محتويات المقال
التبول اللاإرادي الليلي عند الأطفال من اكتر المشاكل المزعجة اللي بتأثر نفسيا عليهم بالسلب وكمان بتاثر علي الاهالي، اللي في الغالب بيكونوا شايفين الطفل ده بيتدلع وكبر علي قصة التبول الليلي في السرير ده وممكن يتوجهوا لإستخدام أساليب وعقاب يخللي القصة تسوء اكتر بدل ما تتحسن.
في المقال ده هنعرف إيه أسباب االتبول اللاإرادي عند الأطفال وياتري ده دلع فعلا واللا له سبب علمي وإزاي نتعامل معاه وطرق علاجه.
أسباب التبول اللاإرادي عند الأطفال
-
نفسيا:
من اكتر العلامات اللي بتعرفنا غن الطفل في حاجة مضايقاه ومأثرة نفسيا عليه بالسلب هو إنه يكون متمرن وكويس جدا وفجأة يرجع يعمل تويلت علي نفسه، فده بيديني إشارة حمرا إن الطفل بيعبر عن قلق أوتوتر او أي تغيير كبير حصل في حياته ولسة متعملناش معاه صح، زي وجود اخ مولود جديد مثلا.
-
عضوية:
من أعراض الإصابة بمرض السكر هو التبول الليلي أو ممكن يكون في إلتهابات في المثانة أو الجهاز البولي عامة ومحتاجة علاج طبي.
-
لايف ستايل:
يكون إحنا أصلا طريقة حياتنا مش بتساعده زي إنه نومه مش مظبوط، يشرب سوايل كتير قبل النوم، يسهر جدا فبالتالي نومه يكون تقيل ميقدرش يصحي للتويلت بليل.
علاج التبول اللاإرادي عند الأطفال الليلي:
- لو السبب نفسي فأهم حاجة اولا هي التعامل مع المسبب وإكتشاف سبب قلق او توتر الطفل وتغيير معاملتنا لو إحنا كأهل السبب في التوتر ده.
- نوقف شرب المية قبل النوم علي الأقل بساعتين مع تظبيط مواعيد وروتين النوم.
- نتعامل كأننا لسة بندربه علي التخلص من الحفاض، بس من غير طبعا ما نحسسه بكدة بمعني إننا نشجع الطفل يدخل التويلت قبل النوم وكل ساعتين أثناء النوم، ونسهل له ده بإنه ينام بدري في مكان هادي ويكون الوصول للتويلت سهل وأنواره مفتوحه عشان ميخافش او يكسل.
- ما نستخدمش أي تأنيب او عقاب علي الطفل ولا نوصمه إنه بيبي ولا نسمح لحد من إخواته لو عارفين انهم يتريقوا أو يتكلموا في الموضوع أصلا عشان ميأثرش نفسيا عليه بالسلب اكتر ويخللي الأمور تسوء.
- لو إتاكدنا إن السبب مش نفسي مهم نستشير طبيب لإكتشاف اي سبب عضوي وعلاجه.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك