فصل الصيف مش بيطل علينا بفسحه ولا أجازته ولا مايوهاته بس، فصل الصيف بينورنا وبييجي معاه ضيف تقيل مش مرغوب ابدًا، الضيف اللي بالرغم من حجمه الضئيل جدًا إلا إنه بيرعب أمهات كتير، الضيف الغلس التقيل ده هو النمل.. النمل اللي مع أول طلعة حر تلاقيه طلع من جحوره وبينطلق طايح في كل مكان عشان يجهز حاله لبياته الشتوي الجاي.. ومع وجود أطفال في البيت الموضوع بيصعب أكتر بسبب قرصته المرعبة والفتافيت اللي ف كل مكان اللي بتخليه ينتشر أكتر في كل مكان، ده غير إنك متقدريش تتخلصي منه بمبيدات عشان الحساسية والريحة النفاذة المؤذية للأطفال.. فلو إنتي عندك مشكلة النمل السنة دي اقري المقال ده عشان نعرفك على طرق آمنة تتخلصي منه بطرق تحافظ على صحة ولادك وتحميهم من مخاطر المبيدات.
رشاش الخل
الخل بيعتبر من المواد النفاذة اللي النمل مش بيطيقها، لو ظهر عندك النمل في مكان اعملي بخاخة نصها ميه ونصها خل ويفضل إنه ميكونش خل طعام ويكون الخل المركز ورشيه على النمل والأماكن اللي ظهر فيها، وكرري الرش كل يومين لحد ما هيقل بالتدريج.
أفضل منتجات علاج قرص الناموس في الصيف
التوابل
بعض التوابل بتكون ريحتها كريهة للنمل زي القرفة والشطة الحارة، رشي في أماكن ظهور النمل القرفة أو الشطة أو ممكن تخلطي التوابل مع الميه في بخاخة وترشيه على النمل.
طرق طبيعية لطرد الناموس من المنزل
قشر الخيار
يعتبر قشر الخيار من المواد السامة بالنسبة للنمل اللي بتخليه يهرب منها، احتفظي بقشر الخيار وحطيه في الاماكن اللي بيظهر فيها وحطيه في الأماكن اللي خايفة يظهر فيها زي المطبخ وأوض الأطفال.
أقراص طرد النمل
فيه بعض المنتجات اللي بتحتوي على مواد بتجذب النمل ليها فالنمل بيقوم بإمتصاصها وبيحمل المواد دي لوكره فبتقضي عليه نهائيًا.. المنتج إسمه هش وسعره رخيص بيتباع في السوبر ماركت والهايبر وممكن تشتريه أونلاين من هنا، بتحطيه في أماكن ظهوره وفعاليته بتستمر لحد ٣ شهور وسعره تقريبًا بيكون حوالي ١٧ جنيه والعبوة فيها 4 أقراص.. بالرغم من إن الاقراص دي آمنة لكن يفضل تحطيها بعيد عن متناول أيد الأطفال.
الوقاية
النمل بيستغل الفتحات والشقوق عشان يكون الوكر بتاعه، لو قدرتي توصلي للفتحة اللي بيظهر منها، حاولي تستخدمي الفوم أو الجبس عشان تسديها وتمنعي ظهوره بشكل نهائي.
ودي كانت اجتهادات شخصية عشان تتخلصي من النمل بطرق آمنة عشان تحمي ولادك، لو لقيتي طريقة جديدة عرفتي تتخلصي منها من النمل بطريقة طبيعية، شاركينا في كومينت أسفل المقال
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك