محتويات المقال
فيه ناس أول ما تسمع كلمة “التربية الجنسية” بتحس إنها حاجة عيب وإزاي نتكلم مع ولادنا فيها. بس الحقيقة إن التربية أو الثقافة الجنسية بقت شيء أساسي في التربية ما نقدرش نستغنى عنه. بعد الانفتاح التكنولوجي الكبير وسهولة وصول معلومات مغلوطة لولادنا بقى واجب علينا نوصل لهم المعلومات الصح من بدري وبطريقة مناسبة لسنهم، ده غير إن الدراسات اللي قامت بها اليونيسكو من سنة 2007 بتؤكد أن التربية الجنسية بتؤخّر ظهور السلوك الجنسي عند الأطفال وبتزوّد وعيهم ورفضهم للممارسات الغلط، على عكس ما هو متوَقع.
في المقال دا، هنقول لك على المعلومات اللي تقدري تشرحيها لولادك بطريقة مبسطة عن الثقافة الجنسية باختلاف أعمارهم.
التربية الجنسية أول 3 سنين:
معظمنا بيتخيل إن التربية الجنسية بتبدأ لما ولادنا يبدأوا يفهموا عنها أو يتعرضوا لمواقف تخليهم يسألوا لكن الحقيقة إننا محتاجين من أول سنين في عمر الطفل نعرفّه حاجات:
- أول ما الطفل يتعود على الحمام ويتخلص من الحفاض، بيبدأ فضوله لاكتشاف أعضائه التناسلية، وقتها ده السن المناسب عشان تعرّفيه عن الجزء الخاص وتعرفيه بأسامي الأعضاء الصح والمعروفة.
- ابدأي كلميه عن خصوصية الأعضاء دي وأن مش مسموح لأي حد إنه يشوفها غيرك انتِ وباباه، وإنه غلط إن أي حد يكشف الجزء الخاص من جسمه قصاد أي شخص تاني.
- ما تغصبيش ابنك أبدًا يبوس حد أو تسيبي شخص كبير يبوسه بالعافية بدافع هزار أو حب. لازم يتعود إن جسمه حقه وهو اللي يقرر اللمسة المريحة بالنسبة له.
التربية الجنسية من 3 سنين لـ 7 سنين:
كل ما الطفل بيكبر كل ما بنزوّد معلومات بالتدريج تكون مناسبة لنمو عقله وتطوره في المرحلة دي أسئلة الأطفال بتزيد عن جسمهم وأجسام اللي حواليهم وبيبقوا محتاجين إجابات مقنعة ترضي فضولهم.
- نقدر نشرح لهم بطريقة علمية مناسبة لفهمهم الفرق بين الجهاز التناسلي للبنت وللولد باستخدام موسوعات علمية موجودة في المكتبات ونشرح بطريقة بسيطة واحنا بنشرح باقي أجهزة الجسم.
- ممكن تستخدموا كتاب “أنا غالي” الموجود في مكتبة ديوان للتاكيد على فكرة إن جسمهم غالي ومش من حق حد يلمسه. وتقدري تستخدكي كارت خصومات راحة بالي في مكتبة ديوان.
التربية الجنسية من 8 لـ 10 سنين:
في السن ده بتبدأ الأمهات تلاحظ تغييرات كتير في سلوك وطريقة تفكير أولادهم ووقتها بيشغل بالهم أسئلة زي “هو البيبي بييجي إزاي؟” أو “أصحابي بيقولوا لي إن الراجل والست بيجيبوا البيبي مع بعض” أو “هو الراجل والست بيدخلوا في بعض إزاي؟” الأسئلة الحساسة دي بتخلي الأم تتوتر وتتهرب من السؤال أو بمعنى أصح تلهي ابنها أو بنتها في أي حاجة متخيلة إنهم هينسوا بالطريقة دي.
فيفضل من قبلها كل أم تكون محضرة نفسها للمرحلة العمرية دي وتوصل لهم المعلومات بطريقة تدريجية وبلغة مناسبة لسنه.
أمثلة لأسئلة الأطفال الجنسية وإجابات مبسطة:
- البيبي بييجي منين؟!
بييجي من مكان مخصوص في بطن ماما ربنا بيجهزه عشان يحافظ علي البيبي وهو جوا.
- طيب وهو إيه اللي حط البيبي جوه بطن ماما من الأول؟!
لما بابا وماما بقوا يحبوا بعض واتجوزوا في حاجة اسمها حيوان منوي موجود في جسم بابا دخلت جوه جسم ماما عشان تقدر تكون بيبي، ولو ما كنتيش شرحتي لطفلك الجهاز التناسلي للراجل والست تبقي محتاجة تشرحيه بالاستعانة بالكتب والمجسمات المناسبة لسنه.
في النهاية، بنفكرك بأهمية ردك على كل أسئلة طفلك ومساعدته يعبر عن كل التساؤلات اللي بتدور في دماغه، مع إنك تحافظي على إجابات منطقية ومقنعة لأنه لو ما عرفش منك واتطمن واتأكد إنك مصدر ثقته، هيضطر يسأل أصحابه أو غيرهم ووقتها مش هتكوني عارفة إذا كان اللي وصله ده معلومات صح ولّا غلط.
المصادر:
كتاب معين الآباء في التربية الجنسية للأبناء. د.مأمون مبيض.
https://www.heysigmund.com/kid-needs-know-age-age-guide-sex-education/
https://www.mayoclinic.org/healthy-lifestyle/sexual-health/in-depth/sex-education/art-2004410
.
التعليق باستخدام حساب فيس بوك