ضغط الجيوب الأنفية، انسداد الأنف، احتقان الحلق كلها أعراض التهاب الجيوب الأنفية أثناء الحمل، ومن أكتر الحاجات المعروفة اللي بتمر بيها الستات في الوقت ده.
والجيوب الأنفية هي جيوب هوائية، بتبطن الأغشية المخاطية اللي حوالين العيون والخدود والجبين، واللي بتسمح بخروج المخاط، بس لو اتسدت المخاط مش بيخرج، والجيوب دي بتلتهب ومع التهابها ممكن تعاني من انسداد أنفك أو سيلانها بشكل مستمر من غير توقف.
انسداد الجيوب الأنفية ده بيسبب الصداع والشعور بألم ورا العيون، علشان ساعتها بيكون في كمية مخاط زيادة في تجويفات الجمجمة، وأحيانًا كمان الانسداد بيسبب ألم في الوش في أماكن مختلفة، بتزيد لو ضغطت عليها وبتزيد أكتر في وقت الصحيان من النوم أو الانحناء.
وبعض الأطباء بيعتقدوا إن التهاب الجيوب الأنفية المفاجيء أثناء الحمل، هو بسبب هرمون البروجسترون اللي بيخلي الأغشية المخاطية تنتفخ.
أعراض الجيوب الأنفية أثناء الحمل ممكن تخففيها عن طريق إنك تقللي شوية كمية منتجات الألبان اللي بتاكليها، بس طبعا ما تلغيهاش لأنها مصدر أساسي للكالسيوم اللي بتحتاجيه انت وجنينك.
وفي طبعا طرق ممكن تعمليها في البيت تخفف عنك ألم التهابات الجيوب الأنفية أثناء الحمل وفي بعض الطرق دي أصلًا بيساعد في تقوية مناعتك الذاتية.
من طرق تخفيف آلام الجيوب الأنفية:
- شرب كميات كبيرة من السوائل زي المياه، والشوربة، وعصير الليمون علشان جسمك يفضل رطب ويقدر يساعدك على التغلب على الحساسية.
- استعملي محلول ملحي علشان ترطبي أنفك وممكن تعمليه عن طريق إنك تخلطي مياه دافيه وتُمن معلقة صغيرة ملح وذرة بيكنج بودر.
- استنشقي الزيوت الأساسية للكافور عن طريق إنك تحطي نقطتين على منديل ورق وتشميه، لأنه بيفتح القنوات الهوائية.
- تسخين الماء واستنشاق بخاره، بعد ما تبعديه عن النار وتغطي رأسك بمنشفة، ده كمان بيساعد على فتح المجرى الهوائي للأنف.
- رفع الرأس أثناء النوم على وسادتين ممكن يسهل التنفس.
الوسائل دي هتشتغل على تخفيف الأعراض على المدى القصير، بس مش هتعالج المشكلة ومن فضل ربنا الجنين مش بيتأثر بالتهاب الجيوب الأنفية اللي بتتصاب بيه الأم، ولو حسيتي إنك مش قادرة تستحملي الألم، فلازم ترجعي لدكتورك قبل ما تاخدي أي علاجات.
وعلشان تعرفي اكتر عن صحة الحامل تقدري تشوفي المقالات دي:
علاج التهاب ونزيف اللثة للحامل
أسباب التهاب ونزيف اللثة خلال فترة الحمل
المصادر:
التعليق باستخدام حساب فيس بوك