يعتبر السيلوليت من المشاكل اللي بتواجهها معظم السيدات واللي بتخلي شكل الجلد غير متناسق ومترهل والسبب الدقيق لظهورها غير معروف بس فيه عوامل كتير بستاعد على ظهورها وزيادتها زي لخبطة الهرمونات والوزن الزائد وقلة الرياضة.
في المقال ده هنتعرف على طرق علاج السيلوليت اللي ممكن تقلل من ظهوره أو تحسن من شكله.
الطرق الطبيعية لعلاج السيلوليت
التمارين الرياضية:
الرياضة هي أنسب طريقة للوقاية من ظهور السيلوليت وكمان ليها فعالية فى تقليل شكلها المترهل لإنها بتساعد على حرق الدهون وشد العضلات، عشان كده مدربين Rahet Bally Mama Transformation Program بينصحوكي بالمواظبة على ممارسة الرياضة حتى لو نص ساعة يومياً ومن أحسن التمارين للقضاء على السيلوليت: السكواتس والـLunges و الـPlanks لو عندك مشكلة صحية أو مش قادرة تعملي التمارين دي، ممكن تمشي لمدة نص ساعة وتزودي نشاطك البدني فى البيت وتستخدمي السلم بدلاً من الأسانسير.
نظام غذائي متوازن
زي ما وضحنا قبل كده مش شرط الوزن الزائد يكون سبب فى ظهوره لكن نسبة الدهون فى الجسم ممكن تزود السيلوليت عشان كده بننصحك إنك تقللي الأملاح اللي بتحبس الميه فى الجسم والمعجنات والسكريات والزيوت المهدرجة اللي بتتحول لدهون فى الجسم. وطبعًا مهم جدًا إنك تشربي ميه لأنها بتحتفظ بنضارة البشرة وبتساعد على حرق الدهون وكمان تاكلي الخضروات والفاكهة اللي بتحتوي على ميه زي الخس والخيار والبطيخ.
سكراب القهوة
سكراب القهوة غني بالكافيين ومضادات الأكسدة اللي بتساعد على تنشيط الدورة الدموية فى مناطق السيلوليت وكمان بيقشر البشرة ويشيل الخلايا الميتة عشان كده بننصحك تعملي السكراب ده مرتين في الاسبوع وهتحسي بنتايج أفضل لو بتمارسي الرياضة كمان.
ترطيب البشرة
ترطيب البشرة بيساعد على نعومة الجلد وتقليل السيلوليت وبينشط الدورة الدموية عشان كده ممكن ترطبي بشرتك فى الأماكن دي يوميًا بإستخدام مرطبات طبيعية بتساعد على شد الجلد زي زيت جوز الهند وجل صبار الألوفيرا وتدلكي بالمرطبات دي لمدة دقيقتين وتكرري مرتين أو تلات مرات عملية الترطيب دي.
التدليك
التدليك بيساعد على تقليل التوتر وينشط الدورة الدموية، ممكن تستعيني بجلسات تدليك متخصصة لعمل المساج أو ممكن تدلكي بنفسك المناطق المصابة بإستخدام كرة التدليك.
الطرق الموضحة في المقال ده مش بتضمن إنها هتقضي تمامًا على السيلوليت بس ممكن تخفف من شكلها ومش مهم إنك تتخلصي منه نهائي لكن المهم إنك تحافظي على صحتك ونضارة بشرتك من خلال شوية الخطوات البسيطة اللي إتكلمنا فيها في الموضوع ده.
التعليق باستخدام حساب فيس بوك