محتويات المقال
سواء غيرة من ترقيتك، أو من مستواكِ في الشغل، أو من محبة المديرين لكِ، أو حتى عشان يزهقوكي من الشغل وتمشي منه، كتير بتلاقي نفسك عرضة لتريقة وسخرية وتقليل من الزملا في الشغل (أو حتى ساعات من مديرينك نفسهم). ده اسمه التنمر في مكان العمل. التنمر مش بس بيأثر في حالتنا النفسية، دا كمان بيأذينا في صحتنا وفي إنتاجيتنا. لما بنتعرض لمواقف زي دي، ممكن ما نبقاش عارفين نتصرف إزاي. في المقال ده، هنحاول نساعدك بخطوات تفهمك كيفية مواجهة التنمر في العمل عشان تقدري تكملي في الشغل من غير ما تضطري تسيبيه.
أولًا: تعاملي مع الموقف في وقتها
المواجهة صعبة وساعات بتكون مخيفة، خصوصًا لو المتنمر أقدم مننا في الشغل أو مديرنا. لأننا لو هنعرف نشتكي من زميل أو زميلة للمدير، مش هنعرف نشتكي المدير لمين. عشان كده، أحسن من إنك تضطري تلجأي لحد من برا أو حتى تفكري إزاي تنتقمي لنفسك أو لكرامتك، اتكلمي في نفس وقت الموقف. ده هيوقف المتنمر عند حده. لو التريقة تمس شغلك، ممكن تقولي إن “لو فيه تعليق على شغلي، أفضّل يكون التوجيه في اجتماع رسمي.” أما لو كانت التريقة عن شكلك أو حالتك الاجتماعية أو حاجة تخص حياتك الشخصية، فممكن تقولي: “التعليقات دي غلط وغير مسموح بها ولو اتكررت هاضطر ألجأ للمدير (ولو من المدير يبقى إنك هتلجأي للنقابة أو هتصعّدي الموضوع لإدارة خارجية لو الشركة متعددة الجنسيات). تأكدي إن حتى لو المواجهة صعبة، ممكن تساعد في تفادي تمادي الشخص ده في أذاكي.
ثانيًا: لاقي حد تتكلمي معاه
سواء في الشغل نفسه لو فيه زميلة أو زميل تقدري تثقي فيهم بنسبة كبيرة. أو حتى مع حد برا الشغل من أصحابك. لازم تلاقي حد موثوق فيه تقدري تقولي له اللي بيحصل معاكي لأن كتير من الوقت لما بنكون ضحية للتنمر وما عندناش رأي من برا، بنفكّر إن يمكن يكون ده فعلًا صح. يمكن يكون عنده حق فعلًا وأنا مش كفء أو فاشلة أو شكلي وحش، أو أيًا كانت الإهانة اللي بيوجهها لك المتنمر. الدراسات اللي عملوها على الأشخاص اللي بيتعرضوا للتنمر بتقول إن الضغط عليهم بيسبب تراجع شديد في الثقة في النفس ومستوى عمل أضعف، وإنه لو استمر فترات كبيرة وحسوا بعجز قدام المتنمر وما لاقوش دعم نفسي كفاية، ممكن يسبب لهم اكتئاب وأفكار انتحارية.
ثالثًا: وثقي كل حاجة تقدري توثقيها
لما بنكون في موقف عرضة للتنمر، أصعب حاجة إنك لما تشتكي ما تلاقيش أي حاجة تدعم كلامك. عشان كدا بننصحك، لو المتنمر بعت لك أي رسالة نصية أو بريد إلكتروني فيه الكلام غير المقبول، احفظي منها سكرين شوت واعملي ملف كامل عندك من كل المواقف دي. لو الكلام كان قصاد أي زملا، تقدري تكتبي في ورقة عندك الموقف اللي حصل والكلام اللي هو قاله ومين من الزملا كان حاضر وسامع الكلام دا، وحصل فين وامتى. على فكرة، قانون العمل المصري (القانون رقم 12 لسنة 2003)، في المادة 70 بيقول: “إذا نشأ نزاع فردى في شأن تطبيق أحكام هذا القانون، جاز لكل من العامل وصاحب العمل أن يطلب من الجهة الإدارية المختصة خلال سبعة أيام من تاريخ النزاع تسويته وديًا، فإذا لم تتم التسوية في موعد أقصاه عشرة أيام من تاريخ تقديم الطلب، جاز لكل منهما اللجوء إلى اللجنة القضائية المشار إليها في المادة (71) في هذا القانون في موعد أقصاه ثلاثون يومًا من تاريخ النزاع وإلا سقط حقه في عرض الأمر على اللجنة.”
خليكي دايمًا واثقة من نفسك ومن شغلك، وما تخليش أي حد يهز ثقتك في نفسك. وافتكري إنك مش لوحدك وإن القانون في صفك. ما تسكتيش على وضع يظلمك.
التعليق باستخدام حساب فيس بوك