محتويات المقال
سبب ارتفاع درجة حرارة الطفل عادة بيكون سبب خارجي أو سبب داخلي، سبب خارجي زي إن الطقس يكون حر والرطوبة مرتفعة مع لبس هدوم كتيرة، وسبب داخلي زي إن الطفل يكون عنده عدوى فيروسية أو بكتيريا، أو زيادة نشاط للغدة الدرقية.
علشان كده مش لازم الأم تقلق على صحة طفلها كل ما ارتفعت درجة حرارة ابنها، طالما الطفل بكامل نشاطه بيجري ويلعب وياكل ويشرب بشكل طبيعي.
الأطباء بينصحوا الأم إنها ما تقلقش لو طفلها جاتله تشنجات حرارية لأول مرة، لازم تتعامل بهدوء مع ارتفاع درجة الحرارة، لكن لو الطفل بتجيله تشنجات حرارية بشكل متكرر فدول اللي لازم نتعامل معاهم بشكل حاسم ودرجة الحرارة لازم تنزل بسرعة.
إزاي تقيسي درجة حرارة طفلك؟
- ممكن تستخدمي ميزان الحرارة الرقمي إنك تحطيه تحت الإبط لغاية ما يطلع صوت صفارة، أو تستخدمي الزئبقي بإنك تحطيه أسفل الإبط لمدة من 2 لـ 3 دقايق، بس في الحالتين بتزودي نص درجة في القراءة.
- ممكن تستخدميه بوضعه داحل فتحة الشرج بنفس الطريقة مع طرح نص درجة في القراية، أو تحت اللسان وبتكون القراية مضبوطة.
- لو حبيتي تحسي بدرجة الحرارة لو عالية أو منخفضة بإيدك بتستخدمي ظهر ايدك على بطن الطفل أو أسفل الإبط.
تتعاملي إزاي مع ارتفاع درجة الحرارة؟
- لو كانت درجة الحرارة أقل من 38 ونص والطفل لسه نشيط وبيلعب بشكل طبيعي، فما تعمليش حاجة غير إنك تخففي طبقة واحدة من لبسه، وتهوي الأوضة بشكل كويس وتشغلي المروحة أو تضبطي التكييف في الصيف على درجة 24، اديله سوايل كتيرة عشان تحميه من الجفاف، وخليه يلعب أحسن من النوم في السرير.
- لو درجة الحرارة كانت أعلى من 38 ونص فما تقلقيش برضو واستخدمي خافض للحرارة زي الباراسيتامول أو الإيبو بروفين تحت إشراف الطبيب طبعا.
ملحوظة:
- دواء الباراسيتامول آمن من الولادة، الإيبيوبروفين (بروفين) آمن من عمر 6 أشهر، والديكلوفيناك لبوس (دولفين، فولتارين) مش بينصح به قبل عمر السنة.
- استخدام الديكلوفيناك لبوس (دولفين، فولتارين) ممنوع تماماً في حالة إصابة الطفل بأنيميا الفول، ومش بينصح به كمان في حالة الحساسية الشديدة أو التهابات الأنف المزمنة، أما حالات الحساسية البسيطة فمسموح بيه.
- في معلومة منتشرة أن خوافض الحرارة مش بتشتغل مع ارتفاع درجة الحرارة لما فوق ال 39 درجة، وهي معلومة غير صحيحة، الخوافض بتعمل تأثير ولكن بعد نصف ساعة.
لو درجة الحرارة ما نزلتش بعد استخدام خافض الحرارة؟
أكدت الأبحاث أن استخدام كمادات بالماء الفاتر مع خافض الحرارة في أول نص ساعة بيدي نتائج أفضل بكثير من استخدام الخافض لوحده.
نعمل كمادات إزاي؟
- البانيو أو الحوض يتملوا بمياه دافية لحد ارتفاع 10 سنتيمترات (اتأكدي من حرارة الميه باستخدام ظهر يدك).
- قعدي الطفل في المياه، وباستخدام قطعة من القطن أو اسفنجة قومي بمسح الصدر والظهر والبطن والذراعين والأرجل بالماء، ولمدة خمس دقايق.
- مش مطلوب مسح الرأس، ولازم تتجنبي المياه الباردة والتلج، لأنهم بيزيدوا من الرعشة وممكن يرفعوا درجة الحرارة، وممكن يسببوا صدمة بالقلب لا قدر الله.
- ابعدي كمان عن استخدام الكحول لأن استنشاقه ممكن يأدي للإغماء.
- وما تغطيش الطفل لو لقيتيه بيرتعش أو عشان يعرق فيخف، لأن التغطية بتزيد درجة الحرارة.
دليلك السريع للتعامل مع نزلات برد طفلك في الشتاء
معظم أسباب ارتفاع درجة الحرارة فيروسية، عشان كده ما تستخدميش مضاد حيوي أبدا لأن ده هيزيد من توحش الميكروب. وفي النهاية مهم إنك تعرفي إن ارتفاع درجة الحرارة ده حاجة كويسة وإيجابية لأن ده معناه إن الجهاز المناعي للجسم بيقاوم الميكروب وده معناه إن طفلك مناعته كويسة وأخيرًا النصائح دي مش هتغنيكي أبدا عن زيارة الطبيب المختص.
المصادر:
مقال لـ د. أحمد الخطيب أخصائي طب الأطفال وحديثي الولادة .
التعليق باستخدام حساب فيس بوك