فيه حاجات بتسهل علينا حياتنا كتير. لكن ممكن نكون عشان ما عملناهاش قبل كدا مش واثقين قوي في الخطوة. التسوق عبر الإنترنت أو التسوق أون لاين حاجة بتسهل علينا وبتوفرعلينا وقت طويل من النزول والمشاوير والزحمة.
أهم نصائح التسوق أون لاين
- بصي على كل (أو على الأقل كتير من) التعليقات والتقييمات اللي على المنتج نفسه على مواقع التسوق أون لاين. هتلاقي ناس كاتبين بس التقييم بالنجوم، لكن هتلاقي ناس كمان كاتبين كلام عن المنتج. لو أقل من 70% إيجابي أو التقييمات السلبية فيها حاجات ما ينفعش تتغاضي عنها، يبقى ما تشتريش المنتج دا.
- اقري مقاسات كل حاجة. كل نوع كريم، كل فستان أو لبس،كل شامبو، كل منتج أيًا كان بتبصي عليه، اقري مقاسات كل حاجة فيه. لأن الصورة مش دايمًا هتبقى دقيقة في المقاسات .. موضوع المقاسات ده مهم جدًا خصوصًأ في منتجات زي الشنط والأحذية وعلب الطعام مثلا.
- مش أول حاجة تلفت نظرك تشتريها. خدي لفة في أكتر من موقع تسوق وشوفي المنتج نفسه (ساعات بعض المواقع بتعمل تخفيضات على منتجات معينة،
فممكن تلاقي نفس المنتج بسعر أقل). وكمان شوفي منتجات تانية لها نفس الاستخدام، ممكن
تلاقي منتج تاني واخد تقييم أحسن وله نفس الوظيفة. - دوري لو فيه كوبونات خصم أو خيارات شحن مجاني للموقع. بعض المواقع زي سوق وأمازون بيعملوا ساعات كوبونات خصم أو شحن مجاني لمنتجات معينة أو لو مشترياتك زادت على مبلغ معين.
- يفضل ما تشتريش بكروت كريديت كارد إلا لو واثقة تمامًا من الموقع اللي بتشتري منه أو الموقع له سمعة عالمية واسم يخاف عليه. اختاري دايمًا إنك تدفعي عند الاستلام لو مش عارفة.
- اطلبي آراء ناس مختلفة. لو حد من أصحابك جرب يشتري من موقع معين، اسأليهم عن: مدة الانتظار، الحاجة وصلت سليمة ولا لا، الحاجة وصلت مظبوطة زي ما طلبوها ولا لأ.
- بصي على صفحات السوشيال ميديا بتاعة الموقع نفسه، مش المنتج، الموقع. أوقات ممكن ما يكونش على الموقع تقييم لكن تلاقي على صفحة فيسبوك مثلا تقييم للشركة أو تعليقات سلبية على مواعيدهم أو سياساتهم إلخ.
- لو قررتي إنك فعلًا عايزة الحاجة دي، لازم تقري سياسة الاسترجاع والاستبدال. اتأكدي إنك تقدري ترجعي المنتج أو تستبدليه عشان لو استلمتيه وما عجبكيش ما تبقيش اتورطتي فيه.اتأكدي إن السعر اللي مكتوب هو اللي هتدفعيه. كتير بعد ما تختاري المنتج وتشوفي سعر الشحن، بتلاقي ضرايب تانية مطلوب تدفعيها، فدايمًا خدي بالك من المجموع بتاع المبلغ.
- لو هتشتري حاجة من جروب على فيسبوك، اتأكدي إنك عارفة حد من الجروب. يا إما من المديرين يا إما من المتسوقين. وحاولي تقري على قد ما تقدري التعليقات على كل البوستات عشان تشوفي لو فيه شكاوى معينة من حاجة. كمان، وانتِ بتعملي أوردر، اطلبي إنك يبقى عندك خيار إنك ترجعيها مع عامل التوصيل لو ما عجبتكيش، خاصة لو حاجة عليها علاقة بمقاس أو خامة معينة.
- اشتري كارت خصومات راحة بالي، الكارت بتاعنا هو أول كارت مخصوص للأمهات بيديكي خصومات في أماكن كتير. و ممكن تشوفي تطبيق كارت راحة بالي من هنا علشان تعرفي كل الأماكن إللي بنقدم فيها التخفيضات.
ممكن تشوفي كمان:
ازاي تتسوقي في الـ بلاك فرايداي Black Friday زي المحترفين
شوفي هنا .. لكل أم: 10 تطبيقات لا غنى عنها على موبايلك
نتمنى لك تجربة تسوق سعيدة ومفيدة. قولي لنا في التعليقات لو عندك نصايح تانية للشوبينج أونلاين أو لو عندك تجربة حابة تشاركينا بها.
التعليق باستخدام حساب فيس بوك