زيادة الوزن عند ناس كتير بتمثل مشكلة كبيرة، وبيقابلوها بحلول مش دايمًا بتكون مناسبة، زي الريجيم القاسي، أو الأنظمة الغذائية اللي نسب العناصر فيها غير متناسبة مع الجسم، أو في ناس بتمشي ورا أي مصطلحات جديدة زي الدايت اللي على حسب فصيلة الدم وهكذا، ومن ضمن المصطلحات الموجودة دلوقتي في أنظمة التغذية هي: “التغذية الحدسية”، وده اللي هنعرف معناه في المقال ده، وهنتكلم في الـ 10 مبادئ للتغذية الحدسية:
-
إيه هي التغذية الحدسية:
هي ديناميكية تكامل العقل والجسد،بين الغريزة والعاطفة والتفكير العقلاني، أو هي طريقة حياة بتركز على الاتصال الذاتي، وده اللي هنعرف تفاصيله في المبادئ الـ 10 للتغذية الحدسية.
-
المبادئ الـ 10 للتغذية الحدسية:
- ارفضي عقلية النظام الغذائي.
- احترمي جوعك.
- تصالحي مع الأكل.
- اتحدي تنبيهات الطعام في عقلك.
- ارضي واستمتعي.
- اشبعي.
- تعاملي مع مشاعرك بلطف.
- احترمي جسمك.
- اتحركي.
- اتغذي بلطف.
ودلوقتي هنقولك تفاصيل كل مبدأ:
-
ارفضي التفكير في النظام الغذائي:
تخلصي من كل مقالات الريجيمات، ومن رسائل الواتساب اللي بتتكلم عن أنظمة الدايت، وبتحسسك إنك كل مرة بتفشلي في إنقاص وزنك، وافتكري كام مرة عملتي ريجيم ورجعتي زدتي الوزن اللي نقصتيه كله وأكتر، اتحرري من كل الأنظمة دي.
-
احترمي جوعك:
لما تجوعي كلي وشبّعي جسمك بالطاقة والكربوهيدرات، لكن في نفس الوقت فعّلي في جسمك خاصية التوقف عن الأكل فور لحظة الشبع، وفي نفس الوقت ما تسيبيش نفسك للجوع المفرط وبعدين تاكلي، لإن ساعتها مش هتقدري تتحكمي في نفسك وتوقفي الأكل.
-
تصالحي مع الأكل:
الممنوع مرغوب، علشان كده ما تحرميش نفسك من أي نوع من الأكل، لإن الحرمان منه هيزيد شراهتك عليه، وفي نفس الوقت لو أكلتيه هتحسي بذنب شديد، علشان كده ما تحطيش لنفسك قائمة أكلات ممنوعة، لكن تناوليها بانضباط.
-
اتحدي تنبيهات الطعام في عقلك:
أكيد في عقلك إنذار بيرن لما تاكلي شوكولاته أو حلويات أو دهون، وده بسبب طول التعود على شكل الأنظمة الغذائية، وده بيسبب الإحساس بالذنب واللوم الشديد لنفسك، علشان كده حاولي تتخلصي من الأثر السيئ ده اللي سببته الريجيمات القديمة، وتجاهلي الرسائل السلبية عن نفسك دي اللي بيرسلها عقلك ليكي.
-
ارضي واستمتعي:
أحد أهداف الحياة الصحية عند اليابانيين هي المتعة والرضى، والمتعة هي أهم حاجة بننساها في الأنظمة الغذائية المعتادة، علشان كده في التغذية الحدسية لازم تحسي بالمتعة، عن طريق تقديم الطعام بشكب مُرضي، وعن طريق نوع الطعام وكميته.
-
اشبعي:
لازم تحسي بإحساس الشبع وانتي بتاكلي، مش الامتلاء أو الشبع المفرط، وده هتحسيه لما توقفي أكل وتركزي في احساسك أكتر.
-
تعاملي مع مشاعرك بلطف:
كتير بيكوت الأكل عاطفي، يعني بتاكلي عشان تنسي مشاعر غضب أو حزن أو حسرة، أو أي شعور من المشاعر السلبية، وده بيحصل لنا كلنا، لكن محتاجة تعرفي إن الأكل مش هيحل أي مشكلة من المشاكل اللي بتواجهيها، ولا هينسيكي، علشان كده محتاجة تتعاملي مع مشاعرك بحلول لطيفة تانية غير الأكل.
-
احترمي جسمك:
جسمك حلو في كل الأحوال، ولازم تتقبليه الأول، ومتوجهيش له رسائل محبطة زي أن جسمي وحش، جسمي مترهل، إلى آخر الكلمات دي، وغالبًا ده بيحصل بعد الفشل في أنظمة دايت تانية.
-
اتحركي:
بس خليها حركة لطيفة ليكي، مش إن الحركة هدفها هخسر كام سعر حراري، لا خليها زي الفسحة، وركزي على الحاجات الممتعة وانتي بتعملي رياضة، زي إن الخروج الصبح في الجو الحلو أحلى بكتير من النوم في السرير، أو إنك بتقابلي أصدقاء جداد في الجيم، وهكذا، ساعتها هتحبي الحركة وتحسيها نشاط لطيف في حياتك.
-
اتغذي بلطف:
اعرفي إن نظامك في الأكل على المدى الطويل هو المهم، علشان كده مش مشكلة لو أكلتي وجبة مش متوازنة، أو في يوم معين أو خاص بالنسبة ليكي أكلتي حاجات زيادة، الدنيا ما اتهدتش، هترجعي تاني يوم لأكلك الصحي تاني بدون أي أزمات، لو مشيتي بالنفسية دي هتلاقي فرق لطيف في التغذية بتاعتك.
ودلوقتي قوليلنا بعد ما عرفتي أكتر عن التغذية الحدسية، هل حاسة إنك قررتي تمشي عليها وتسيبي الدايت المعتاد؟ هل حاسة إنها مناسبة ليكي وهتأثر إيجابيًا في حياتك ونفسيتك ووزنك؟ قوليلنا رأيك في التعليقات، وقوليلنا إيه نظم التغذية اللي بتريحك.
وماذا عن البوليميا نيرفوزا؟ اعرفي أكتر عنها!
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر:
التعليق باستخدام حساب فيس بوك