محتويات المقال
كل حمل بيبقى ليه ظروفه وأعراضه المختلفة، فيه بعض الأمهات اللي مش بيحسّوا بأي أعراض خالص، وفيه أمهات تانية بتحس بأعراض مختلفة زي الدوار والضغط المنخفض والإمساك اللي بيسبب في أحيان كتير البواسير. البواسير من ضمن المشاكل الشائعة جدًا في الحمل وبالرغم من إنها ممكن تكون مؤلمة بس ليها علاج في فترة الحمل عشان ما يحصلش تطور للمشكلة دي عند الولادة. في الموضوع ده، هنعرّفك أكتر عن البواسير في فترة الحمل وطرق علاجها.
إيه هي البواسير؟
البواسير عبارة عن تورم أو انتفاخ في الأوعية الدموية في الشرج والجزء السفلي من المستقيم. وفي بعض الأحيان ممكن يحصل تورم للأوعية الدموية لدرجة حدوث كتلة محسوسة حول منطقة الشرج، اللي بيخلي فيه ألم شديد جدًا عند الإخراج، وممكن أحيانًا يحصل نزيف عند عملية التبرز.
ليه بتحصل مشكلة البواسير في فترة الحمل؟
البواسير في الحمل – الأعراض وطرق العلاج
الإمساك: أسباب كتير ممكن توصل لمشكلة البواسير بس أهمها الإمساك اللي بيسبب ضغط في وقت الإخراج. فبالتالي بيحصل تورم أو بعض الأحيان تدلِّي للبواسير الخارجية.
الإسهال الشديد: أحيانًا في حالات الإسهال الشديد، بيحصل تضخم في الأوعية الدموية للمنطقة وقت الإخراج. وبالتالي يحصل التهابات وتورم للبواسير.
زيادة حجم الرحم: مع زيادة حجم الرحم في فترة الحمل وخصوصًا في الثلث الأخير، بيحصل ضغط على الأوردة في أسفل الرحم. فبالتالي بيحصل انتفاخ أو تورم.
هرمون البروجسترون: زيادة هرمون البروجسترون في فترة الحمل بيسبب بطء في حركة الأمعاء. فبالتالي هيحصل إمساك، السبب الرئيسي في حدوث البواسير.
الجلوس المطول على التواليت: الجلوس لفترات طويلة على التواليت ممكن يسبب ضغط شديد على المنطقة وتفاقم مشكلة البواسير.
هنا ممكن تشوفي علاج الإمساك في الحمل بدون ملينات
أعراض البواسير في الحمل
- ألم شديد وقت عملية الإخراج.
- حكة وحرقة شديدة حول منطقة الشرج.
- تورم أو ظهور كتلة محسوسة عند منطقة الشرج.
- في بعض الأحيان ممكن يحصل نزيف وظهور دم أثناء التبرز.
مشكلة تشقق القدمين .. علاج تشقق القدمين في فترة الحمل
علاج البواسير
البواسير في الحمل – الأعراض وطرق العلاج
بعد ما تستشيري دكتور النسا الخاص بيكي عن مشكلة البواسير والعلاج الدوائي المناسب لحالتك، ممكن تتبعي شوية الخطوات دي عشان تعالجي المشكلة وتقللي منها:
- الأكل الصحي: اتبعي أسلوب غذائي مناسب للحمل، وفي نفس الوقت، ما يسببش إمساك، اهتمي بأكل الخضروات والفواكه اللي فيها ألياف طبيعية زي الخس والعنب.
- شرب المياه: شرب المياه بكثرة بيساعد على تنظيم حركة الأمعاء وبالتالي بيقلل من حصول الإمساك المسبب الرئيسي للبواسير.
- الملينات: ممكن يوصف لك دكتور النسا ملين آمن تستخدميه عشان يسهل عليكي الإخراج أو تعتمدي على الملينات الطبيعية زي عصير البرقوق والقراصيا والمشمش المجفف.
- تجنب الجلوس لفترة طويلة: الجلوس لفترات طويلة بيسبب ضغط على الأوعية الدموية في منطقة الشرج، اتجنبي الجلوس لفترات طويلة واتمشي أو اتحركي فترات أطول. لو حالتك ما تسمحش بالتحرك كتير، ممكن تشتري من الصيدلية وسادة (مخدة) مخصصة للبواسير.
- الكمادات: ممكن تعملي كمادات مياه دافية على المناطق المصابة أو تقعدي في البانيو في مياه دافية من غير ما تستخدمي أي غسول أو صابون عشان ما يحصلش تهيج للمنطقة.
- الكشف الطبي: لو حالتك زادت أو حسيتي بألم شديد بننصحك تستشيري دكتور النسا فورًا لإجراء الكشف الطبي المناسب ووصف المسكنات أو الكريمات أو العلاج الدوائي عشان ما تزيدش المشكلة بعد الولادة والاضطرار للتدخل الجراحي لا قدر الله.
أزمة كل الستات خلال فترة الحمل تورم القدمين في الحمل
بنتمنى ليكي رحلة حمل سلسة وولادة سهلة وراحة البال دايمًا 🙂
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك