“أنا عايزة أشكر الأم اللي اقترحت موضوع طبق البصل في الأوضة، الولد مناخيره سلكت وأخيرًا نمنا ليلة على بعضها.” أكتر من أم خلال الفترة اللي فاتت اتكلمت – بعد التجربة – عن دور البصل السحري والفعّال في إزالة احتقان الأنف وتحسين التنفس عند الأطفال المصابين باحتقان وأدوار برد عويصة، لكن السؤال اللي راود أمهات كتير جدًا: يا ترى الكلام ده حقيقي؟ طيب الكلام ده علمي أصلًا؟
مش عندنا بس!
المفاجأة إن موضوع الطبق اللي فيه بصلة جنب سرير الطفل المصاب بالاحتقان مش عندنا في مصر بس، ده بيتكرر في بلاد كتير حوالين العالم كواحدة من وصفات الأمهات والجدات لعلاج احتقان الأنف عند الأطفال، سواء في الهند أو في الولايات المتحدة.
بيث مدونة أمريكية بنتها كان عندها كحة ومش عارفة تاخد نفسها طول 5 ساعات كحة متواصلة بمعدل مرة كل تلات ثواني ونص وطبعًا زي أي أم كانت بتفكر في حاجة واحدة “هانام الليلة دي إزاي؟” لكن بيث حاولت تتصرف، دهنت للبنت فيكس على صدرها ورجليها، برضه مفيش فايدة لحد لما افتكرت الوصفة القديمة فدخلت المطبخ وجابت بصلة وقسمتها نصين وحطيتها جنب البنت والمفاجأة إن البنت نامت وهي مرتاحة!
إيه الدليل العلمي؟
في الواقع، مفيش دليل علمي محدد بيقول إن البصل بيعالج الاحتقان، كل الحكاية إن فيه دراسة اتعملت سنة 2002 اتكلمت عن دور الزيوت الطيارة في البصل وإنه غني بمركبات الكبريت اللي بتخلي ريحته نفاذة، ورغم عدم وجود أي أدلة علمية واضحة ومباشرة عن علاقة البصل بعلاج احتقان الأنف وتسليك مناخير الأطفال الأطفال الصغيرين، لكن الأكيد إنه في فكرة عامة جاية من زمان لدلوقتي بتقول إن الروايح النفاذة بتحفز بتحفز مستقبلات الشم واللي بدورها بتساعد على الشفاء بسرعة وبشكل أحسن!
الفكرة جات منين؟
رغم عدم وجود دليل علمي مباشر بيربط بين البصل وعلاج احتقان الأنف وتهدئة الكحة إلا إن ده مش بينفي خبرة آلاف الأمهات اللي جربوا بالفعل علاج نزلات البرد بالبصل سواء بوضعه على بطن رجل الطفل تحت الشراب، أو إنه يتحط مقسوم نصين في طبق جنب الطفل وهو نايم عشان يريح نفسه – حسب اعتقاد أمهات كتير – والأكيد إن البصل له فوايد مثبتة علميًا زي إنه بيقلل خطر السرطان، وبيدعم صحة الجلد والشعر وبيقلل الاكتئاب بنسبة كبيرة.
نستخدمه ولا لأ؟
في الواقع، الغريق بيتعلق في قشاية. والأكيد إنه مفيش أي أشرار متسجلة من وضع بصلة نية جنب سرير الطفل باستثناء الريحة غير المرغوب فيها اللي هتطلع وهتملا المكان، لكن باستثناء ده كله، مفيش ضرر إنك تجربي وتقولي لنا يا ترى جاب نتيجة معاكي ولا لأ؟
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك