محتويات المقال
البنطلون الجينز من أكتر القطع اللي لا غنى عنها في دولاب أي بنت أو ست. مهما كان ستايل لبسها، أكيد هتلاقيه موجود. السبب في أهمية الجينز هو إنه من أكتر البنطلونات العملية والمريحة واللي بتتلبس في كل الأوقات والمناسبات مع اختلاف طريقة الستايلينج والقطع التانية اللي بتتوظف معاه عشان يناسب كل مناسبة أو خروجة هيتلبس فيها.
لغز البنطلون الجينز
اتفاجئت جدًا لما قررت من أسبوع أنزل أشتري لنفسي بنطلون جينز جديد، ولقيت نفسي غرقانة وسط كمية رهيبة من الستايلات والمسميات المختلفة اللي خلتني في حيرة رهيبة، وقضيت في المحل أكتر من ساعة لحد ما قدرت أحل اللغز وألاقي المناسب ليا ولشكل جسمي. عشان كده، قررت إني لازم أكتب المقال ده، عشان نفك طلاسم اللغز ده ونتعرف مع بعض على المسميات المختلفة لموديلات الجينز وازاي تقدري تعرفي إيه اللي هيليق عليكي وإيه اللي هتتجنبيه.
إيه هو الدينيم Denim
كلمة Denim كلمة بتتكرر كتير وبنلاقيها مكتوبة كتير على أغلب البنطلونات، والحقيقة هي بتشير لنوع القماش المصنوع منه البنطلونات الجينز وهو نوع من القطن التقيل اللي طبعًا بيكون عملي جدًا ومتين. وفي الغالب بيطلق Denim على اللون الأزرق الداكن للجينز. يعني Denim هو نوع القماش مش موديل أو ستايل للجينز.
الفرق بين البنطلونات الجينز Skinny-Slim-Jeggings
- التلات مصطلحات دول بيندرجوا تحت مسمى fit jeans، يعني مثلًا هتلاقي مكتوب (Slim Fit)
- التلات مصطلحات بيعبروا عن موديل البنطلون الجينز وشكله على الجسم ابتداءً من منطقة الوسط لحد الركبة.
- أما بالنسبة للفرق بين التلاتة، فهو الآتي:
Slim
رجلين ضيقة، والقصة بتكون مستقيمة وملاصقة نسبيًا للجسم لكن بصورة أقل من الـskinny، تقدري تلبسيه وتوظفيه في مناسبات كاجوال، أو في خروجات رسمية أو في الشغل، على حسب الأكسسوارات والقطع التانية اللي هتلبسيها معاه. من مميزات القصة دي إنها بتخبي بعض عيوب الجسم بشكل كبير، وبتلائم أجسام كتير.
Skinny
برضه رجلين ضيقة، لكنه ملاصق أكتر للجسم، كإنه طبقة تانية فوق الجلد. بيكون أضيق وبيناسب الأجسام الممشوقة أكتر. تقدري برضه توظفيه إنه يناسب إطلالة كاجوال أو كلاسيك، أهم حاجة لو اختارتي تلبسيه في الشغل مثلًا أو لإطلالة كلاسيك إنك تتجنبي الوسط المنخفظ (low rise) لإنه في الحالة دي بيدي انطباع كاجوال أكتر.
Jegging
القصة دي هي مزيج بين الجينز العادي وleggings. طبعًا بيكون ضيق جدًا، أكتر من skinny، وقماشته بتكون أرق وأخف نسبيًا، بيليق أكتر على الأجسام الممشوقة جدًا لإنه بيظهر شكل الرجلين تمامًا. تقدري توظفيه للكاجوال والكلاسيك كمان حسب اختيارك للقطعة العلوية اللي هتلبسيها معاه. تقدري كمان تلبسيه في الشتاء مع البلوفرات الواسعة over sized والبوت الطويل.
الفرق بين Regular-Relaxed-Boyfriend-Loose
brightside.me
Regular
باين من اسمه: الموديل الكلاسيكي للجينز، اللي قصته بتليق على أي حد، وأيًا كان شكل جسمك هيليق عليكي. موضته ما بتقدمش، يعني هتشتريه وانتي متطمنة إنه هيبقى من أساسيات لبسك وقطعة مهمة في دولابك. هيليق على كل الستايلات، يعني ممكن تلبسيه مع بليزر وكعب عالي، أو سويت شيرت رياضي وجزمة رياضية أو سنيكرز.
Relaxed
كل الفرق بينه وبين Regular إن رجليه بتكون أوسع، وخط الوسط بيكون منخفض أكتر، بيليق أكتر مع الإطلالة الكاجوال ولا يفضل مع الإطلالة الرسمية Formal Look. بس تقدري تلبسيه مع أي تيشيرت أو بلوزة تحبيها بأي ستايل تحبيه، وفي الشتا ممكن تلبسيه مع بالطو طويل أو جاكيت كاجوال قصير.
Loose
له ستايل مميز في اللبس. مش شرط يليق على كل الناس. يصلح فقط مع الإطلالة الكاجوال وبيليق قوي على أي حاجة oversized، أفضل جزمة تتلبس معاه هي السنيكرز بكل موديلاتها.
Boyfriend
مستوحى من قصات البنطلونات الرجالي عشان كده سموه boyfriend. بيليق على كل أشكال الأجسام تقريبًا، هتلاقيه متوفر بخط وسط عالي أو مرتفع وكمان بوسط منخفض. تقدري تجمعيه مع أغلب موديلات البلوزات أو التيشيرت، مفضل أكتر لإطلالة كاجوال ومش هيكون أفضل اختيار لو روحتي به اجتماع مهم بيحتاج للبس رسمي Formal look.
الفرق بين Tapered-Straight-Boot
brightside.me
ال3 مصطلحات دول بيحددوا شكل قصه البنطلون الجينز بداية من الركبة لحد نهاية رجلين البنطلون
Tapered
قصة الرجل بتضيق من الركبة لحد القدم. عشان كده القصة دي بتليق أكتر على الأجسام الممشوقة، لإنها بتظهر شكل الرجل. بيليق على كل أنواع الجزم بداية من السنيكرز، للصنادل والجزم الكلاسيكية.
Straight
رجل البنطلون المستقيمة عرضها واحد بداية من الركبة لحد أسفل الرجل، القصة دي بتخبي العيوب وبتليق على كل الأجسام وبيليق على كل أنواع القطع العلوية وكل ستايلات الجزم، يعتبر موديل كلاسيكي للجينز.
Boot
شكله مميز ومعروف وتقدري تفرقيه بسهولة عن أي قصة تانية، موضه اتشهرت جدًا في وقت الستينات، أحيانًا بترجع تاني وأحيانًا بتختفي تمامًا. من مميزاته إنه بيليق على الأجسام اللي عندها الأرداف عريضة لإنها بتعمل توازن بسبب اتساع قصة الرجل من تحت الركبة لأسفل الرجل.
الموضوع طلع كبير قوي يا جماعة! ولسه هنتكلم تاني عن موديلات ومسميات تانية كتير تخص البنطلونات الجينز عشان نسهل عليكي الاختيار. المهم إنك تكوني نفسك وتلبسي اللي يريحك ويرضيكي مهما كانت المسميات.
بالصور: أفكار مبتكرة علشان ما ترميش الجينز القديم
المرأة العاملة .. تلبسي إيه لو عندك إنترفيو؟
ملابس الـOversize مسيطرة على موضة شتاء 2020
التعليق باستخدام حساب فيس بوك