محتويات المقال
الأطفال اللي بتتربي وتكبر في وجود حيوان أليف في البيت بالذات كمان لو كلب، بيكونوا معتبرينه صاحبهم، وفي وفرد من أفراد الأسرة اللي ما يقدروش يستغنوا عنه، وللأسف لو تعب أو كبر في السن، فراقه بيبقى من أصعب الحاجات اللي ممكن الطفل يقبلها، موت الحيوان الأليف بالنسبة للطفل زي موت أقرب الناس له بالظبط، وعشان كده، قررت أكتب مقال النهارده يكون فيه بعض النقط المهمة اللي نركز فيها لو عدينا مع ولادنا بموقف زي ده، لإن التعامل مع حزن الطفل بشكل صحيح من جانب الأهل وقت موت الحيوان الأليف هيعلّم الطفل مهارات مهمة كتير تفيده طول عمره بعد كده.
أهم نصائح التعامل مع حزن الطفل
-
ما تضحكوش عليهم
بنتخيل ساعات إننا لما نكذب على ولادنا ونقول لهم إن الكلب هرب مثلًا أو تاه أو رجع لمامته، احنا كده بنحميهم من مشاعر الحزن أو على الأقل هيكون وقعها أخف عليهم، لكن الحقيقة إن تخبية الحقيقة عنهم هتخليهم يفقدوا ثقتهم فينا لو سمعوا الحقيقة من أي مصدر تاني. ده غير إن حمايتهم من الأخبار الصعبة دي مش مفيدة ليهم بالشكل اللي احنا متخيلينه. بالعكس، فرصتنا وهم صغيرين وفي حضننا ندرّبهم على شكل الدنيا اللي هيشوفوه بعدين.
-
عرّفوهم الحقيقة من غير تزويق على قد سنهم
يعني لو الكلب عيان، نبدأ نتكلم معاهم بطريقة مناسبة لسنهم عن مرضه، وإننا بنحاول نساعده ونعرّفهم الدكاترة هيقدروا يعملوا إيه معاه، ونبدأ نهيئهم نفسيًا إن الحيوانات زي الناس لها وقت بتقضيه في الدنيا ولما بيخلص بيروحوا لربنا باختلاف الطريقة (يعني ما نربطهاش بمرض مثلًا عشان ما يخافوش من فكرة المرض عامة بعد كده).
-
استعدوا لرد فعلهم وشاركوهم مشاعرهم
بعد موت الحيوان الأليف الطفل بيبدأ يحس بالوحدة، بالغضب. وفيه أطفال حزنها بيبان بصورة تغيير عام في السلوك، وده اللي مطلوب مننا نكون فاهمينه ومتقبلينه وبنساعدهم يخرجوا منه. بإننا نفهمهم إن مشاعرهم ده طبيعية وإننا كمان حاسّين بزعل على الكلب بتاعهم وفاهمين هم بيعدّوا بإيه وفاهمين هو قد إيه غالي عليهم، وممكن لو عندنا أي تجارب لينا مشابهة عدينا بيها واحنا صغيرين نحكي لهم عليهم ونشاركهم عملنا إيه عشان نخرج من حالة الحزن دي. الأطفال بترتاح لما تحس إن اللي حاسين بيه ده طبيعي ومقبول وإن الكبار كمان بيعدّوا بيه زيهم وده بيخليهم يعبروا بطريقة مريحة أكتر عن مشاعرهم، فيعدوا أسرع من الحزن وألم الفقد.
-
جاوبوا على كل أسئلتهم
بعد موت الحيوان الأليف بيفضل الطفل فترة متأثر بفكرة الموت عامة أو المرض أو شكل الحياة بعد الموت وبيسألوا كتير، فمهم إننا نكون مجهزين إجابات بطريقة بسيطة. والسؤال اللي ما نعرفش إجابته عادي جدًا إننا نقول لهم “هاسأل وارد عليك”.
-
نفكر معاهم ازاي نتأقلم بعد كده
نحكي معاهم القصص اللي بتضحك اللذيذة اللي عيشناها مع الكلب بتاعهم، نشجّعهم نجمع الصور بتاعته معانا ونعمل بيها تابلوه كبير ونعلّقه أو ألبوم صور كل ما يوحشنا نتفرج عليه، التفكير في الذكريات السعيدة والصور الحلوة، هتخلّي مخهم يتغلب بصورة أفضل على أفكار ومشاعر الحزن اللي ارتبطت بمرض أو موت حيوانهم الأليف وتبدّلها بالأفكار ومشاعر الذكريات السعيدة اللي عاشوها مع بعض.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك