التشنج المهبلي .. إزاي بيأثر على العلاقة الزوجية؟

التشنج المهبلي Vaginismus هو حالة بتحصل لبعض الستات وهي إن المهبل عندهم عضلاته بتشد جامد وتقفل تمامًا لو أي حاجة حاولت تدخله، سواء  عضو الزوج أو جهاز السونار المهبلي أو حتى تامبون (السدادة القطنية). ممكن يتراوح التشنج المهبلي من الإحساس بعدم ارتياح ووجع لحد ما يكون فيه وجع شديد جدًا وعدم قدرة تمامًا على ممارسة العلاقة الحميمة.

 في الموضوع ده هنكلمك عن حالة التشنج المهبلي والعلاقة الزوجية وإيه أعراضه وأسباب التشنج المهبلي بالتفصيل وإزاي نعالجه.

شوفي هنا .. حاجات مهمة عن الإفرازات المهبلية وخصوبة المرأة

أعراض التشنج المهبلي:

• أول عرض بيبان إنه فيه مشكلة في التشنج المهبلي والعلاقة الحميمة (الجماع). فيه ستات بيحسوا إن الموضوع وكأنه فيه حيطة سد وما يقدروش يعملوا أي حاجة عشان الإحساس دا يروح. غالبًا الألم بيكون بس في مرحلة الإيلاج في الجنس ومش في المراحل اللي قبل كدا من مداعبة وغيره. وغالبًا الألم بينتهي بمجرد ما الزوج يبعد.
• في ستات تانية بتتمكن من ممارسة الجنس عن طريق الإيلاج لكن بيحسوا بألم شديد وكأن فيه حاجة بتتقطع جواهم وغالبًا بيحصل لهم نزيف مهبلي (غير ناتج عن فض غشاء البكارة).
• ستات كتير من اللي بيعانوا من التشنج المهبلي ما بيقدروش على دخول أي شيء تاني في المهبل زي السدادة القطنية أو السونار. لكن بعض الحالات بيقدروا على دخول السدادة أو السونار لكن مش الإيلاج في الجنس.

­­

أسباب التشنج المهبلي في العلاقة الزوجية:

الدكاترة ماقدروش يحددوا بالظبط أسباب التشنج المهبلي. لكن ربطوا بينه وبين القلق والخوف من ممارسة الجنس. كون ممارسة الجنس مربوطة في أذهاننا من الطفولة بالعيب والحرام، ساعات جسمنا ما بيقدرش يميز بعد الجواز إن دا مش عيب ومش حرام. كمان ختان الإناث بيؤثر بالسلب وممكن يساعد في وجود تشنج مهبلي وآلام في ممارسة الجنس لأن العضو نفسه اختزن الألم وبقى مرتبط أي حاجة فيه بألم.

لو بتتألمي وانتِ في حالة الجماع، مش شرط يكون عندك تشنج مهبلي، ممكن يكون عندك التهابات بتسبب ألم. وعشان كدا بننصحك تروحي لدكتور النسا عشان يعرف بالظبط إيه سبب الوجع.

علاج التشنج المهبلي:

لازم ننوه في الأول إن العلاج ممكن ياخد منك وقت ومجهود وعايز صبر. كمان بيبقى محتاج منك إنك تعرفي جسمك كويس، انتِ أكتر واحدة هتعرفي لو السبب في حالتك هو القلق anxiety أو الخوف أو الصدمة trauma (زي الختان أو التعرض لاعتداء جنسي في سن صغيرة) ولا مجرد عضلات مش قادرة تتحكمي فيها.

• في حالة لو السبب هو قلق أو خوف أو صدمة، بننصحك تزوري دكتور أو دكتورة نفسية. العلاج النفسي بيساعد جدًا على تخطي دا.
  
• في حالة إن السبب يكون شد العضلات وعدم القدرة على التحكم فيها، بننصحك تعملي تمرين اسمه كيجل Kegel.

تمارين كيجل بسيطة جدًا وتقدري تعمليها لوحدك في الحمام. لما تكوني بتتخلصي من سوايل جسمك في الحمام (وكأنك بتمسكي البول)، امسكي العضلة، كأنك مش عايزة السائل ينزل.

افضلي ماسكة العضلة لمدة ثانيتين لعشر ثواني وبعدين ارخي العضلة.

كرري التمرين لعشرين مرة في المرة الواحدة. وتقدري تعمليها أي عدد مرات في اليوم.

• لما تكرري تمارين كيجل لكذا يوم، ممكن تعمليها بس تحطي عقلة صباع وانتِ بتعمليها. لكن اتأكدي إن ضوافرك مقصوصة وإيدك نضيفة وممكن تستخدمي چل على صباعك وانتِ بتدخليه عشان يسهل عليكي.
• بعد ما تتعودي على التمرين، ممكن تعمليه في البانيو المليان ميا دافية وهيكون التمرين أسهل وتقدري تدخلي أكتر من عقلة صباع. وبعدين لما ترتاحي للصباع ممكن تجربي صباعين في وقت واحد. لحد ما تلاقي نفسك مستعدة للإيلاج مع الزوج.
• ممكن تطلبي من جوزك إنكم تقضوا وقت أطول في المداعبة ودا هيمهد جسمك للإيلاج. واستخدموا چل أول كذا مرة عشان ما تتوجعيش. 

شوفي هنا .. 5 طرق تخلصك من آلام الدورة الشهرية الحادة

نتمنى لك دوام الصحة، وحياة جنسية سعيدة مع جوزك.