دايمًا بنحس إن تعرض ولادنا للـ تنمر مش هيحصل، وإن التنمر هيكون بعيد عننا وإنه بيحصل للناس التانية بس مش ممكن يحصل مع أولادنا. لكن كل ده بينهار في اللحظة اللي ابنك أو بنتك تيجي فيها وتقول لك موقف حصل في المدرسة أو الشارع أو حتى المحيط السكني. ما بتبقيش قادرة تصدقي إن هو ده التنمر اللي بتسمعي عنه طول الوقت. في اللحظة دي، ما بتبقيش عارفة تقولي إيه ولا تتصرفي إزاي. لذلك قررت أكتب المقال ده عن أفضل 10 جمل ممكن تردي وتقوليهم في الحالات دي
-
“إيه رأيك نتكلم مع بعض في اللي حصل؟”
مش من الصح إننا نتجاهل الطفل لما يحكي عن حد ضايقه، أو نفضل نقول له: أكيد ما يقصدش، يمكن بيتهيألك، أو نطلب منه يتجاهل اللي حصل. هو بالشكل ده هيفقد ثقته فينا ومش هييجي يحكي لنا مرة تانية، لأننا مش بنقدّر اللي بيحصل له. أفضل رد مع أي إشارة للتعرض للتنمر إننا نطلب من الطفل ما يتجاهلش أي مضايقة متعمدة يتعرض لها ويحكي معانا عشان نقدر نوصل لحل.
-
“إيه اللي بيحصل لك؟”
الصياغة دي كفيلة تخرّج أي حاجة من قلب الطفل، وتخليه يحكي بقلب مفتوح عن المضايقة، ويمكن يعيط كمان. وفي اللحظة دي ما تحسيش بالهلع، أحضنيه.
-
“مش عيب تحس بالغضب والإحباط! عبّر عن مشاعرك”
فيه آباء وأمهات لما الطفل يشتكي من طفل تاني بيضايقه، بيكون الرد أضربه زي ما بيضربك، وأحيانًا مش بيكون في تكافؤ بدني، والنتيجة إن الطفل بيرجع يشتكي، فتبدأ الأم أو الأب يتعاملوا معاه باعتباره ضعيف و”خيخة”، وأحيانًا بيقولوا ما تبقاش حساس قوي كده، إنشف، إجمد. ده ساعات ناس بتقول للطفل “خليك راجل”!
-
“أنا جنبك ومش هاتخلى عنك. حابب نتصرف ازاي؟”
صحيح الاعتماد على النفس حاجة مهمة بالنسبة للأطفال في حياتهم، بنعودهم من صغرهم على إنهم ما يلجأوش للأب والأم في كل كبيرة وصغيرة، لكن أحيانًا الموضوع بيكون أكبر من الطفل، والإيذاء بيكون عنيف، وكلمة زي “دافع عن نفسك بدل ما تشتكي” بتكون دافع للشعور بالضعف واليأس وقلة الحيلة، مش طريقة للتشجيع زي ما احنا بنكون متخيلين.
-
“رأيك إيه هو الحل؟”
التنمر مش حله إننا نرد التنمر بتنمر، خاصةً لو كان جسدي، فنطلب من ولادنا يشتبكوا مع الأطفال المتنمرين، الطفل هو اللي عايش في بيئة المدرسة وعارف كويس إيه الحل اللي ممكن يتعمل، مين المدرس اللي ممكن يتدخل، مين الصديق اللي ممكن يتوسط، إيه الحل اللي ممكن يتعمل. بس في أوقات كتير ما بيكونش قادر يعمله بنفسه.
-
“انت ما تستحقش المعاملة دي”
جملة “ما تلعبش معاهم تاني” دي أسوء جملة ممكن تتقال على الإطلاق. التعامل مع طفل تعرض للتنمر محتاج سعة صدر وخيال واسع واحترام للموقف. ما ينفعش تقول له سيبك منهم أو تجاهلهم كأن القرار بإيده.
-
“بتثق في مين ممكن تشتكي ليه؟”
لو التنمر حصل في المدرسة، ابنك أو بنتك هيكونوا أكتر ناس عارفين مين المدرس أو الشخص اللي ممكن اللجوء له. لو قررتي تتحركي وتساعديه، لازم تبقي عارفة هتتحركي إزاي ولمين. ما تتجاهليهوش وخليه شريكك في قرار الشكوى.
-
طلّع صوتك
أحيانًا من كتر الرغي اللي أولادنا بيرغوه معانا في البيت، بنتخيل إن ده العادي، وإنهم بالتأكيد اتكلموا لما اتعرضوا للمضايقة. بس المفاجأة إن عادةً المواقف اللي زي التنمر بتشل الضحية، وبتخليه مش قادر يتكلم أو يوصف الموقف السخيف اللي اتعرض له. عشان كده، لازم نشجع ولادنا إنهم يتكلموا بصوت عالي ويعبروا ويعرفوا الناس اللي لهم سلطة باللي حصل، بل إنهم يتكلموا في وش اللي بيضايقوهم، لأن المتنمر في أوقات كتير بيخاف لما يحس إن ضحيته قادر يتكلم ومش هيتقبل الإيذاء في صمت.
-
المتنمر ممكن يبقى صديق.. تفهّمه ما تغضبش منه
في الدين، ممكن اللي بينك وبينه عداوة يتحول لصديق حميم. نفس الشيء في حالة التنمر، وعادةً الطفل المتنمر بيكون اتعرض لإيذاء مسبق ومشاكل خلته يطلّع غضبه في أطفال تانيين غيره في صورة تنمر. لو ابنك أو بنتك فهم ده، هيفقد حالة الهلع والخوف اللي بيحسها تجاه المتنمر كأنه شخص لا يقهر. بل إنه ممكن يتعاطف معاه، وده حصل معايا أنا شخصيًا زمان لما قررت أفهم زميلتي بتتنمر عليا ليه، واكتشفت إنها محتاجة مساعدة وإنه العنف مجرد ستارة للغُلب اللي هي حاسة بيه.
-
انت طفل رائع، كلنا بنحبك
مهم جدًا في حالة التعرض للتنمر إننا نوصل رسائل إيجابية للطفل إنه محبوب وإنه مقبول، وإن المشكلة مش فيه، وإنه مش السبب في التعرض للتنمر. الطفل لما يحس إنه محبوب ومقبول هيكون أقوى وهيقدر يتصرف بشكل فيه ثقة في النفس مش باهتزاز وحزن وغضب ويأس.
المصادر
https://www.ditchthelabel.org/what-to-say-someone-bullied/
https://herviewfromhome.com/5-things-to-tell-your-kids-about-being-bullied/
التعليق باستخدام حساب فيس بوك