تعتبر الخياطة جزء من عملية الولادة سواء كانت ولادة طبيعية أو قيصرية، الفارق فقط هو مكان الخياطة بناء على نوع الولادة، وعليه بتختلف نوعية العناية بالجرح. جرح وآلام خياطة المهبل بعد الولادة الطبيعية له طريقة للعناية بالجرح، بتختلف عن احتياجات الخياطة التجميلية بعد الولادة القيصرية، وبيفضل السؤال الأبرز متى يلتئم جرح الخياطة بعد الولادة. وهل فيه طرق تخفف من آلام خياطة الولادة سواء طبيعة أو قيصرية.
هنا ممكن تشوفي العناية بجرح الولادة القيصرية وأفضل الكريمات بالأسعار
أفضل نصائح التخلص من آلام خياطة الولادة الطبيعية
في الظروف الطبيعية، مش هيكون في خياطة بعد الولادة الطبيعية، لإن الرحم والمهبل من المرونة إنهم يستوعبوا ويمرروا طفل بدون جروح. لكن في بعض الأحيان، ولأسباب مختلفة، زي زيادة حجم الجنين أو تعسر الولادة، أو غيرها من الأسباب بيكون في احتياج لعمل فتحة اسمها “شق العجان” لتجنب حدوث تمزق أثناء الولادة في المنطقة دي. وأحيانًا بتحصل الخياطة نتيجة التمزقات غير المقصودة، ودي خياطة بتتم بمخدر موضعي ونوع خيط قابل للتحليل يعني مش بيتفك بعد كده، بيروح لوحده.
العناية بجرح الولادة الطبيعية
خلال أسبوعين لـ 3 أسابيع، التعافي هيتم بشكل كامل. وممكن يفضل بعدها ألم بسيط هيروح مع الوقت. ولو الجرح أو التمزق اللي حصل عميق جدًا، ممكن الأم تحتاج فترة من 6لـ 8 أسابيع عشان تخف تمامًا. ولحد ما التعافي يتم بشكل كامل، دي شوية حاجات هتساعدك تخففي الألم بعد الولادة الطبيعية:
- بعد التبول، استخدمي المياه الدافية في الشطف بدل المياه الساقعة.
- اقعدي في مياه دافية لمدة 15لـ 20دقيقة
- اتجنبي البلل تمامًا. يعني في أي وقت المياه تلامس فيها منطقة الجرح، احرصي إنك تجففي المكان كويس جدًا.
- التنشيف ما يكونش بالمسح وما يكونش بعنف. التنشيف يكون بالطبطبة وبالراحة جدًا عشان الخيط ما يفكش.
- لما تنشفي يكون من قدام لورا مش العكس، لأنك لو نشفتي من ورا لقدام فانتي بتلوثي الجرح وممكن يحصل التهابات.
- المسكنات مش عيب، ما تبخليش على نفسك ما دام المسكن وصفه الدكتور.
- حاولي ما تكتميش مكان الجرح، يعني من المفيد إنك تعرضي مكان الخياطة للهوا من 15 لـ 20 دقيقة.
- خلي بالك من الإمساك في الوقت ده بالذات. والحل إنك تاكلي أكل كله ألياف عشان تمنعي الإمساك تمامًا.
- المشي مفيد ليكي.
- بلاش ترفعي أي حاجة تقيلة تمامًا. وبالراحة في كل خطوة ليكي.
التخلص من آلام خياطة الولادة القيصرية
بعد الولادة القيصرية، بتقدري تمشي بمجرد زوال مفعول البنج. لكن عشان الجرح يخف تمامًا، بتحتاجي 6 أسابيع تقريبًا. وعشان تسرعي عملية الشفاء، بتحتاجي إنك تحافظي على الجرح من أي التهاب وده بيستلزم منك الآتي:
- ما تعرضيش منطقة الجرح للمياه تمامًا.
- لو الدكتور مش منبه إنك تغطي الجرح فهيكون مفيد ليكي إنك تهوي منطقة الجرح.
- بلاش حركة عنيفة.
- بلاش تقفي قدام البوتجاز أو أي مصدر حرارة.
- ما تشيليش حاجة تقيلة.
- تجنبي التمارين الرياضية تمامًا بعد العملية القيصرية.
- خدي المسكن.
- امشي كتير.
- خدي بالك من الإمساك وبلاش أكل تقيل.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك