اللي قبل الولادة تبدأي تعملي أكلات وعصاير وتشيليها في الفريزر. دي هتسهل عليكي كتير بعد الولادة. وهاتي بقالة تكفيكي شهرين أو تلاتة طالما تقدر تعيش. واطلبي خضار وفاكهة دايمًا في أول فترة بعد الولادة عشان تفيدك كسناكس بين الوجبات.
معلومات عن الولادة القيصرية
مدة الولادة القيصرية
مدة العملية نفسها ما بتكونش طويلة. فتح البطن وإخراج الجنين بياخد حوالي 10 دقائق وبعدها بيكون فيه حوالي نص ساعة خياطة الرحم والبطن.
التخدير وتحضيرك للعملية
غالبًا بتكون إبرة الضهر هي طريقة التخدير. ولنا مقالة عنها، تابعينا وهننزلها قريب. الإبرة هتخدر الجزء الأسفل من الجسم لكن هتفضلي صاحية. فيه طريقة تانية من التخدير وهي تخدير كلي. بعده البطن بتتغسل بمحلول وبيتم وضع قسطرة في المثانة وبيكون فيه زي ستارة من قماش معقم فوق البطن.
الجرح
لما بتكون البطن مخدرة تمامًا، بيفتح الدكتور بالمشرط جرح صغير بطول 3 سم تقريبًا في خط بالعرض تحت السرة. بعد كده وعلى حسب وضع الجنين، بيتم فتح الرحم نفسه. في 95% من الحالات، بيتفتح أسفل الرحم بالعرض نفسه. أما في بعض الحالات لو وضع الجنين مش طبيعي في الرحم، بيتفتح فتح بالطول لشد الجنين بشكل أسهل.
اللقاء الأول
بعد ما الدكتور بيخرج البيبي ويقطع الحبل السري، التمريض هينضفوا البيبي وهتمسكيه وتحضنيه. في الوقت ده، الدكتور هيخيط الرحم بخيط نسيجه بيدوب في نسيج الرحم فمش هتحتاجي تشيليه بعد كده. وبعدين هيخيط البطن من برا. هتاخدي في الوقت ده مضاد حيوي عشان يمنع أي التهابات، والدكتور هيتطمن على كل العمليات الحيوية في جسمك.
نتمنى لك ولادة سهلة وحياة ممتعة مع البيبي.
التعليق باستخدام حساب فيس بوك