هل أنا بفرق في المعاملة بين ولادي؟
من أخطر الأخطاء اللي ممكن نكون بنرتكبها في حق ولادنا هي التفرقة في المعاملة بينهم، على الرغم إن كلنا بنقول إننا بنحب ولادنا زي بعض وبنعاملهم نفس المعاملة، و غالبًا بيكون ده إحساسنا فعلا بس الحقيقة إننا ممكن نكون بنفرق بينهم و إحنا مش حاسين و لا واخدين بالنا، ممكن نكون بنميل لحد أكتر من التاني، بنتعاطف مع واحد أكتر أو بنحسه طيب فبناخد صفه أسرع أو بنيجي عليه، و للأسف ده تأثيره السلبي على ولادنا و على صحتهم النفسية أكبر بكتير مما نتخيل ده غير إنه بيأثر كمان على العلاقة بين الإخوات و بيدخل فيها مشاعر سلبية كتير إحنا في غنى عنها.
- لو بتقارني بين ولادك وبتشكري في واحد عشان هو هادي مثلا و بتشتكي دايمًا من الشقي، أو لو واحد منظم و التاني لا فدايما بتقولي جمل زي: “شايف أخوك بيرتب إزاي \حاول تتعلم من أخوك شوية”.
- لو بحكم فرق السن بين ولادك فالصغير دايمًا واخداه في حضنك بتأكليه و تغيريله والكبير كل ما يطلب منك حاجة تقولي له إنت كبرت خلاص، أو معندكيش وقت تقعدي تلاعبيه أو تاخديه في حضنك.
- لو واحد في ولادك عنده مشكلة أو ظروف خاصة بتخليكي متعاطفة معاه معظم الوقت و مش عايزه حد يزعله و بتلبي له كل طلباته و التاني بتعامليه عادي.
- لو واحد شقي شوية و مشاكله كتير و التاني هادي و مطيع فتلاقي نفسك تلقائي بتميلي ناحية الهادي و إنتي متخيلة إن ولادك الاتنين مش حاسين بده.
و غيرها مواقف كتير ممكن نتصرف فيها و إحنا مش قاصدين نفرق في المعاملة بين ولادنا و مقتنعين إننا مادام بنحبهم زي بعض يبقي إحنا كدة مش بنفرق في المعاملة، بس الأطفال أذكياء و حساسة بيراقبوا تصرفاتنا و كلامنا و ردود أفعالنا بيترجموها إنك بتحبيه أو لا أو بتحبي أخوه أكتر منه، و ده بيظهر بعد كده على سلوكه لو لقيتيه اتغير أو بقى يحاول يعمل حاجة كبر عليها أو ماكنش بيعملها قبل كدة عشان يلفت الانتباه له.
تربية الطفل الوحيد .. إزاي ما يطلعش أناني ومتدلع؟
لكن خليني أقولك بردو إن مش معني إني مطلوب مني أعدل بين ولادي إني زي ما بأكل الصغير مثلا أأكل الكبير وزي ما بساعد اللي عنده ظروف خاصة أساعد اللي معندوش، لا طبعا مش مقصود خالص إني أعامل كله بنفس الطريقة و الامتيازات.
بس في أساس أحافظ عليه للكل و هو التعبير عن الحب و إحترام مشاعرهم و تشجيعهم و دعمهم و تقضية وقت خاص مع الطفل علي حسب السن، كل ده حاجات أساسية مينفعش تديها لحد أكتر من التاني بس تقدري تعبري بيها لكل واحد بطريقة مناسبة لسنه و بطريقة يفهمها و يحسها.
وفي نفس الوقت لما تكوني قريبة منهم كل واحد منهم هيفهم أنه ليه امتيازات و مهام كتير بيقدر يعملها مناسبة لسنه و كل واحد عايز يعمل حاجة مش مناسبه ليه ممكن توجديله بديل مناسب ليها لا الصغير يحس أن الكبير بيعرف يعمل كل حاجة و هو لأ ولا الكبير يحس إن الصغير واخد كل الدلع و الحب وهو لا.
ابني ما عندوش أصحاب .. إزاي يبقى شخص اجتماعي؟
عشان كدة لازم نركز جدًا و نراقب تصرفاتنا و كلامنا مع ولادنا ونعدل بينهم لإن ده واجبنا ونبعد تمامًا عن المقارنة بينهم، عشان نقدر نكبر ولادنا قريبين و بيحبوا بعض و في ضهر بعض، من غير ما يكون واحد فيهم ناقم على أخوه أو حاسس إنكم دايمًا بتيجوا عليه و بتفضلوا أخوه و نبني بإيدينا مسافات بين ولادنا من غير ما نحس.
وعلشان تعرفي أكتر عن تربية الأطفال تقدري تشوفي مقالات خبيرة التربية الإيجابية رنا هاني هنا
التعليق باستخدام حساب فيس بوك