هل أنا بافرّق في المعاملة بين ولادي؟

من أخطر الأخطاء اللي ممكن نكون بنرتكبها في حق ولادنا هي التفرقة في المعاملة بينهم على الرغم إن كلنا بنقول إننا بنحب ولادنا زي بعض وبنعاملهم نفس المعاملة وغالبًا بيكون ده إحساسنا فعلًا بس الحقيقة إننا ممكن نكون بنفرق بينهم واحنا مش حاسّين ولا واخدين بالنا، ممكن نكون بنميل لحد أكتر من التاني بنتعاطف مع واحد أكتر أو بنحسه طيب فبناخد صفه أسرع أو بنيجي عليه، وللأسف ده تأثيره السلبي على ولادنا وعلى صحتهم النفسية أكبر بكتير مما نتخيل ده، غير إنه بيؤثر كمان على العلاقة بين الأخوات وبيدخل فيها مشاعر سلبية كتير احنا في غنى عنها.

لو بتقارني بين ولادك وبتشكري في واحد عشان هو هادي مثلًا وبتشتكي دايمًا من الشقي، أو لو واحد منظم والتاني لا، فدايمًا بتقولي جمل زي “شايف أخوك بيرتب ازاي؟ حاول تتعلم من أخوك شوية”. أو لو بحكم فرق السن بين ولادك، فالصغير دايمًا واخداه في حضنك، بتأكّليه وتغيري له، والكبير كل ما يطلب منك حاجة تقولي له: “انت كبرت خلاص” أو ما عندكيش وقت تقعدي تلاعبيه أو تاخديه في حضنك. لو واحد في ولادك عنده مشكلة أو ظروف خاصة بتخليكي متعاطفة معاه معظم الوقت، ومش عايزة حد يزعله وبتلبي له كل طلباته والتاني بتعامليه عادي. وغيرها مواقف كتير ممكن نتصرف فيها واحنا مش قاصدين نفرق في المعاملة بين ولادنا ومقتنعين إننا ما دام بنحبهم زي بعض، يبقى احنا كده مش بنفرق في المعاملة، بس الأطفال أذكياء وحساسة، بيراقبوا تصرفاتنا وكلامنا وردود أفعالنا بيترجموها إنك بتحبيه أو لا أو بتحبي أخوه أكتر منه، وده بيظهر بعد كده على سلوكه لو لقيتيه اتغير أو بقى يحاول يعمل حاجة كبر عليها أو ما كانش بيعملها قبل كده عشان يلفت الانتباه له.

بس مش معنى إني مطلوب مني أعدل بين ولادي إني زي ما بأءكل الصغير مثلًا، ءأكل الكبير وزي ما باساعد اللي عنده ظروف خاصة، أساعد اللي ما عندوش؛ لا طبعًا مش مقصود خالص إني أعامل كله بنفس الطريقة والامتيازات.

بس فيه أساس أحافظ عليه للكل وهو التعبير عن الحب واحترام مشاعرهم وتشجيعهم ودعمهم وتقضية وقت خاص مع الطفل على حسب السن، كل ده حاجات أساسية ما ينفعش تديها لحد أكتر من التاني بس تقدري تعبري بيها لكل واحد بطريقة مناسبة لسنه وبطريقة يفهمها ويحسها.

وفي نفس الوقت لما تكوني قريبة منهم كل واحد منهم هيفهم إنه له امتيازات ومهام كتير بيقدر يعملها مناسبة لسنه وكل واحد عايز يعمل حاجة مش مناسبة له ممكن توجدي له بديل مناسب ليها، لا الصغير يحس إن الكبير بيعرف يعمل كل حاجة وهو لأ، ولا الكبير يحس إن الصغير واخد كل الدلع والحب وهو لا.

عشان كده لازم نركز جدًا ونراقب تصرفاتنا وكلامنا مع ولادنا ونعدل بينهم لإن ده واجبنا ونبعد تمامًا عن المقارنة بينهم. عشان نقدر نكبر ولادنا قريبين وبيحبوا بعض وفي ضهر بعض، من غير ما يكون واحد فيهم ناقم على أخوه أو حاسس إنكم دايمًا بتيجوا عليه وبتفضّلوا أخوه ونبني بإيدينا مسافات بين ولادنا من غير ما نحس.

مصادر:
Psychology Today
The conversation