محتويات المقال
التفكير الزائد من أكتر المشاكل اللي بتقابلني أنا شخصيًا في حياتي، وللأسف ممكن التفكير ده يكون في حاجات تافهة جدًا ومتستاهلش وغير متوقعة، وممكن يضيع عليا وقت نوم، أو وقت مهم أنجز فيه حاجات تانية بسبب الـ Over thinking.
وطبعًا مش كل الحاجات اللي بفكر فيها بتكون تافهة، مرات بتكون مشكلة مقابلاني وعاوزه لها حل، أو قرار لازم آخده، أوحاجات المفروض أختار ما بينها.
ولقيت إن دي مش مشكلتي لوحدي، دي مشكلة سيدات كتير بيعانوا منها، وبتكون صعبة جدًا لما يكون ستايل الحياة فيه مسؤوليات وضغوطات كتير، علشان كده دورت على حلول للمشكلة دي وحبيت أشارككم بيها:
10 طرق للتعامل مع التفكير الزائد Overthinking
اقفشي نفسك
قبل ما تعرفي تتعاملي إزاي مع التفكير الزائد، اعرفي “إمتى” إنتي بتفكري كتير، أول لما تلاقي نفسك استغرقتي في التفكير أو حسيتي بالتوتر والقلق وإنتي بتفكري، وقفي نفسك، لأن وعيك باللحظة دي هو بداية طريق التغيير.
مش في كل الخيال حياة
لما بيحصل موقف، ممكن خيالك يوصلك للخيال السلبي، وده بيكون ناتج عن إن عاطفة الخوف بتكون هي اللي بتسيطر على تفكيرك في الوقت ده، فمثلًا لو إنتي مسافرة مكان حلو، بتتخيلي إن هيحصلك حادثة -لا قدر الله- فأول لما تلاقي نفسك بتفكري بالاتجاه ده، حاولي تفكري بالاتجاه المعاكس فورًا، إنتي مسافرة، يعني هنتبسط وهنعمل ذكريات حلوة جدًا.
ساعدي نفسك بالسعادة
صحيح إن التفكير الزائد من أسبابه التوتر والضغط والحياة غير السعيدة، لكن تقدري تتغلبي عليه بأنشطة تديكي شوية سعادة، زي الرياضة والتطريز والرقص والرسم وأي مواهب أو حاجات إنتي بتحبيها.
اقطعي الطريق قبل ما توصلي لآخره
لما تفكري بسلبية وتلاقي نفسك مش عارفة تحولي التفكير لإيجابي، اقطعي على نفسك حبل التفكير واسألي نفسك: هو اللي بفكر فيه ده هيفديني بإيه في المستقبل؟ أو هيغير إيه خلال سنة أو خمس سنين؟ هتلاقي إن معندكيش إجابة ترضيكي فهتوقفي التفكير ده.
تخلي عن المثالية
الطموح حاجة محببة وصفة مميزة، بس لازم تفرقي بين الطموح والمثالية، فالطموح هو سعي دايمًا للأحسن وللنجاح ولتحقيق الأهداف، لكن المثالية هي مش صفة بشرية أصلًا، فلو بتفكري طول الوقت بعدم رضا علشان إنتي مش محققة المثالية، فلازم تغيري الفكرة دي من الأصل.
متخافيش
مش معنى إنك فقدتي حد عزيز مرة، يبقى الأصل في حياتك إنك هتفقدي كل اللي بتحبيهم، ولو فشلتي في تحقيق نجاح معين مرة، مش معنى كده إنك مش هتنجحي أبدًا وهتقضي حياتك في فشل، وهكذا.
استخدمي ستوب ووتش
إذا كده كده مش قادرة توقفي تفكيرك، يبقى لازم تستغليه بشكل أحسن وممتع كمان، إزبطي الستوب ووتش على 10 دقايق -مثلًا- واكتبي كل اللي بتفكري فيه وضاغطك وتاعبك، وأول لما يخلص الوقت وقفي كتابة وتفكير.
مش هتعرفي الغيب
لو أغلب تفكيرك في المستقبل، لازم تعرفي إنك مهما عملتي مش هتعرفي المستقبل فيه إيه، مش معنى كده إنك متخططيش لحياتك المستقبلية، بالعكس فكري وخططي كويس جدًا، لكن ما تتخيليش حاجة إنتي مش عارفة هي هتحصل ولا لا، استغلي الوقت ده في حاجات تسعدك أحسن.
إنتي كويسة؟
التفكير الزائد بيحسسك دايمًا إنك مش كويسة بشكل كافي، وإن إمكانياتك قليلة، وإن السلبيات في حياتك كتير، تأكدي إن مش دي الحقيقة، وإن تفكيرك بس هو اللي مصورلك كده، لكن إنتي كويسة وعندك نقاط قوة كتيرة جدًا وعندك إمكانيات رائعة.
مارسي الامتنان
كل يوم قبل ما تنامي امتني للنعم اللي عندك، شاركي حد بتحبيه وبيحبك الامتنان، احكيله على الحاجات الكويسة في حياتك، وعلى المميزات اللي حصلت في يومك، مع الوقت التفكير السلبي هيقل جدًا جدًا.
ومن أجمل الأحاديث النبوية الشريفة في المجال ده حديث صحيح: ” يا غلام ، إني أُعلمك كلمات : احفظ الله يحفظك، احفظ الله تجده تجاهك إذا سأَلت فاسأَل الله، وإذا استعنت فاستعن بالله، واعلم أن الأُمة لو اجتمعت على أَن ينفعـوك بشيء، لم ينفعوك إلا بشيء قد كتبه الله لك، وإن اجتمعوا على أن يضروك بشيء، لم يضروك إلا بشيء قد كتبه الله عليك، رفعت الأقلام وجفت الصحف”
معناه بيطمن جدًا، وبيخلي العقل يستريح من التفكير المجهد.
المصادر:
positivityblog.com
inc.com
medium.com
islamweb.net
3 تعليقات
Love it and it was on time ❤
مبسوطة جدًا إن المقال عجبك.
حلو اوي ومفيد حقيقي
ياريت مقالات من النوعية دي كتير
وخاصة كل مشاكل المرأه الحقيقية