أهالي الأطفال ذوي الإحتياجات الخاصة بيكون عليهم load أكبر بكتير من أي أهالي تانية، لأن بيكون مطلوب منهم مش بس يشيلوا هم تربية طفلهم تربية سليمة لكن كمان إن إختلافه مايمنعوش من الأندماج في الحياة وسط اللي حواليه بسهولة.
عشان كدة في المقال ده هنتكلم معاكوا في اهم نقط وخطوات التعامل مع الأطفال ذوي الإحتياجات الخاصة.
خطوات التعامل مع الأطفال ذوي الإحتياجات الخاصة
- أول ما بنعرف خبر إن الطفل من ذوي الإحتياجات الخاصة بنكون متلخبطين وبنعدي بمشاعر كتيرة وكبيرة بس المهم بعد ما نتخطي المرحلة ده إننا نوصل لمرحلة “القبول”، بأننا نقبل حالة وإحتياج وغختلاف طفلنا ده بكل ما فيه لأن ده أول خطوة لقبول الطفل لنفسه.
- اهم وأول خطوة هي إننا هي إننا نوفر جو صحي داخل الأسرة للطفل يكبر فيه حاسس بالقبول والحب الغير مشروط وإننا مش بنقارنه بغيره ولا حتي بينا وبين نفسنا.
- نشتغل من سن صغيرعلي مهاراته الإجتماعية والحياتية بصورة طبيعية في حضانات ومدارس بتقبل الدمج.
- مهم إننا نتاكد إن إحنا كأهل مش عازلينه بأي صورة عن الحياة الطبيعية اللي بيعيشها أي طفل في سنه سواء ده كان بدافع خوف عليه من تجارب مش لطيفة أو تنمرأو تعليقات الناس.
- طبيعي إن الطفل ذوي القدرات الخاصة بيكون واخد من إهتمامنا ووقتنا اكتر شوية لكن في نفس الوقت لازم نتأكد إننا بنديله فرصة يعتمد علي نفسه وبنهيأله الظروف المناسبة لدعمه بالأدوات الكافيه للإعتماد علي نفسه مع تقديم طبعا الدعم العاطفي اللي محتاجه.
- نتأكد إننا مش محسسينه طول الوقت إنه محور إهتمام البيت كله الأول والأخير عشان حتي منشعلش الغيرة بينه وبين إخواته، ومهم كمان إننا منكونش بنحميه حماية زايدة تمنعه من تجربة حياة طبيعية.
- ندرس حالته كويس ونقرا عنها ونشوف تجارب غيرنا لحالات مشابهة لحالة طفلنا عشان نكون جاهزين للإجابة علي أي سؤال من الطفل بخضوض غختلافه وندعمه بالشرح والمعلومات الكفاية اللي من حقه يفهمها.
- نحكيله عن تجارب ناجحة لأطفال عندهم نفس التحدي بتاعه ونشجعه علي الإنجاز ومنكونش دايما حطينه تحت إحساس “إنه صعبان علينا” وبنتعامل علي الأساس ده عشان الطفل يصدق في نفسه ويعرف إنه يقدر ينجح وينتج مهما كان مختلف او له إحتياجات او قدرات مختلفة.
وطبعا مهم نعرف إن قبولنا لحال ولادنا مهما كان وثقتنا فيهم ونظرتنا ليهم بإيجابية هي ده اللي هتنعكس علي الطريقة اللي بيشوفوا بيها نفسهم وبيتعاملوا بيها مع الدنيا وهي ده كمان اللي هتعزز ثقة الطفل في نفسه وتخليه عنده قدرة علي مواجهة أي تنمر او مضايقة بيتعرضلها من غير ما يتهز أو يتأثر.
What’s your Reaction?
التعليق باستخدام حساب فيس بوك